السلام عليكم
فيه مثل كانوا يقولونه خواتنا المصريات وبصراحه انا مؤمنه بهالمثل بنسبه 60في الميه واللي يقول
ابنك على ماتربيه .... وزوجك على ماتعوديه
شوفي حبيبتي مشكلتنا حنا اننا إذا جينا نعطي النصايح نعطيها بعاطفه شديده جدا او على حسب النموذج اللي عايش معنا ... انا اقول لأ لازم انتي تعرفين وش هالشخص اللي انتي عايشه معه وش طينته بالضبط وين مفتاحه اللي اقدر اوصل للي ابي منه انتي اكثر وحده عارفته
احيانا الرجل يحس كذا وش اقولك يعني يحس اذا كانت الزوجه مثقفه ومتعلمه مثلا انها احسن منه فهذا احساسه الداخلي طبعا مايبي يقوله لك مباشره مايقول انتي احسن مني لا يترجمه عن طريق جمل ثانيه منها سلمك لله اللي يقولها زوجك لك يبي يوصل لك وهذا تحليلي انا انه هو افضل منك والحريم الثانيات احسن منك وانه الأمر الناهي في هالبيت
اوكي ولا يهمك انت كل شي ... انا اقولك انتي خليك على مبادئك والاشياء اللي تخصك خلي رأيك هو اللي يمشي فيها بس بسايسه النساء ولا تتنازلين عن هالشي في المقابل حسسيه انه احسن رجال بوقفاته بفزعاته بهالكلام اللي يطيرهم شوي
خلي لك اهتمامات غيرررررررررررررررررررررررررررررررررررررررررررررررررررررره مهم هالشي وبصراحه انا من الحريم اللي صار بيتها كل حياتها فالنتيجه اني إذا قلت ابي اروح لصديقتي مثلا تبقق عيونه ويقول وش صديقته ؟؟؟ اذا قلت صديقاتي شي زي كذا ==== طبعا في بدايه الزواج قاطعت الكل عشاني عروس وبعدها تفشلت اكلمهم وكذا كذا انقطعت عنهم تعرفون وش قال ؟؟ عاد انتي عندك صديقات ؟؟؟ تخيلوا والله شغله
بلاش سالفه المناقشات العمليه ترى الاحظ هذا يمشي في الافلام اكثر ربعنا ربع قول طيب وبعدها سوي اللي في راسك انتي بس سكتيه وارضيه وبعدها بطريقه حلوه أوصلي للي تبينه
بصراحه في وحده اعرفها ماشاء الله عليها عندها سياسه كيد النساء خطيره لدرجه ان الرجال اللي كان متزوجها كان من اشد المعارضين لوجود السواق والطلعات والخرجات و و و ويعني بإختصار عله والله هالحين تغير والسر ؟؟؟ سياسه النساء هو من الرجاجيل اللي اعصابهم تعبانه يعني يعصب بسرعه بس هي ماشاء الله العكس قمه البرود فيعصب ويشيش ويهزء وهي ساااااااااااااااااااكته هنا حس بضعفها شوي شوي صار قمه الاحترام معها
بالنسبه للأطفال صدقيني هذا اسلوب ثاني من اساليب فرض الرأي وأشغالك في البيت والحياه والعيال بس عادي العيال من الله ورزق بس إذا حسيتي ان هالشي على حساب صحتك وتربيتك لهم لا طبعا خلي كل واحد ياخذ حقه من الحنان والتربيه
بعدين ياحلوه عاد بصراحه خلااااااااااااااص كل شي شييييييييييييييييييييين :)
ترى حنا الحريم إذا زعلنا خلاااااااااااااص الحياه شينه وهو شين وان الله بلاني فيك بس ساعه الرضاء لا كل شي يصير حلو ... ابيك تشوفين وش الحاجات الحلوه فيه وخليك من الشين استمتعي بالزين اللي فيه وشوي شوي حاولي تغيرين الشين بس انتي استخدمي سياسه النساء زي اللي قلت لك عنها
وطمنينا عنك يا قمر ......................

شكرا الف شكر على الاطروحات الجديده والله يسعدكم وينولكم اللي نبون ..اما بعد.........
مصرقعه هانم (بس فكري دايم بتقدريت تعيشين حاياتك كلها بالطرقه هذي ؟؟ وصيري حكيمه وبزر وغبيه وكلش بس خذي اللي تقدرين عليه !!)
والله الزواج مسئوليه ........ انا اداري اهلي ..واهل زوجي..وزوجي كمان ..وادلع اطفالي ... وانا مين ايدارني ودلعني ..مو المفروض هو .. الحياه اخذ وعطا ..
يا فتو (ابنك على ماتربيه .... وزوجك على ماتعوديه ) والله الرجل على ماتعوده امه... ومهما عودته شوي ويرجع ويكون فاهم ...ايه انت سويت كذا عشان كذا
على العموم راح اجرب طريقتكم الله يعيني عليها ... بس بر .. برقع لا مقدر ..اخاف يعجبه الوضع ويصير على طول نصيف في البر............

ايه على فكره مفتاح زوجي هو المدح ...وهذي طريقة اهله معه بس يمدحونه..وانا من يوم ماتزوجته وهو يحب المدح وكنت امدحه بس بعدين صار يقولون الله الحريم كلهم يتمنوني والله يعمي يلمحلي على بناته والله يا فلان,,,,الخ ..صرت ما امدحه ..وامدح ناس ثانين وبعدها الحمدلله هجد...
والمفتاح الثاني اني اصرف على البيت ...وهذا ان قايلته عشم بليس في الجنه ....
...وما اظن ان عنده مفاتيح ثانيه ...في الاعياد يفرح اذا قلت اتصدق عن ابوك ..ادع لبوك ...
-وبالنسبه انه اذا راح ينتقدني وينتقد البيت ...اسكت بعد............

الرجال على ماتعوديه.وبصراحة حتى الرجل الضعيف اذا وجد الزوجه ضعيفة يصير قوي عليها وينفس عن ضعفه فيها.انا جربت وتأكدت أن المرأة اذا ارادت تعيش مرتاحة يجب ان تكون قوية ولاتتنازل عن اي حق من حقوقها.وبكره يوم بزوج بناتي بنصحهم بعدم التنازل من البداية وخاصة في الامور الاساسية مثل مسؤولية الرجل عن الصرف على الزوجه والاولاد،الذمة المالية المستقلة وعدم المساس باموال المرأة،حق الزوجة في التواصل مع اهلها ومساعدتهم،عدم التنازل ابدا عن كرامة المرأة ،عدم التهاون عن الزلات اللي نسمع عنها الحين مثل السفر مع الشلة او مشاهدة القنوات السيئة او العلاقة مع اي انثى حتى لوبنت الخال اوالعم اوالزميلة في العمل.
والله ان الاساءة بحق بعض النساء ومنهن متعلمات وبنات اسر تصل في بعض الاحيان الى مستوى مايتخيله عقل والسبب سكوت المرأة على الزوج وعمايلة .وحسبي الله ونعم الوكيل