هل ممكن اكون ظلمت اخوي ؟

السلام عليكم ورحمة الله وبركاته احتاج استشارتكم بشكل عاجل
لتكونوا بالصورة احنا عائلة عصبية بشكل فوق الطبيعي
اخوي الصغير بالمرحلة الابتدائية وعلى اوج المرحلة المتوسطة فوقه كذا اخ واخت
كان ولايزال يغار من اخوه الي اكبر منه ب 5 سنوات
علمًا ان اخوه الي اكبر منه بالمرحلة الثانوية
الي اكبر منه كلهم يمتلكون اجهزة ومفتوح لهم الانترنت 24 ساعة وكلن ومجاله
اخوي هذا محد متفضي له الوالدة موظفة وابوي نفس الشئ
امي ترجع تعبانه من شغلها وهو فعليًا متعب بينما ابوي دوامه طويل
اخوي وللاسف جدًا ثرثار وزنان فوق الطبيعي فامي عشان مايرتفع ضغطها تعطيه الي يبيه
بالتالي هو سبح وتعمق في عالم البلاي ستيشن فيكلم الي يعرف والي مايعرف كبار كانو او صغار
يشوف افلام للاسف كبيرة عليه فتعلم الفاظ وحركات لاترضي الله ولا رسوله
يعلم اخوانه الي اصغر منه حركات جدًا نتنه ومقززه
يكذب الكذب عنده مثل السلام عليكم
كنت انا كأخت كبيرة محتويته من المهد لين عمر 9 سنوات
نفسيتي بذاك الوقت تعبت بشكل مخيف
انسان مايسوي اي شئ الا بالاجبار حتى الحنية ماتجي معاه
التسبيح والترتيب والتلبيس والمأكل والمشرب والمذاكرة وو و و , ابسط الاشياء مايسويها
غير اني لو ابي اعلمه واربيه يعتمد على نفسه مثل ماقلت يثرثر بشكل يفقد الواحد عقله
بالتالي امي تنزعج من كلامه معاي وتقوم هي تسوي الشغل الي مفروض هو يسويه
يومي 24 ساعة كان 3 ساعات له يوميًا اشيك على نظافته مذاكرته اضطر اترك اختباراتي بعض الاحيان عشان احضر له دروس بكره
بس هالاشياء هو مايهتم فيها يعني هو مايهمه نظيف او لا ذاكر او لا وغيره كثير ففكرت اتركه لانه مهما ازين يجي شخص ويوقف بطريقي رغم اني صابره بس الناس الي حولي مايتحملون كلامه والزن الي يجي منه
شفتوا الشخص الي يتعب تعب لسنين طويلة ومافيه بوادر تقبل او تغير ! بالضبط هو كذا فشفت اني اعبي قربه مشقوقة فتركته وانا مقتنعه 100>#/p###
مشاكلي مع اهلي امي ابوي اختي كلها بسببه ولاني غالبًا ادافع عنه في وقت ضغوطهم النفسيه من الشغل
اخوي الي اكبر منه انسان طيب لابعد درجة لكنه قدوة سيئة صحيح غير مجتهد ولايتحمل المسؤولية و24 ضايع بوسائل التواصل الاجتماعي
ومع ذلك امي تلاحقه هو ودروسه ملاحق مستعده تدفع دم قلبها عليه
لذلك اخوي الصغير يغار منه في اكثر من ناحية
واكتشفت انه مدمن على السوني ادمان السجاير ادمان كامل متخيلين لو نحدد له وقت ينهار يصقع نفسه يضرب نفسه ينهبل شئ موطبيعي
يحس انه متمع جدًا لو مسكه طول اليوم
حددنا له وقت بشرط يعزل ويذاكر ويحل الواجبات اكتشفنا انه كاذب يحل اول اسبوع ثم يسحب
كتبه كلها ملاحظات المدرس
ممشينا للاسف على مزاجه يقول لنا الاختبار من هنا الى هنا وبس من التقاويم وهكذا وبالاخير ننصدم انه جايب درجات متدنية جدًا
احنا موفاضين نلاحقه طول العمر ما ارجع من جامعتي الا العصر ونفس الشئ اختي وامي ترجع تعبانه
ومن جهه ثانيه قلبي متكدر من نظرة اهلي لهم انا واختي كنا البكر وومشينا على الصراط والله اثمر فينا اعتمدنا على انفسنا في وقت مبكر
اجتهدنا وعرفنا مصلحتنا عمر امي ولا ابوي علمونا الشئ الي مفروض نسويه لانهم اعطونا الثقة من الصغر وعاملونا ك كبار
بينما الي تحتنا شئ لا يحتمل ولايصدق والمشكلة الاعظم انهم مقتنعين ان البنات هم سبب الفساد فلازم لهم حزم بينما الاولاد مجرد وقت ويرجعون لصوابهم
فيتعاملون مع مشاكل اخواني كانها ماصارت
انا ممتنه لامي وابوي كثير لولا الله ثم تصرفهم ماوصلت للي وصلت له
بس بعد يهمني اخواني اتمنى ابذل فيهم مثل ما اهلي بذلوا فيني بس اهلي وصلوا لمرحلة الاكتفاء وخلاص طفشنا وزهقنا جتني فترة زعلت على اهلي كثير وقلت وقتها الى موفاضي للتربية لاعاد يخلف وفعلًا صرت اقولها طالعة نازلة بس بعدين عرفت انه وش الفايدة من الكلام!!
