هنا نجمع أفكار حفلات الأطفال

السلام عليكم ورحمة الله وبركاته

بعد غياب طويل .. عدنا والعود احمد ..

هذا موضووع عن حفلات الاطفال .. لاني بصراحة حاسة بمعاناة كل وحده تدور على افكار حق حفلات الاطفال ..

وبقول لكم عن حفلة قبل العام (( سوتها خالتي ))
وحفلة العام (( انا اللي سويتها ))
واللي ان شاء الله بسويها الاسبوع الجاي ..



اولا : حفلة قبل العام:
اول شي اخترنا مكان بسيط حق تجمع الاهل بس .. يعني حفلة بسيطة ..
اختارت خالتي الحوش.. وسوينا فيه الحفلة..
فقرات الحفلة :
1/ كان فيه فقرة .. جابت خالتي فيها صور الاطفال يوم كانوا صغار وصور اهلهم .. يعني صور قديييييييمة جدا .. وعرضتهم بالبروجكتر او اللي يسمونه (( الفانوس السحري )) وجابت طفلين .. واللي يعرف صاحب الصورة قبل هو الفايز

2/ لصقت على الجدار وجه مهرج ما له خشم .. وتجيب طفل وتغطي عيونه ولازم انو يحط الخشم في المكان الصحيح

وكان فيه فقرات حق اناشيد الاطفال واحلى نكتة واحلى تقليد ..



ثانيا : حفلة العام :
سويتها بسطح بيتنا :) (( انا احب اختار اماكن بسيطة ومكشوفة عشان الاطفال يحبون كذا :) )
المهم فقرات الحفل:
1/ جبت 4 اطفال وقمت اسالهم اسالة عادية مثل : وش لون بلوزة امك ؟؟ او كم عدد الجدران بالسطح ؟؟ ومن هالاسئلة .. واصير انا واقفة على راسه ومعاي بلونه فيها زي اللماع او الاوراق المقطعة مرررررررررة .. واعد الى الخمسة .. اذا ما جاوب افقع البلونة فوق راسه ويخسر .. والبقاء للاقوى :)

2/ لعبة للصغاار مرة .. اللي عمرهم اقل من 5 سنوات .. جبت زي الطشت وعبيته موية وحطيت في اسماك الالعاب اللي معهم سنارات .. واللي يصيد اكثر هو الفايز

3/ جبت سلتين فاضيتين .. وكان في السطح كور كثيرة في الارض مبعثرة .. واللي يجمع اكثر هو الفايز

4/ جبت صور حق ايام زمان .. مثل الحرمة شلون تحلب البقرة او شلون تطبخ وتخيط ملابسها وووو.. ، وكل صورة وريتها وحده من الحريم الكبار وطلبت تعليق منهم .. طبعا كلهم لهم هدايا .. (( كانت هداياهم صناديق صغيره فيها عود )))

معلومة : ترا الاطفال يحبون الاماكن المكشوفة والالعاب البسيطة .. ولا تنسون التشجيع .. تراهم يستانسون على كذا



ثالثا: حفلة السنة :
انا للحين ما بعد اثبت على الفقرات بس هذي اللي ان شا الله راح اسويها
1/ بجيب فريقين .. كل فريق مكون من ثلاث اطفال مقابلين بعض .. وراح اوقف ورا واحد منهم ومعاي ورقة فيها اي كلمه .. ولازم هذا اللي انا وراه يعرف الكلمة .. واذا عرفها اروح ورا الثاني واوريهم الكلمة وهكذا .. وبعد دقيقة اروح للفرقة الثانية واسوي معها نفس الحركة .. واللي يعرف كلمات اكثر هو الفريق الفايز

2/ بجيب طفل وبغمض عيونه وراح اعلق كلمة ورا ظهره او اوري الاطفال البقية غرض معين.. وانا راح اساله كم سؤال عشان اقرب له الكلمة او الغرض وهو يجاوب عليهم بعدين لازم يعرف وش الكلمة او الغرض ..
مثال : راح اجيب طفل واغمض عيونه .. والبقية مثلا راح اوريهم كتاب .. وبعدين بساله : انت تستعمله كل يوم ؟ او هل هو مهم لك ؟ ومن هالاسئلة وانتوا عاد شوفوا الاجوبة .. بعدين راح اخليه يخمن .. واذا عرف راح يفوز
(( ترا هاللعبة ممتعة للكبار والاطفال :) ))

3/ بجيب طفلتين بس يكونون بالمرحلة الابتدائية .. وكل وحده عندها سلة فيها عدد متساوي من الثياب مو مرتبة (( اختاري ثياب اطفالك او اخوانك القديمة )) واللي تسفطهم وترتبهم اسرع وبدقة اكثر هي الفايزة ..

4/ فيه مسابقة اسمها (( دلة زمان )) من تاليفي :) .. هذي المسابقة لامهات الاطفال ،، راح اجيب الدلة حقة زماان الذهبية (( اكيد عرفتوها )) وراح احط فيها اوراق .. في كل ورقة معنى كلمة قديمة .. ولازم يعرفون وش الكلمة بس باللغة الحساوية :) .. (( انا اخترت الحساوية لاني حساوية وهم اكيد عارفينها ، بس كل وحده تختار اللغة على حسب مدينتها .. يعني الجداوية تختار لغة اهل جده ، والرياضية لغة اهل الرياض وهكذا )) واللي يعرف كلمات اكثر لطفلها هدية
(( هذي اللعبة تعلم الاطفال وحتى الكبار بعض الكلمات النادرة في هذا الوقت ))

5/ راح اجيب شخص كبير .. وثلاث اطفال او اثنين .. واطلب منهم يقلدون هذا الشخص الكبير في حركة معينة .. والكبير لازم يختار اللي يضبط تقليده .. ويكون هو الفايز

هذي الفكرة توها جاية على بالي :
قبل الحفلة بيوم راح اصور الاطفال بكاميرا فيديو وهم ما يدرون وبجيب لهم صور يوم كانوا صغار وبدخل على التصوير اناشيد نجاح (( ما اعرف اناشيد نجاح .. اللي تعرف الله يعافيها تساعدني )) .. وفي يوم الحفلة راح اعرض التصوير مع الاناشيد ..


هذي الافكار اللي الحين براسي .. وكل ما اتذكر فكره راح احطهاا ..

وانتوا لا تنسون تحطون افكار حق حفلات سابقة انتوا سويتوها او مقررين انتوا تسوونها او حضرتوها ..


يالله مع الف تحيه