هل موضوعي يستحق الطلاق : (

السلام عليكم اخواتي

ابي احكيلكم عن سالفتي مع زوجي عشان انا بديت افكر بالطلاق وابي توجهوني
متزوجين من سنه و ٧ شهور وماعندنا اطفال
زوجي راتبه كويس لكن كله قروض زواج سياره وايجار ويصفى لنا حول ٤٠٠٠
هو كريم لما يكون معه ويعطيني لكن لاحظت من بعد فتره وقفت اطلبه واخذ من فلوسي
صار مايعطيني مع انه بالاساس مو ممشي لي مصروف لكن لاطلبت يعطي وانا غبيه
ماكنت اطلب كل شهر مع ان عندي نواقص لكن ابدي امور البيت على اموري
بعت من ذهبي عشان اساعده بسياره والحين طلبته الف عشان عرس اخوي
اشتري بها فستان و اروح به الصالون وتخيلوا عاد ان الباقي بكمله انا لان اكيد مايسوي شي هالمبلغ
لما طلبته هالالف قلب وجهه علي اليوم كله ولايكلمني وينافخ علي
و بس ينزنق بشهر يقول بوديك عند اهلك اسبوع او اسبوعين ( اهلي بمنطقه ثانيه )
عشان مصاريف الاكل وكذا تاخذ ميزانيه وربي مصدومه منه
مو حاسه باستقرار معه حتى صلاته لكم عليها يجلس عالتلفزيون والصلاه تقوم وادعيه لها
ولايتحرك الا بعد ماتخلص يتاخر عنها وكذا مره يفوت ..

ماكان يطالع بالحريم وكنت اشوفها ميزه فيه الحين صارت عينه زايغه و ٢٤ ساعه على وناسه
غير انه مهمل بالبيت يمشي ويخرب مثل البزارين حتى منديله مايشيله من وراه
ومهمل بنفسه
وصاير عجاز والشغله الي ابيه اشحته شحاته لما تجي
ولاعنده طموح بالحياه غير التسدح والاكل وانا عكسسسه مره طموحه وابي اكمل دراسه
ماعمره مسك جواله واتصل يسلم على امي وابوي لازم انا اقوله واهله اتصل فيهم وهم ساحبين
عليييييييييي قسم بالله كرهته وكرهت اهله ماعاد اطيقهم..
انا مو كبيره توي ٢٥ والحمدلله مو ناقصني شي من جمال واهتمام ونظافه بيت يمكن مقصره من ناحية الطبخ لكن اسوي الي اقدر عليه وهو ميزته الوحيده انه مايهتم طبخت او لا يجيب من برا وكذا

افكر انفصل عنه جديا لاني تعبت واحس ضيعت عمري معه ماكنت اطلب اهلي قبل والحين بس امي تحول لي وكانها حاسه كنت اهتم بشكلي باي زياره والحين صار وضعي مزري وكأني عجوز

مره حزينه على حالي
وجهوني هل انا مكبره الموضوع ولا الموضوع فعلا يستحق التفكير بالانفصال
‏‫