فيه موقف حدث البارحة وجن جنوني وقتها من اخوي الصغير لانه سواها لاخوي الي اصغر منه
فجلست استرجع كل شئ صار كل شئ سلبي كان يسويه فاتخذت اني اشيل السوني بكبرة وابيعه لانه سبب التفلت الي هو فيه
تبون الضرب؟ ابوي ضربه لين حب الارض
بالنسبة للحرمان مجرد كلمات توعدني فيها امي وانها بتسوي له وبتربيه و و و ومن يصدع راسها تعطيه الي يبي
فقررت اسحب السوني منه
نعتني بالظالمة وصار يشهق وكان احد قاتل له حبيب
وعدته اسجله باي شئ يبيه نادي رياضي فروسية تعلم برمجه اي شئ بس سوني ينساااه ومع ذلك رافض
فيه اشياء ماذكرتها وهي اننا نحاول نحببه بالقراءة عن طريق الاجبار وشفت انه طريقه موحلوه مع انها نفعتني وصرت اقرأ بس مدري احسه صغير على شعور مثل كذا
نفس الشئ هو عصبي بشكل جنوني ويحب الانتقام وفيه شوي شلون اقولها (مكر) واناني جدًا وقادرة انه يوهمك بأي شئ لصالحه
غير انه مُتنمر عليه بالمدرسة ويصيح كذا مره من الاولاد الي يضربونه
لوصلنا للحقيقة وسألتوه تتوقع اخوانك وخواتك يحبونك بيقول لا وهو مصدق تمامًا لانه يتعبنا معاه ويسوي اشياء بالخلسة ويظن اننا مانعرف بالتالي احنا نتنرفز وبلاشعور نتلفظ مثل هالالفاظ : انت مجنون موصاحي غبي نكرهك انت مفروض ماتكون اخونا ليتك تموت ونرتاح
ادري انها جريمة وجريمة شنيعة بس ارجوكم تخيلوا معاي قبل لاتكتبون لانه فعلًا انا في مرحلة اتخاذ قرار هل اتركه ترك نهائي ولا اصر باني اسحب السوني واعوضة برياضه تفيده
غير انه مليون مره تكلمنا معاه انا امي ابوي وكذا مره سوينا عهد وميثاق معاه ودائمًا منه ينكسر
غير انه يوعدك ويوعدك وتحسين فيه بوادر خير ثم فجأه يصدمك لو اسوي كل هذا بترجعين لي السوني؟ او بتعطيني السوني 24 ساعة!!

*اخوي يحس ان السوني واليوتيوب حق من حقوقه كبشري وحاجته له كحاجته للشرب والاكل
*اشك في ان هالكلمات تأثر فيه لانه يتكلم بشكل خارق ولايحسب حساب كل كلمة يقولها
*صحيح القدوة بالبيت تعبانه خاصة امي وابوي واختي واخوي 24 على اجهزتهم بس مستحيل اغير هالشئ اذا هم مابغوا بس بالجانب الثاني غالبًا اكون اقرأ او على دروسي ونادر وقليل استخدم الانترنت للمتعة + ما اقدر اخليه معاي ونتسامر انا وياه لاني جربت وضاع يومي في الكلام معه لانه ثرثار جدًا
*الاقارب مجتمعين انه انسان صعب ومثل ماذكرت من صفات فوق لانه عندنا شخص بالعائلة كذا ونتوقع انها وراثة
*اخوي هذا تشكين انه طفل لان ماشاءالله كلامه واسلوبه كبيرين على عمره
*صدقوني انا كنت اتمنى اكتب لكم مو هالسنة ولا لاي قبلها انما قبل قبلها بس لاني حبيت اجرب كل الطرق الي مفروض اجربتها
انا انسانه اؤمن ايمان تام اني صفر بالتربية وغير كذا ما اصلح ابدًا ابدًا لا اكون ام
اعرف يقينًا ان التربية صعبة صعبة صعبة جدًا بالتالي لو فكرت اتفرغ لها مستعده اترك دراستي واقضي طول عمري اربي بمعنى اني اشوف نفسي واربي في ان واحد استحاله حتى وان صارت فماراح اعطي احد الاطراف حقه
لا احد يلوم امي رجاءًا كلنا نخطئ وانا عارفة انها المفروض تربي لكن امي مبتلاه بهم اكبر اسأل الله العظيم ان يكتب اجرها ويعفو عنها
وصل اللهم وبارك