اليوم : السبت

التاريخ : 27من جمادى الثانى .

ورد الحفظ : وجهين من سورة الأنفال بفضل الله تعالى .

ورد المراجعه : وجه واحد فقط من فصلت بتوفيق الله ومنه .سأحاول فى إتمامها اليوم بإذن الله تعالى .



مرحبا هذه الدنيا :

أين كنتى فى الفترة السابقه ؟ اشتقنا إليكِ كثيرا .

وفين وردك يا جميل .

فكرتك جميله جدا .لكن هانكلفك انتى تبدأى الموضوع ده .

إيه رأيك تعملي موضوع خاص به .

وتحطى الرابط هنا ونستفيد كلنا به ؟؟

ياترى في خطه ليكِ للحفظ ولا لاء ؟؟

لو تايهه ولا حاجه أنا تحت أمرك .

ممكن تفكرينى بمقدار حفظك ونحاول ننظم جدول مع بعض.

يالا منتظره ردك يا قمر .


خوله :

فينك النهاردة ..حسيتك مهمومه ولا حاجه .

مش زي عوايدك . وحشنا كلماتك المشجعه .

جميل إنك تذكرينا بأحاديث وكلام قيم .

لكن المرء يحتاج لمن يتواصل معه كلاميا .

بارك الله فيكِ وفرج عنكِ كل الأحزانِ والهموم .

خالديه وبس :

أنا منتظراكِ هنا . يا رب ينور جدولك وهمتك معانا .

أنا واثقه إنك هاتتواصلى وتحفظى القرآن بهمتك بإذن

الله تعالى .

أين باقى الأخوات ... هل سافرتم جميعا ؟؟

يا رب ترجعوا بالسلامه وتكونوا فى أحسن حال وصحه .

أتمنى أن تكونوا جميعا بخير وأن تعودوا مرة أخرى لنا .

أختكم *هبه* .

السلام عليكم اخواتى الحبيبيات فى الله
اولا شكرا ليك يا هبة على اهتمامك
و الله انا فاض بيا يا هبة

بنتى يارا 4 سنين و 9 شهور تقريبا هى كانت فى كى جى 1 و انتقلت ل كى جى 2 بس مدرسة لغات و متاخرة شهرين و نصف
و هى كان بقالها فترة قاعدة فى البيت فنسيت يعنى ايه تحل واجبات و تخلص الصفحات بسرعة
مشكلتى انها دخلت من 10 ايام متاخرة شهرين و نصف
وواخدين كتير قوى فمش ملاحقة عليهم و هى بتاخد من 10 الى13 كلمة يوميا انجليزى جداد و مفروض كمان اراجع القديم
و هى لو تحل الواجب من غيرخناقات و تضييع وقت تاخد 3 ساعات و تقعد باقى اليوم فاضية و بناخد استراحة نصف ساعة او ثلاث ارباع ساعة مسموح تلعب و تلفزيون او تلون و لما تخلص جايبالها جليتر و فوم و فلين و مستلزمات اشغال يدوية و قص و لصق و بنخرج لو بدرى

و انا اساسا من اعداء الضرب و هى ما كانتش كدة
ووالله مانا عارفة اعمل ايه معاها انا نفسيتى تعبت و بازعق و بافوت و هى بقت مقرفة و خناقات مع الصغيرة سنة و نصف حاجة تطهق

و بقالها يومين بترجع عاملة كاكا على نفسها لان مفيش عاملة و هى مابتعرفش تشطف نفسها

انا عارفة انها معذورة و الجو جديد و مفيش غير مدرسة واحدة بتتكلم عربى و الباقى انجليزى لانهم هنود

و هى كانت شاطرة فى الحضانة و المدرسات عارفينها و بيموتوا فيها لانها شاطرة و مؤدبة هى عموما ملفتة للنظر و بتحب تظهر بكلامها و مجاملاتها

و هى و الله معذورة متاخرة و المدرسة ماتعرفش انها اصلا شاطرة

بس اعمل ايه انا كمان باحاول الحق الامتحان

و هاحاول بكرة اجرب حل جديد انى هاروح المدرسة واخدة بنبونى للاببلة عشان تشجعها بيه لو جاوبت
كمان هاخد هدية صغيرة الابلة تديهالها عشان هى شاطرة و بتحبها و مؤدبة و هاعرف المدرسات عليها بحيث يكلموها و تحس بالالفة المعدومة
و انتى لو عندك اقتراح يا هبة قوليلى و باستك العافية
انا زعلانة اكتر منك عشان باضربها و باهددها لانه اسوأ اسلوب ممكن استعمله بس اعمل ايه؟
على فكرة هيه هتاخد اجازة 3 شهور بعد الامتحان فى 7 يوليو و هاخف عليها الواجبات شوية بس هنستمر فى المراجعة

و عموما انا حفظت سورة نوح الحمد لله
و ربنا يعيننى
و تمنياتى للجميع بالتوفيق

انا سوف اشارك معكم في الحفظ وانشء**** احفظ معكم لكن اعاني من تطبيق الاحكام

أولا عذرا لم استطع المراجعه أو الحفظ . إظاهر عشان العذر الشرعى:angry: .

إن شاء الله أحاول بكرة بإذن الله تعالى .

ثانيا :

أرحب بالأخت الجديده نتراا أختا لنا فى الله . زادك الله حفظا وحرصا على حفظ كتاب الله عز وجل .

وبالنسبه للأحكام ممكن تشتركى فى أى حلقة تجويد تبع المنتدى هنا أو تسمعى

شيخ وتقرأى بطريقته . وأكثر من نصحونا به هو الشيخ إبراهيم الأخضر .

