هل يحق لامي تسوي هالشي عشان خاطر ام زوجي؟

لي خمس سنوات متزوجه وساكنه مع حمولتي بنفس العماره
بيتي يبعد عن بيت امي مده ساعه ونص الى ساعتين يعني عشان اروح لامي او هي تجيني يعتبر سفر
امي وخواتها من النوع اللي يجون مع بعض ويروحون مع بعض
الزبده من خمس سنوات وامي ما تجي بيتي الا للشديد القوي طبعا شي عادي لانو البنت هي اللي تزور امها مو العكس لكن المشكله انو امي وخالاتي يضربون مشاوير قريبه من بيتي ويقطعون كل هالمسافه عشان يزورون قرايب لنا ساكنين قريب مني مثلا او عرس لقرايبنا والقاعه مثلا قريبه من بيتي والسبب الاكبر من خالاتي يقولون لامي عيب نزورها ومانزور ام زوجها هم ماقالوا بس تكرار نفس التصرف خلال خمس سنوات خلاني افهم
بتقولون طيب ليه مايزورون ام زوجك ؟ يعرفون ان ام زوجي ماتحب تستقبل زيارات وكذا فيراعون رغبتها يقومون يطنشوني بسببها وعشانها ! طيب هي ماتحب الزيارات المفروض خلاص تعاملون كل انسان على قدره وقيمته واطباعه ومكانته مو عشان تخافون من فلانه تدعسون اللي يحترمكم واللي له حق عليكم !

خالاتي كبيرات بنفس عمر ام زوجي ويحسبون لام زوجي الف حساب يخافون منها ويهابونها

حتى لو انا مريضه او حامل او فيني وش مايكون امي ماتزورني سواء لوحدها او مع خالاتي وبالذات لو مع خالاتي يمنعوها عشان ام زوجي لاتزعل وتقول زاروها ومازاروني طيب هي كارشتكم وماتبي زيارات بدال لاتجوني وتعزوني وترزوني تسوون لها قيمه اكثر مما تستحق وتطنشون بنتكم عشان خاطرها؟
زوجي وامه ملاحظين ومستغربين وسألوني اكثر من مره وين امك وخالاتك مايزورونك ؟ والادهى يوم امي وخالاتي يجون مناسبه قريبه من بيتي وثاني يوم خالاتي يتصلون على ام زوجي يعلموها اننا امس كنا قريب منكم وما حبينا نزعجك ونزورك تقوم ام زوجي تهزأهم تقولهم وبنتكم طيب؟ خالاتي مايردون ! طيب فاضحيني بقطاعتكم اقل شي استروا علي واحفظوا مويه وجهي قدام زوجي وامه عالاقل! لاتحسسوها انكم كنتم قريبن مني وكرشتوني

وربي مره زوجي وصلت فيه للاخر قال وش امك وخالاتك مايحبونك ولا شلون؟ كيف يجون قريب منك ولا يفكرون يطلون عليك؟ زوجي وامه حقانين مررره مايحبون الغلط

تخيلو اني حامل بالثامن ومن اول يوم بحملي مهدده بالاجهاض لولا ستر ربي وتعبانه تعبانه كاسه المويه ثقيله على يدي وزوجي دوامه من 8 صباحا الى 8 مساء وطول هالوقت لوحدي بالبيت واهلي يعرفون هالمعلومه من خمس سنوات لكن امي ماتحس واقوم اليوم من نومي و اكتشف ان امس امي وخالاتي كانو على بعد 10 دقايق من بيتي كانو بالمول !! واليوم خالاتي متصلين مكلمين ام زوجي يتعذرون منها و قايلين لها كنا امس بالمول وكنا بنمر عليك بس ماحبينا نزعجك ! وانا وش موقعي من الاعراب ؟ لا يجون عندي ولا حتى ياخذون بخاطري ويتعذرون زيما يتعذرون من ام زوجي اللي راعبتهم والقهر ام زوجي تسأل زوجي هل خالاتها اتصلو عليها يتعذرون منها زيما تعذرو مني؟ عشان تبي تغسل شراعهم وانا اجاوب زوجي بالحقيقه لاتقولون اكذبي اذا انا كذبت خالاتي بيفضحوني بالحقيقه عند ام زوجي كذا مره واجهتهم ليه مقصرين مع بنتكم مايرودون ليه افشل نفسي واكذب على حمولتي وكل شي واضح؟
اقسم بالله العظيم مابيني وبينهم شي ولازعل ولا شي هم كذا معي من زمان حتى امي جافه مع من وانا بنت
وامي مقدر اعاتبها عصبيه راح تمسح فيني الارض وبتقولي وش المطلوب نجيك ونخلي ام زوجك ؟ طيب ام زوجي هي اللي ماتبي زيارات كيفها ليش تجمعوني فيها ؟ وش نظرتها لي بعد حركات امي وخالاتي؟

