هنا تجمع لصاحبات البشرة السمراء

هلا حبيباتي ... جميع بنات حواء

انا حبيت افتح هالموضوع للسمروات ... علشان في كثير بنات يشتكون ان لونهم ما فتح وان الخلطات ما نفعت معاهم .. بس بنات بقولكم على شغله .... البشره السمراء اسمك من البشره البيضاء ويبغالها مجهود اكبر عشان تظهر عليها النتيجه ... وهكذا ... وهدف هذا التجمع .. ان اي حوريه سمرا تكتب لنا تجربتها الشخصيه مع الاشياء اللي نفعت معاها وجابت نتيجه وفتحت بشرتها سواء كان خلطه طبيعيه او طبيه...

يالله يا حلوين انا بستفتح لكم الموضوع وبمتب تجربتي واتمنى القى تفاعل منكن ...

بالنسبه للوجه ... انا كان وجهي ما في حبوب بس شوية اثار ورقبتي سمراء ... استعملت كريم روز مع كيلي مع لوكسيد ار (3 نقاط) .... والحمدلله وجهي فتح مررررررررره وتوحد اللون وجهي ورقبتي ... طبعا في البدايه هو بيقشر وبيطلع لك حبوب شوي بعدين كله بيختفي وما بتشوفين غير النقاء

طبعا الخلطه لانها مش طبيعيه انا استخدمتها شهرين ووقفتها و صرت احافظ على بشرتي الجديده كل يومين احط عسل وحليب ومقشر المشمش مره بالاسبوع وكل فتره وفتره احط اقنعه طبيعيه ... اغلبها من وصفات البنات في منتدنا الغالي جزاهم الله الفردوس وحقق امالهم اللهم امين
والحمدلله يا بنات صار لي سنه وبشرتي محافظه على رونقها وحتى حملي ما خرب بشرتي ... بس الرقبه رجعت شوي بسبب الحمل لكن وجهي تبارك الرحمن ما تأثر (قولو ما شاء الله ) هههه خايفه تنحسد


وبالنسبه للجسم انا قبل زواجي كان جسمي مبرقع ركب سود بقع في الظهر ... يعني شي ما ينوصف الله لا يبلاكم
المهم يا بنات ... قبل عرسي عندي صديقتي سودانيه جزاها الله الف خير نصحتني اسوي الدخون والدلكه السودانيه

ولاني كنت يائسه قلت يالله وش خسرانين نجرب ...

طبعا هي شرحت لي كيف اسوي بس ما عرفت فكانت هي تجي تسويلي كل يوم ... لين ما تعودت صارت امي الله يحفظها تسويلي .... واستمريت على الدخون السوداني مدة شهرين وصبغ جسمي بني حسيت ان جسمي في قشور بنيه المهم بعدها بديت اتفرك بالدلكه كل يوم لين ما طلعت القشور ..وكل اسبوع كنت اسوي حمام مغربي
وكنت اتروش بصابونة البابايا واحط لوشن البابايا بعد الحمام وبس
ملاحظه : ايام الدخون ما كنت استعمل صابون بس سدر وماي !

الصراحه يا بنات ما اقدر اوصف لكم .... انا انصدمت لما شفت النتيجه .... وكل صديقاتي انصدمو .... والله ا حسيت بشرتي كنها بشرة طفل هذا غير الصفاء والبياض .... والحمدلله رب العالمين

هذا بالنسبه لتجربتي ... واتمنى تشاركوني تجاربكم واي سوال انا حاضره وفي الخدمه ... وبنزل لكم موضوع عن الدخون السوداني بالشرح بس ترى لازم تساعدك فيه سودانيه لانه صدق صعب في بدايته ..بس اللي يبي الدح ما يقول اح..... ولا ايش رايكم


حبيباتي اذا عجبكم موضوعي او جربتوا واستفدتو .... ادعولي دعوه صادقه بظهر الغيب ... ان الله يحقق لي ما اتمنى ويعجل لي فيه ويسر حملي وولاتي ويرزقني الطفل السليم المعافى بلا زياده اونقصان ويستجيب دعائي اللهم امين


واذا في وحده بتنقل الموضوع ياريت تنسبه ل Eve >>>> وجزاكم الله خير الجزاء