هل صمتي صحيح 💔

السلام عليكم ورحمة الله و بركاته .


بنات أبحكي لكم عن شيء جرحني كثيير ، لكني بس اسكت و ما أرد .


أنا تزوجت و تعرفت على زوجة صاحب زوجي ، هم متزوجين قبلنا بـ7 سنوات و ربي ما كتب لهم الذرية و الحمدلله على كل حال ، حبيتها كثير و لأني فس منطقه و أهلي في منطقه ما كان لي غيرها صديقه ، كل شيء أقوله لها ، و أدعي لها في جوف الليل إن الله يرزقهم من واسع فضله ، والله العظيم لدرجة حتى لمن أشرب موية زمزم ادعي لها كأنها جزء مني ، ما شاء الله حملت بعد زواجي بشهرين و ما فكرت أبداً أخبي عنها ، وبشرتها و فرحت لي ، الحمدلله ولدت و بعد ما وصلت بنتي 9 شهور أراد ربي إني أحمل ما شاء الله ، و أول ما كلمتها ما تتوقعون ردة الفعل إللي لقيتها منها ، وربي إني بكيت بكى ، قالت إيش هذا تجيبيهم وراء بعض زي الغنم ، سكتت وبلعت الغصه و ما رديت ، بعدها سويت عزومه في بيتي و دعينا مجموعة من الأصدقاء ، و كان معاهم أطفال و البيت دوشه شوي ، قالت تبغي تخلي بيتك كذا إزعاج زي روضة الأطفال ، سكتت و بلعت الغصه رغم إنها قالتها قدام الضيوف ، و كمان بعدها انعزمنا مع بعض في رمضان و اول ما جيت كان المجلس زحمه فجلست في مكان ضيق قالت لي في جالسه إنتِ و كرشتك ، قلت لها ما لقيت مكان فضحكت وراحت ، و بعد الفطور كنا نتكلم على الوزن الزائد وكذا قلت إن شاء الله بعد ما أولد دي المره حهتم بنفسي ، قالت إنتِ أسكتي ولا كلمه حتخرجي من حمل و تدوري على حمل ثاني ، قسم بالله قدام الضيوف و أنا حنى ما أعرفهم ، مسكت عبرتي و سكتت ، رجعنا ثاني مره نتكلم و قلت انه عندي احتباس سوائل جسمي منتفخ ، قالت والله محد قالك تحملي ، يابنات وربي إني مجروحه قسم بالله ، ليش كذا تعاملني و أنا والله كنت ادعي لها بظهر الغيب و ما أنساها ، تجرحني بالكلام و أسكت عشان أخاف أقول كلمه تعورها ، أنا وربي حساسه كثير ، ما أحب أجرح أحد ولا أحب أحد يجرحني ، وفوق ذا كله والله ولا مره قالت ما شاء الله حتى ، رغم إني لو تكلمت على شيء يخصها و أنا قلت ما شاء الله تقول قولي مره ثانيه أنا ما أتطمن ، إيش أسوي بالله عليكم ، والله إني مجروحه كثير و كل ما بغيت أنام أتذكرها و أتذكر كلامها ...