نتمنى لكِ التوفيق والثبات .

لا تحرمينا من جدولك اليومى معنا .




ثالثا : ردى لأم يارا :ا


اللي فهمته منك إن بنتك ،حولتي ليها من سنه ل سنه بدون حاجه لهذا .

أو من مدرسه لمدرسه أخرى .والله ثم والله إن بنتك زعلت عليها كثير وحسيت

إن البنت مضغوطه نفسيا من جميع الجهات .

يعنى بنوته شطورة وأمورة دخلت مرة واحده صف أعلى من قدراتها أصلا .

وحاسه بدخولها للصف ده إنها لم تعد متفوقه .

وبدأت تشك فى قدراتها أصلا .

على فكرة ما تفتكريش إن حل الواجب سهل عليها .

عارفه ليه ؟؟

لأن الطفل اللى بيدرب على كتابة الحروف ،

وبعدين نسى كتابتها ،

وبعدين مرة واحده بأه مُطالب بكتابة

الكلمات والجُمل ،

دى من أصعب الأشياء .

إنتى كده بنتك هاتطلع خطها وحش جدا

واستيعابها كمان ضعيف .

صدقينى أنا بناتى اختلف عليهم

الأمر من 4 سنوات إلى 5 سنوات

إلى 6 سنوات .

أصابع الطفل تختلف عن أصابع الكبير .

مخ الطفل فى استيعاب الأحرف

يختلف عن مخه فى سن استيعاب

الجُمل والكلمات .

لو عاوزة تكملى لها فى الصف ده يبقى

لازم تفهميها واحده واحده كل اللى

فاتها وتمشى الشهر ده بدون ضغط أبدا على بنتك .

وكمان جو المدرسه متغير عليها . لا صاحبتها هما هما .

ولا المُدرسه هى هى .

وكمان بدأت تفقد الثقه فى نفسها بسبب عدم وجود عامله لها لترشدها لإستخدام الحمام .

وأكيد بتتعرض لسخرية من أحد هناك كمان .

وغير ده كله ماما مشغوله بحد تانى عنى . مشغوله بأخويا الصغير .

وكمان ماما مش مقدرة كل الضغوط النفسيه اللى عندى وبتلزمنى بأشياء أكثر بكثير من قدراتى .

ما تزعليش منى ياأم يارا .

بنتك محتاجه لحنانك أولا وتقدير حالتها النفسيه ومحاولة توضيح لها إن كل الظروف اللى بتمر بيها

مش هى سبب فيها ، ده السبب هو كل الأمور اللى شرحتها ليكى دى .


كل المحفزات اللى انتى عملتيها لبنتك ممتازة جدا .

لكن لازم تفكرى فى نفسية بنتك الأول وتحلى مشكله مشكله .

خلى حفظ الكلمات كلعبه . يالا نردد مع بعض

مثلا :

كات ..سى ..آيه ..تييييييي . بنغمه حلوة تحبها بنتك .

هاتى سبورة صغيرة وقلم سبورة ، واكتبى الكلمه وخليها تكتبها .

امسكى أى خيط وقولى يالا نكتب الكلمه بالخيط مثلا .

بإمكانك تفكرى فى مليون طريقه تسعدى بيها بنتك وتنولى غرضك فى النهايه منها .

بالنسبه للواجب ، راعى ظروفها حتى لو هاتساعديها فيه دلوقتى لو كان كثير على قدراتها .

وبعدين ليه مره واحده نقلتيها النقله الجامده دى ؟؟

أنا عندى بنتى تكون أكبر سنا ولا تكون سابقه وأضعف عقلا واستيعابا عن إجمالى أصدقائها .

أنا لا أقول لكِ لا تكملى لها ولكن حاولى دفع الثقه فى نفسية بنتك .

ولا بأس من العقاب ،ولكن لا ينبغى أن يخلف أثرا نفسيا سلبيا وضعف لشخصية ابنتك .

فكرة ذهابك لمدرستها مهمه وضروريه جدا .

روحى وحاولى تكلمى بنتك :

ايه رأيك أروح معاكِ المدرسه النهارده ؟؟:)

وكمان كويس إنك عذراها .


ده شىء جميل .

وتربيتك فيها حاجات كتير صح .

ربنا يعينك يا رب .

على فكرة : ما تقلقيش من حكاية

الإمتحانات دى ، لأن فى النهايه

بيعطوا الطلبه شيتات يحلوها ويذاكروها

وبيجى الإمتحان منها إن شاء الله .

وكمان هونى على بنتك .

دى مش ثانويه عامه .

دى كى جي .

هادي اللعب شويه يا ماما .



اعذرينى على كلماتى لو زعلتك

واعذرينى على تطويلى .

لكننى شعرت أنى اتكلم عن ابنتى .لذلك كان ينبغى أن اطيل لكِ .

وفى الأخير . إذا وضعتى نفسك مكان ابنتك وتخيلتى يومها، ستتعرفين جيدا كيف تحلى

كل مشكلاتها .

أدعو الله أن يبارك فى ابنتك ويجعلها من حفظة القرآن الكريم .

آآآآآآآآآآآآآآآمين يا رب العالمين .

هذه الوردات منى لها :26::26::26:

وهذه منى لأمها :26::26::26:

:):)

اهلا بيكى يا نترا و منتظرين الاخوات يردواعليك بخصوص الاحكام
انتى بقى قوليلنا حافظة قد ايه و منتظرين جدولك