كم مره تكلمني وتقولي عيييييييييييب عليهم انتي بنتهم كيف ام ماتزور بنتها ؟ وخالاتك بعد عيب عليهم وزوجي بعد يهزأني يقول لو مايجون بالمره كان قلنا ظروف لكن يتعنون ويجون قريب منا مول ولا عرس ولا حفله وانتي مايفكرون يطلون عليك لو نظره؟
وبغض النظر عن كلام حمولتي انا نفسي ملاحظه انا مو طفله ما افهم

تخيلو بس عيد الفطر اللي فات امي و خالاتي تزاعلو مع ام زوجي قامو كالعاده امي وخالاتي مع بعض بأيام العيد يزورون الناس

تدرون وش صار 4 ايام العيد امي وخالاتي ماطبو بيتي مسويين قدر وحشيمه و خاطر لام زوجي انو كيف يزوروني ومايزوروها وحنا بنفس العماره!!! استثقلوها يزوروني ويطنشون ام زوجي!!! طيب ام زوجي اللي متزاعله مو انا ! وانا اقرب لكم منها انا بنتكم وش هالخوف والرعب من ام زوجي مدري
هذا وانا زي الخبله زرت خالاتي باول يوم وامي طبعا

المهم اول يوم العيد زوجي يسألني وين امك صرت ارقع من راسي وثاني يوم يسأل وين امك نفس الشي صرت ارقع ثالث يوم ورابع يوم صدمني قال تدرين ان امك من اول يوم العيد زارت بيت فلان ؟ وهالبيت بيني وبينهم ربع ساعه انا من سواد الوجه بغيت اموت ومقدر اكلم امي عصصبيه ياويل اللي يغلطها وتخاف من خالاتي وتسمع كلامهم
خامس يوم قرروا يزوروني قامو وش سووا ؟ ذلوا نفسهم لام زوجي وصالحوها بس عشان لايدخلون عندي ويطنشوها ..ودخلو بيتها هي اول بعدين دخلو بيتي !!! وقعدو عندها ساعه ونص ينافقوها وقعدو عندي ربع ساعه وهم طالعين من بيتي زوجي زعل على امي قال جلستي عند امي ساعه ونص وعند بنتك ربع ساعه ؟؟ امي تلعثمت ماعرفت ترد وانا لو تشوفوني يوم العيد وجهي اسوووووود طول العيد نكدوا علي وقلبي بينفجر من القهر الناس فرحانه وانا كني بعزا بس كاتمه عن زوجي لكن الشمس ماتتغطى بمنخل

لعلمكم العماره اللي ساكنين فيها انا وحمولتي ايجار لا انا املكها ولا ام زوجي تملكها عشان نقول والله البيت بأسم او فلوس الحموله ! كل ذا خوووووف من ام زوجي مسويه لهم رعب هي مأدبه ومحترمه لكنها هيبه وشخصيه حلوه لكن هل هذا مبـــــرر انو تمرمطون بنتكم وتنقصوا قدرها بسبب جبنكم منها ؟
وصلت مره انو ام زوجي صخنت مرره قامت امي تدق علي تقول تكفين نبي نزورها انا وخلاتك كلنا متفقين اسأليها اذا تقدر تستقبلنا !! الله واكبر انا امرض اروح الطوارئ احمل ولا حتى يفكرون اصلا يجون .. وبالذات خالاتي من عاشر المستحيلات يطبون عندي وهم اللي يفشلوني عند ام زوجي ويخرون لها كنا قريب منكم وكنا قريب منكم .. المهم ام زوجي كالعاده رفضت زيارتهم قالت انا مريضه مره !
وعندي كلام اكثر يخص هالموضوع اذا الله اراد اكتبه بمواضيع ثانيه الحين نفسيتي مدمره بالله عليكم وش رايكم بسالفتي ؟ اسألكم بالله تقولون الحق والصح واللي لو اختك بنت امك وابوك شكت لك بتردين عليها فيه