بنات نصيحه خلن عنكن التفكير السلبي

تفاءلن .. التفاؤل حلو

وكل وحده تحط في بالها إن لو كل الخريجات مب لاقيات وظيفه هي ممكن تلقى وظيفه لأن هذا رزق والأرزاق ما لها قاعده عامه

أقول لكم قصتي مع التخرج

لما كنت طالبه ما كنت أحاتي التخرج أبد وكنت عايشه أيامي مبسوطه وما أذكر إني فكرت أشتغل في مكان .. في بداية دراستي الجامعيه قلت باشتغل وأدرس (كنت أبي أسوي فيها سوبر ومان) قدمت في مكان ونادوني للمقابله وما رحت لأن كان عندي وقتها كلاس مهم .. وبعدها نسيت الشغل وظليت في الجامعه

كانت أيام حلوه.. دراسه وسوالف مع البنات ومرات تطنيش كلاسات وبروجكتات ومن جد استمتعت فيها وما شلت هم بكره

تخرجت والحمدلله.. وقعدت في البيت .. على فكره أنا وحده احب قعدة البيت يعني بيتوتيه بطبيعتي.. والوالده الله يحفظها تقولي ما بتقدمين ع وظيفه وربيعاتي نفس الشيئ يسألوني .. كنت أقول لهم خلوني أرتاح شوي .. يردون علي: اللي يسمعج يقول بتلقين الوظيفه بسرعه .. كنت أقول لهم لو لي رزق ومكتوب لي اشتغل الوظيفه بتجيني لعندي .. يقولون لي وانتي قاعده في البيت؟ أقول لهم إيه في البيت الله بيرزقني إن شاء الله

وبعد ست شهور من التخرج اختي جتني وقالت لي جاهم طلب من دايره من الدواير يبون موظفين يشتغلون قلت لها أوكي ونسيت السالفه ..

رجعت صديقي وكلمتني عن نفس الدايره بعدها بأيام وقالت لي خلنا نقدم .. قلت لها ما لي خلق أروح قالت تقديم الأوراق بالبريد.. قلت أوكي رحت جهزت السيره الذاتيه (اختكم في الله حتى السيره الذاتيه ما جهزتها) وجهزت أوراقي وعطيتهم الأهل يبعثونها .. وكان آخر يوم لتقديم الطلبات وتأكدوا إن الأوراق لازم توصل الدايره في نفس اليوم قبل الظهر .. وصليت ليلتها استخاره في هالوظيفه

اليوم اللي عقب ارسال الأوراق.. اتصلو علي وكان يوم الأربع قالوا السبت عندج مقابله.. رحت وقابلونا وكانت أول مقابله أسويها بحياتي وآخر مقابله وامتحنونا بعد وكان معاي بنات متخرجات قبلي بسنتين وثلاث ومعاي بنات معدلهم أعلى من معدلي .. الأحد الظهر دقوا علي وقالوا لي مبروك توظفتي عندنا

بنات والله فرحت يومها مب عشان الوظيفه قد فرحتي إن ربي رزقني وإن فعلاً اللي يحسن الظن بالله الله مستحيل الله يخيب رجاه وهالشيئ خلى إيماني يزيد أكثر بحسن الظن بالله وباهمية الدعاء، وترى الدعاء مره مفيد ولي معاه قصص كثيره والحمدلله

بنات عيشن كل يوم بيومه.. بكره في علم الغيب فلا تشيلون همه أبد

بالنسبه للزواج .. أكيد بما إني انسانه طبيعيه فمن الطبيعي إني أبي أتزوج.. بس ما يأست وإن شاء الله ماراح أيأس أبداً ومثل ما ربي رزقني الوظيفه وأشياء كثيره ودايم يفرج عني كل كرب يصيبني سبحانه وتعالى قادر يرزقني بالزوج الصالح.. المهم أكون متفائله دوم مب ثقه فيني أو في أي من الأسباب الدنيويه ولكن ثقه تامه في الله عز وجل

إن شاء الله الله يرزقكن كلكن الوظايف الزينه والزوج الصالح .. بس لا تشيلن هم بكره ولا هم الوظيفه ولا الزواج .. وإذا وحده جاها من ترضى دينه وخلقه تتزوج وتتكمل دراسه .. واللي بعدها ما جاها تعيش أيامها بتفاؤل تام

واللي تخرجت تشغل وقتها حالياً بالدورات ألين ما تتوظف خاصه إذا مر أكثر من سنه على تخرجها وتتطوع إذا هي حابه المهم لا تتشاءمن ووكلن كل أموركن على الله سبحانه وتعالى

والله اول متاخرجت كنت اركض ركض ابي الوظيفه وابي الخير

كانت هي همي الاول والاخير...

بس لي الحين اكثر من ست سنوات متخرجة بس وكلت امري لله بعدها..

ومتى ماكتب الله لي بتوظف بتوظف.. << ياحلوو القناعه ياناس...

والله بعدها ماصرت اشيل هم... ومتاكده ان ماصارت هالتأخيره الا لسبب يعلمه الله وفيه خير لي ان شاءالله تعالى...

الله يرزق الجميع رضاه والحصول على اعلى الدرجات في الدنيا والاخره..

الف شكر عزيزتي..

وموضوعك يستحق التثبيت..

انا تقريبا لي سنتين متخرجة من الكلية وما توظفت لكن عندي امل بالله صحيح الوظائف قليلة جدا بمدينتنا , لكن دائما اتذكر ان الأستغفار سبب للرزق وتفريج الهموم لذلك انصح نفسي واخواتي بالأستغفار ,,,,, خصوصا اننا من الناس اللي مايحبون الطلعات والروحات كل وقتنا بالبيت
لكن الحمدلله على كل حال .,,,, تبون الصراحة ابقولكم على سر حتى اهلي ما يعرفون عنه شي انا اتمنى اني اكون داعيــــــة ما احب اكون مدرسة احب ان ادل الناس إلى الله
اريد ان يثقل ميزاني يوم القى الله عزوجل يوم القيامة بأعمال لم افعلها وانما من اشخاص تابوا او اسلموا على يدي ولكن بيئتي تثبط من عزيمتي .... فلله المستعان