هل ممكن اتزوج بهذي الطريقة المجنونة ؟

السلام عليكم بنات
بحاول ادخل بالموضوع وع طول واختصر قد مااقدر
اول شي انا عمري ٢٣ سنة وماعمري انخطبت هذي اول نقطة
انا حلوة الحمدلله جسمي جميل وطويلة وشعري ناعم وكثيف
بس مشكلتي سمرا في مجتمع يقدر البياض
تخرجت السنة اللي راحت سافرت برا درست لغة ٦ شهور
وتوي راجعة..
احس اني بفترة من حياتي "احتاج" اتزوج
واحس اني خلاص مهيأة
صايرة اقدم ع وظايف وكذا
بس انا ابغى استقر ماتتخيلون كيف
صبرت ٢٣ سنة لا علاقات ولا شي عشان اعف نفسي بالحلال
مليت صرت اشوف ان فيني عيب اوقف قدام المرايا اطالع بنفسي مليييييت قسم بالله..
بتقولون شوفينا اعمارنا كذا وماتزوجنا
بس انا مو قادرة اصبر ولا ابغى اتجه لطريق الحرام
كل صديقاتي تزوجوا واستقروا نفسيا وعاطفيا
اللي بوصله لكم اني تعبانة من هذا الشي
سنتين من عمري كان الزواج بالنسبة لي هو الدعوة المتصدرة في قائمة دعواتي
بقيامي وبسجودي برمضان وغير رمضان
المهم..
فيه شي صار مدري هو صح ولا لا
هو غلط ولا كيف!
انا ألعب لعبة مشهورة مدري اذا تعرفونها او لا
اللي هي لودو ستار اضيع فيها وقت احيانا
لما اكون بقمة الطفش
اللعبة هذي ماقد تعرفت فيها ع احد وعادة العب مع صديقاتي
وناس اعرفهم
بس من كم اسبوع صرت العب مع شخص
ومايكون بيننا محادثات اصلا
ولما فتح معي محادثة وخفت ان نيته تعارف ومدري ايش
قلتله انا متزوجة
مدري كيف تكلمت بأشياء عامة ومن ضمنها مدينتي
وعائلتي واني سافرت ودرست برا ومدري ايش
وقلتله ع رحلتي وكذا
سوالفنا كانت عادية وكنا نسولف مرة بالأسبوع لمدة بسيطة
اللي هو وقت اللعب
ولا اهتميت فيه ولا شغل تفكيري ولا شي
الولد ذا مرة قالي انا تعبت بتزوج ومدري ايش
طبعا هو من نفس مدينتي ومن نفس عائلتي
بالصدفة..
قلتله طيب خل اهلك يخطبون لك
قال خطبولي وحدة اهلها رافضين الشوفة الشرعية
قلتلهم انا مااتزوج بدون شوفة
قلتله صح يحقلك
قال والحين مدري ايش اسوي
وقالي معاناته الولد جاد جدا وواضح من كلامه
يعني تعرفون الشخص اللي بيقدملك اي شي عشان يثبت انه صادق
قلتله طيب تبيني اشوفلك من صديقاتي ؟
قال اخاف تنبلشين ومدري ايش
قلتله لا طبعا اهاليهم راح يسألون عنك وعن اهلك
قال الحمدلله انا شخص بعف نفسي واعطاني اسمه بالكامل
وقال اهلي سمعتهم سابقتهم
سألته عن معلومات فيه
اسمه بالكامل اعطاني اياه وقالي خلهم يسألون عني
شغله وراتبه ممتاز
متوفرة عنده الشقة وملك
سنه مناسب الولد حرفيًا لؤطة وشفت له صورة
قلتله انا محتارة بين خمس من صديقاتي
وبعطيك مواصفات كل وحدة واختار انت قال طيب
قلتله مواصفات بنات وكذا
ومواصفاتي معهم قال ابغى اختار هذي اللي هي انا
قلتلها اعجبتك؟ قال ايوا
قلتله طيب سمرا؟ قال انا احب السمار
والباقيين بيض ؟ قال لا هي عجبتني
طبعا انا اللي كتبته مواصفات شكلية واخلاقية وكذا
وماعززت لنفسي كتبت الموجود..
المشكلة مو هنا
الولد حرفيا احسه مناسب لي
بتحسون انه شي مجنون اللي سويته
بس انا اشوف انه نفس مواقع الزواج
حتى قالي انا مابغى رقم البنت ابغى رقم اهلها عشان اختي تكلمهم
واذا انتي تبي تكلمين اختي بنفسك كلميها
وقال ابي ناس يوافقون ع الشوفة ومدري ايش ..
انا مو مشكلتي هنا
انا مشكلتي كيف اطلّع نفسي من هذي الورطة
يعني اذا بعطيه رقم اهلي مثلا
واكتشف ان البنت هذي اسمها نفس اسمي وقبيلتها نفس قبيلتي
وبالصدفة سافرت نفس الدولة ودرست ست شهور برضو
بيشك بالوضع .!!!!
بس انا ماودي افرط فيه بسهولة
ادري الطريقة غلط
بس احيانا اقول يمكن الله كاتبلي انخطب كذا
انا بكل شفافية ماعمري انخطبت لا بعزايم ولا بجمعات ولا افراح ولا بشي..
الولد قالي انا ابغى اسجلك مقطع صوت عشان اثبتلك اني صادق بعدين احذفيني ..
وسجل .. وقال بعد مااشوف البنت واسأل عنها
وهم يسألون عني ممكن نكمل او لا ..
يعني الموضوع زي اني ادله عليهم فقط
وجيزة قد تنجح او تفشل
شي بداخلي يقول غامري
وشي بداخلي خايف مرة
ايش المشكلة لو تقدموا بطريقة رسمية؟ وبعد السؤال يتحدد كل شي
+ كيف اطلع نفسي من الورطة اللي حطيت فيها نفسي؟