هل هذا الرجل صالح بنظركم؟؟ أفيدونا أفادكم الله !!!!

السلام عليكم ورحمة الله وبركاته ،،،،،

أخواتي ،، هذي مشكلة صديقتي وأنا استأذنت منها بإني أعرضها عليكم لما شفته من حكمة واتزان في نصايحكم وأحكامكم ،، أرجوا إنكم تساعدونها لأنها فعلا بحاجة إلى النصح والمشورة ،،،



البنت عمرها 27 ،، جامعية وملتزمة وتعمل في إحدى الدوائر الحكومية والوظيفه فيها اختلاط مع الأسف ,,,

الحكـــــــــــــاية

لما بدت الوظيفة حست إن أحد زملائها في العمل مهتم فيها كثيرا ،، ويختلق الأسباب عشان يكلمها ،،

بعد فترة ،، زميلته في القسم (فتاة مشهود لها بحسن الخلق) حاولت تتعرف عليها وصاروا أصدقاء ،، وكل شوي تتكلم عنه وتذكره بالخير وتمدح فيه ،،،، فهي استنتجت إنه هو اللي أرسلها عشان تكون الوسيط بينهم ،،

هي حاسة ان الرجال معجب فيها وناوي يخطبها ،، وما يقصد يلعب عليها ،، والدليل إنه كلم زميلته عشان تلعب دور الإخت ،،


لأنها ما تعطيه وجه هو حس انها مب مهتمة ويت فترة وبعد عنها بكل هدوء ،، وزميلته بدت ترمي كلام بما معناه ،، على شو شايفة نفسج!!! ظروفج مب أحسن من ظروفه عشان ترفضينه !!!!!!!!!!!


مواصفـــــــــــــاته
ملتزم ومحترم ،، في أواخر العشرينات ،، جامعي ،، يحسسها بالاهتمام ،، وعلى ما يبدو إنه حالته المادية متواضعة ،،منصبه مب كبير لكنه طموح ومكافح ،،


عيوبـــــــــــــــــــه
إنه يحاول يكلمها ويخلق حوارات معاها وهي ما تحب هالنوعية من الشباب ،، ودايما يحاول يبين نفسه مهم جدامها ويقول المدير كلفني بهالشي ،، ورحت عند المدير ،، وييت من عند المدير ،، الخ

وأكبــــــــــــــــــــــــــــــر عيب ،، انه على ما يبدو كلم أصدقاءه في الدوام عن اهتمامه فيها وانه ناوي يخطبها ،، وفي مرة من المرات حست انه يراقبها ويرمقها بنظرات في حضرة زملاءه ،، ولما مرت واحد منهم قال بنبرة سيئة "هااااااااااه فلاااااااااااااان ،، شخبااااااااااارك" ،،

وفي ناس يذكرونه جدامها بمناسبة أو بغير ماسبة عشان يشوفون ردة فعلها يوم ينذكر اسمه ،، لدرجة إن البعض يسألونها أسئلة عشان يتأكدون إذا الخطبة تمت ولا لا!!!!!!!!!!!!!!


نصيحتي لها
قلت لها إن الرجال اللي يحترم البنت يخطبها على طول من غير لف أو دوران ،، وهو قلل من احترامها لما خبر الناس وحطها في هالموقف قبل لا يصير أي شي رسمي ،،


رايها فيـــــــــــــــه
هي مستمتعة باهتمامه مع انها ما تبين له هالشي ،، مب منجذبه له وايد ،، لكنها تحاول تقنع نفسها لأنها مب صغيرة ،،، والرجال مواصفاته جيدة ،، وهي تبي الستر أولا وأخيرا ،، ودايما تقولي انه إنسان طيب وزملاءه يحبونه ،،



استخـــــــــــــــاره
نصحتها بالاستخارة وخذت بنصيحتي ،، وبعد الصلاة على طووول ابوها جا عندها وقال لها بكل حماس انه حلم بأن أحد الحكام المعروفين كان جاي يزورنا زيارة ودية في البيت لكنه طلع قبل لا نضيفه !!!!






هل الرجل صالح بنظركم؟؟

وهل أسلوبه في التعامل مع الموقف يغتفر؟؟



أفيدونـــــــــــا أفادكـــــــــــــــكم الله