هل ممكن الحظ يتعدل والا المقرود يبقى مقرود

السلام عليكم
انا ضايقه فيني الوسيعه مااعرف اذ بتستمر حياتي بهالشكل ..انا يابنات كنت اتعنف من اهلي انضرب (بسبب وبدون سبب) على كل كبيره وصغيره كنت انضرب حتى انزف او يطلع لي كدمات او حتى يغمى علي للاسف الضرب من امي وابوي وانا كنت بكرهم(بنتهم الكبيره) ضربهم كان في طفولتي ومراهقتي..كانوا اخواني وخواتي اللي اصغر مني يتعاملون معي مثل مايعاملني ابوي او امي ولا احد كان يعاقبهم او يحاسبهم وياويلي لو انطق بحرف..النتيجه اني كنت اجلس في غرفه اعزل نفسي عنهم على اساس يرتاح جسمي من الضرب شوي وليتي كنت ارتاح ..المهم وقتها انخطبت ووافقت بدون تفكير لاني ابي الخلاص ..وتزوجت ومع مرور السنين عرفت ان زوجي مو بعيد عن اهلي نفس المعامله تقريبا وخاصه انه عارف ومتاكد ان ماوراي سند ..طبعا زوجي في منطقه ثانيه ومااشوف اهلي الا مره في السنه اسبوعين اجلس عندهم علشان الناس بس..والا اهلي زي ماهي المعامله معاي ومع اطفالي صحيح الضرب من امي وابوي شبه اختفى لكن المعامله شينه مثلا يقابلوني عند الباب وقدام زوجي ليش جيتي كلمينا بالشهر مره يكفي المفروض ماتنامين عندنا عساك ناويه تطولين و..و.. اما اخواني تشربوا وتربو اني انضرب قدامهم وهم صغار الان مايتعاملون معاي الا بنفس الاسلوب اسلوب الضرب والزجر..انا لاموظفه ولا شي لكن قبل لا اجيهم اجيب لهم افخم الهدايا كمحاوله لكسبهم احيانا ابيع من ذهبي علشان اشتري لهم ..اطبخ واساعد وارتب وانا اللي اداري عيالي كل هذا علشان لا ازعجهم او اكلف عليهم لكن للاسف..بالمقابل اختي اللي اصغر مني تجي هي وعيالها والكل يخدمها ويخدم عيالها ويستقبلونها احلى استقبال لان زوجها خويهم وام زوجها صديقه امي..انا ماابغى منهم شي بس ابي احس ان عندي اهل يشتاقون لي ويفرحون فيني..خواتي ينخطبن ويتملكن ماادري والله الا من الناس..اذا رجعن من السوق وانا فيه سكرن على بعض في غرفه علشان مااشوف مشترياتهن..حاولت اتقرب لخواتي بكل الوسائل والطرق لكن للاسف مافي فايده الا اذا يبن خدمه مني والا طلب سبحان الله يقلبن 180 درجه مجرد تخلص مصلحتهن يرجع الوجه الاصلي..لاااحد يسالني وش السبب لاني انا مااعرفه ..لكن غالبا ارجعها بسبب معامله امي وابو ي لي لما كنت مراهقه..انا اتوقع سبب ضرب امي وابوي لي انهم كانوا كارهين بعض وكذا مره يتطلقون بس يرجعون علشاني لاني بكرهم فكل واحد منهم يشوف اني انا السبب في تعاستهم حسب ماكانوا يقولون لي...انا مااعرف كيف اتصرف وكيف اواسي نفسي واسعده لا اهل ولا زوج ولا وظيفه..وزوجي مانعني اعرف جيران او صديقات..دورت وظايف في مدارس اهليه مافيه وحكومي كل سنه اقدم ومالي نصيب ..ابس فلوس احس لو معي فلوس عزيت نفسي ولا سالت لا عن اهل ولا عن زوج..لو عندي فلوس اخذت لي شقه واستقليت عنهم كلهم ادعولي يابنات اتوظف والله اني تعبت