هل مررتي بهذه التجربة؟؟

بسم الله الرحمن الرحيم

السلام عليكم و رحمة الله و بركاته

اخواتي الكريمات
أنا عضوة جديدة / قديمة في هذا المنتدى الرائع

جديدة كمشاركة / قديمة كقارئة

و ما راح أطلب من أحد انو يحتفل بيا كالمعتاد :23:

يكفي احتفالات العيد اللي جاي على الأبواب كل سنة و إنتو بألف خير مقدماً:41:


و أساساً مو وقتو دحين احنا في أيام فضيلة و الواحد المفروض يستغلها في
أشياء أهم ... بس معليش الواحد من قهرو على نفسو بيحاول بكل الطرق

الله لا يجيب قهر و يجعلها آخر الأحزان

المهم طولتها و هي قصيرة ...
أنفع كاتبة سيناريو لسلسلات عربية :23:

التجربة اللي أنا اتكلم عنها هي كالاتي:

أنا يا جماعة الخير و أعوذ بالله من كلمة أنا
كان شعري طويل و حلو و كثيف و فيه تموجات بسيطة و كل شي تمام نعمة
من عند ربي ما كنت مقدرتها المهم...
قبل سنة و نص تقريباً بدأ التساقط الرهيب و بالتدريج بدأت الفراغات في فروة الرأس
ثم بدأت الشعرة نفسها تخف و تبهت بعد أن كانت سميكة و لامعة و شديدة السواد
انقلبت 180 درجة ... و الحمد لله على كل حال

طبعاً القصة مكررة فما في داعي اني أعيد الاسطوانة المشروخة من اني
لفيت على الدكاترة و أكوام الأدوية اللي عملت خرم في الميزانية بدون أي
نتائج تذكر الخ الخ الخ

و في النهاية آخر دكتورة شافتني لمن عرفت اني أعاني من تكيس المبايض
قالت انو هو هذا السبب في تساقط الشعر .. وقالت عالجي التكيس تزول
المشكلة إن شاء الله. و الأمل في الله كبير


عارفة عارفة إني دوشتكم
و سامعة ناس تقول طيب و الزبدة؟؟ ايش خلاصة الكلام؟؟
ايش تبغي تقولي..:11:

احم احم .. طيب طيب صبركم بالله
أنا سؤالي
هل في وحدة فيكم مرت بهادي التجربة
يعني كانت عندها نفس الحالة و بعد ما اتعاجلت رجع شعرها زي الأول؟؟

سؤال تاني
أنا خايفة انو الشغلة تطول لأنو أساساً لي تقريباً سنة أراجع دكتورة نساء و ولادة
و ماني شايفة نتيجة

طيب و أذا هي ما عالجتني ايش راح يصير في البقية الباقية من الشعر
أنا أبغ أحافظ عليه بس ما في فايدة
المشكلة اني قريت موضوع هنا من خبيرة تجميل تقول انو اذا المشكلة هرمونات
ما في فايدة
طيب ايش الحل؟؟
و انا لسه صغيرة صح مو نونو بس اعتبر صغيرة 24 سنة
يالله الحمد لله على كل حال
الذي لا يحمد على مكروه سواه.