هم الناس صاروا الحين كلهم كذا وإلا هذولا بس اللي حولي ؟؟؟؟

بسم اك لله الرحمن الرحيم ....

السلام عليكم ورحمة الله وبركاته.......

صباح / مساء الخير.....


ياحوائيات نوروني هم الناس فعلا صارت زي ماراح أكتب لكم في الموضوع أو هالعينات بس حولي ؟؟؟؟

المهم خلوني أبدأ :

وحده تصديقتي تقول أختها دخلت دورة كمبيوتر ولا علمتها إلا يوم رسبت في الاختبار النهائي حقها ..!!! لا وتقول بقواة عين لصديقتي ترى أنا أختك علميني لو بتدخلين دورات أو بتتوظفين أو ..!!!!!!


وهذي عاد وحده من صديقاتي مرررة طيوبة جد بس شكل هالوقت ماينفع الطيب المهم حصل لها موقفين جد لاتحسد عليهم :

أخوها عنده أولاد ثم طولت زوجته ماحملت سنين ..ثم ربي رزقهم بطفل ولما صدبقتي كلمت تبارك لهم قال لها مانبي أحد يزورنا كفاية التلفون و...و....والولد بيتمم سنة الحين ماشافوه عماته وعمامه لليوم هذا !!!!!!!

وهي نفسها تحكي لي أختها عزباء في بيت أهلها فرشت لها غرفة نوم جديدة وقفلتها ولا ورتها إياها مع إن صديقتي جابت لها هدية لغرفتها أوعطتها إياها وهي تقول لها اعذريني ترى ماني عارفة لون غرفتك فاضطريت أجيب الهدية لون محايد يركب على كل شيء حتى تناسب غرفتك ...ومع ذلك هالأخت أخذت الهدية بقواة عين ومااستحت ولا ورت أختها غرفتها لليوم !!!!!!!!


ووحده من قرايبنا أعرفها شخصيا والله تحكي لي إنها كلما حملت علمت أم زوجها وخواته وكانوا يفرحون بسواتها ذي ويقولون للناس إن صديقتي مستحيل تحمل ولاتخبرهم لكن يوم تزوجن خواته حملن ولا علموها ...لا ولما عاتبتهم صرفوا السالفة ورجعوا كرروهافي سنوات ثانية وحملوا ولا علموها بعد ولا كأنها كانت تعلمهم قبل !!!!!


ووحده ثانية بعد صديقتي الله يسعدها متزوجة ولد خالتها وحملت واستأذنت خالتها تبي شغالتها تجي تنظف ساعة أو ساعتين في شقتها لإنها تعبانه من الحمل وتعذرت خالتها إن اللي موراضي هو زوج الخالة اللي يصير عم الحامل أبو زوجها فهمتوا علي ...فراح الزوج واستأذن أبوه إنه بغينا الشغالة مرة وحده لساعة أو 2 نبيها تنظف الشقة الحامل ماتقدر وتفاجأ الزوج إن أبوه ماهو رافض ولايدري بالسالفة أصلا !!!!
ثم راح الزوج قال لأمه خلاص أبوي وافق راح ناخذها تنظف ونرجعها قامت أمه قالت : لا هذي خدامتي ومابيها تروح عندكم !!!
بينما لما تزوج أخوه الثاني زوجة ماتقرب كلش لهم وحملت وطلب أخوه الثاني من أمه شغالتها عادي خلتها تروح ولما تكرر الأمر الشغالة رفضت ماتبي تروح تنظف بيتين قامت تنكدت الخالة وكارهه رفض شغالتها !!!!!!!ما كأنها قبل هي اللي رفضت روحة شغالتها لبنت أختها اللي هي زوجة ولدها الأول من سنوات !!!!!!!عجيب والله ناس وناس...!!!!!!!

علشان هذا كله يابنات حسيت ن الزمن هذا الغالب صار شايل همه وشاري راحته حتى لو كان على حساب صلة الرحم ..أو الأعراف الاجتماعية ...أو حتى على حساب الاحترام اللي مفروض يحكم علاقات الناس ببعض !!!

فأفضل شيء للوحده هالوقت تركز على نفسها واحتياجاتها ونفسيتها فلاتجامل أحد على حساب رااحتها ولو كانت متزوجة لاتستحي تبدي مصلحتها وزوجها وعيالها على كل أحد لإنه ماراح ينفعها بعدين اللي تعبت تداري خواطرهم وتركض توجبهم وتستحي منهم ....ماحد جايب خبرها أصلا الله المستعان ...


الحين ياحوائيات أبي رايكم في اللي كتبته ...ووش رايكم في الحل اللي كتبته في نهاية المقال(( اللي باللون الأحمر )) ؟؟ الصراحة بالنسبة لي( كوني شفت اللي حولي وتصرفاتهم ) للحين أجاهد نفسي وأحاول بالغصب أتأقلم أبي أصير مالي شغل بأحد ولا أقدم مصلحة أحد على نفسي وبيتي وكتومة على أخباري بس والله صعب ...صعب ....بس الله يقدرني عليه وارتاح جد ....ماحدن داري عني ومقدمني على مصالحه ....ادعوا لي ربي يقويني وأقدر ....

وخلوني أشوف مداخلاتكم أسعد بآرائكم ونصحكم جد .....