هل فعلاً ماينفعك بالدنيا إلا فلوسك ؟

السلام عليكم ورحمة الله وبركاته

بنات انا شفت كذا موقف بعيوني وتأكدت من مقولة ( محد بينفعك بالدنيا الا فلوسك لا زوج ولا عيال ) وقلت اطرح الموضوع اشوف ارائكم ووجهات نظركم ..

انا شفت اكثر من وحده كبيره بالسن ومعهم فلوس وخير ماشاء الله والله يابنات كبيرات ومحتاجات عيالهم وبناتهم حولهم ووحده منهم صابها الخرف اسأل الله لها الشفاء وحسن الخاتمة والله يابنات ماعندهم الا شغالات وممرضات وعيالهم ( ذكور واناث ) مايجونهم الا زياره ساعه ساعتين باليوم ويوروحون ومايدفعون حق الشغالات والممرضات من رواتبهم لا ياخذونها من فلوس امهم الي عندها ويصرفون عليها وعلى ملابسها واكلها وشربها وادويتها وشغالتها ووو الخ ..

وبنفس الوقت شفت موقف لشايب كبير ومريض وطايح مايقدر يتحرك بس انه فقير ماعنده فلوس وتخيلوا عياله وبناته كل يوم رامينه عند واحد لين خذته أرملة ولده كانت غنيه وعندها فلوس واعتنت فيه وجابت له سواق يشيله ويمشيه ويوديه لين توفي الله يرحمه

هذا بالنسبة لكبار السن الي مافادوهم عيالهم الي تعبوا فيهم طول هالسنين واكيد ماخفي كان اعظم , وشوفوا دور رعاية المسنين تشوفون العجب العجاب

بالنسبة للي توهم اعمارهم ماهي كبيره مره اعرف وحده مبهذل فيها زوجها كل انواع البهذله الي تطري على بالكم وتزوج ورماها هي وعيالها وهي ماعندها فلوس بعدين اشتغلت تبيع اكل وطلبت الطلاق من زوجها والحين ماشاء الله صارت مستقلة وعايشة عيشه مكرمه منعمه بعيد عن الذل , وعيالها ثنين تزوجوا وسحبوا عليها مايساعدوونها ولا بريال واحد كل المصاريف عليها !! يعني مافادها لا زوج ولا رحموها عيالها ولا بين بعينهم الي سوته علشانهم ومافادها الا فلوسها

وفيه اكثر من موقف شفته بعيني وسمعت عنه بس عجزانه اكتبهم :icon20:

انا بصراحة يوم شفت وسمعت اكثر من موقف ان الي عندهم فلوس يستندون عليها بعد الله راح يعيشون بحياة كريمة اكثر من الي بيستندون على زوج وعيال واهل - طبعا اعتمادنا اولا واخيرا على الله وحده لكن اشوف ان الاكتفاء المالي لاي وحده هو الحامي لها بعد الله لا سمح الله مرضت تعالج نفسها بفلوسها بدون ماترمي نفسها على احد واذا كبرت وجلسات لحالها بعد زواج ابنائها وبناتها تجيب شغاله تريحها وممرضه تعالجها اذا كانت مريضه وسواق يوصلها مشاوريها بدون ماتقط وجهها على عيالها يوصلونها لا وعاد اذا صارت مرة ولدها شريرة تنسى ولدها وتنسى انه بيوصلها ولا يطق لها خبر


شرايكم بنات من الواقع الي حولكم والي تقرون وتسمعون عنه , هل فعلاً محد بينفعك الا فلوسك بالدنيا ؟
( بالدنيا وليس بالآخره ) << علشان لاحد يجيني مطفي النور هههههههه

" اعمل لدنياك كأنك تعيش ابداً واعمل لآخرتك كأنك تموت غداً "



تعديل

بنات الي قالوا اهم شي الصحة والعافية والامن والامان , انا عارفة لكن كل هالاشياء الي ذكرتوها ماتقدرين تسعين لها وتطلبينها ماعدا الفلوس تقدرين انتي تسعين لها وتكوّنين ذاتك بذاتك اما مثلا الصحة والعافية هي بيد الله اذا مرضتي الله يشفيك ثم العلاج والادوية الي راح تشترينهم بفلوسك .. فهمتوا علي
انا موضوعي عن انه ماراح ينفعك مخلوق ابد مهما كانت قرابته بك حتى عيالك الي حملتي بهم وتعبتي بتربيتهم ماراح ينفعونك ..
هل انتم مؤيدين او معارضين وكل وحده تكتب وجهة نظره ..
ولا الصحة والعافية والامان هذي مايختلف عليها اثنين ..
ان شاء الله تكون وصلتكم الفكره