هل يعتبر ظلم

زوجي صحاني من النوم وطلقني بدون اسباب
وسألته وش انا مسويه لك
قال انتي اجوديه وبنت اجواد ومو مقصره معي بشي ونظافه وكل شي بس انا رجال عملي مو فاضي وعذره انه مشغول موفاضي
لي 11 شهر متزوجه
و
ثلاث الشهور الاولى طيب معي
بعدين اتغير 180 درجه
وصار يطفشني عشان اطلب الطلاق بطرق غير مباشره
ويهيني كثير انا كنت اقول
يمكن ضغوط عمل
يمكن عين
يمكن ويمكن
وصار ماينام معي
وينكد علي عند النوم وعند الاكل واذا جيت ازور اهلي واذا اخذني
انا صرت اشغل الرقيه الشرعيه بالبيت على بالي عين كنت ابرر افعاله
11 شهر كانت عن عشرين سنه من التجريح والاهانه والعذاب
كان مايطلعني ولا يتمشى بي ولا فيه مطاعم ولا فيه سفر ولا فيه زيارات للاقارب من اتجاهه
اذا قلت ودي اكشف يخاف يقول اذا براسك حمل اجلسي بدار اهلك واذا طاح اللي براسك تعالي
لسانه سليط جدا
لا يسأل ولا يطمن
واذا مرضت ممنوع المستشفى والله اشوف روحي تطلع من الالم
واذا كحيت او عطست يقول روحي بيت اهلك
دائما يقول لي ابتزوج من بعد الزواج بشهرين
ويقول ربي مغنيني وبدالك ثلاث
ويشهد الله ماقصرت معه وقايمه بكل واجباته ومحترمته وحترمه كل قرابته
المهم بعد 11 شهر زواج طفح الكيل عنده وقال انتي غبيه ماتفهمي
كل اللي كنت اسويه لك عشان تروحي
وانتي لاصقه فيني
او يمكن تخافين ترجعين فلوس المهر عشان كذا صابره بس روحي ماابغى منك ولا ريال


انا تحسبت عليه ودعيت قام يصارخ علي يقولي ماظلمتك اخذتك معززه ومكرمه ورجعتك معززه ومكرمه انا مارميتك بالشارع
وصار يبرر لنفسه انه مو ظالم ويقول لي ياويلك تدعين علي وشوي ويمد يده علي
كسر قلبي وهذا اول زواج لي وكسر قلب امي وابوي


اخذت بعض اغراضي
هل الاغراض اللي شريتها بعد الزواج والهدايا ملك لي ولا يرجع له لان من مصروفي اللي يصرفه علي
فكرت اخذ مفارش النوم واحطهم اقرب محرقه ماابغا اخلي شي انا مستعملته
دعواتكم لي الله يصبرني على مصيبتي ويعوضني خير
لي يومين من الطلاق المفاجىء لي ولاهلي والله احس بحرقه بالقلب واحس صدري مكتوم ولا اقدر ابكي واجامل بالاكل والنوم عشان امي وابوي مايضيق صدرهم
لانهم مايكلون الا اذا جلست على السفره
امي تفقدني كل شوي ودورني بالبيت
تنام معي بالغرفه رافضه تنام بغرفتها ياقلبي عليها ضايق صدرها ولا تنام باليل الا اذا نمت
وصرت امثل عشانها
بس ان شاءالله اصير قويه وهو مايستاهلني وفراقه عيد ولا يستاهل دمعه مني
انا صبرت عشان عندي امل يتغير بعدين قلت وش مصبرني على الحال جاني الضغط والسكر والقولون ومعدتب ماتتحمل الاكل غثيان 24 ساعه
اول الاسهر ادعي ربي يسخره لي بس الشهرين الاخيرات
زاد بالاهانه ويكرهني بنفسي ويعيبني والحمدالله الكمال لله بس حلوه وفقدني ثقتي بنفسي كل وقت يعيبني
وصرت ادعي ربي بكل صلاة وقول ياربي اكرهه اكرهه ياربي مايخافك ويعذبني يارب اذا هو شر لي ابعده عني
اتذلل لله باليل بس مرت اربع ايام وطلقني
بس مقهوووووووره موووووووووت
دعواتكم لي
دعواتكم لي
الله يسعدكم ويسخر لكم ويهنيكم ويحفظكم من شياطين الجن والانس