هنيئا للرفلات ودعوه للرفاله

السلام عليكم انا موضوعي طويل وبحاول اختصره طبعا انا من صغري شفت وتعلمت ان الوحده لازم تصير سنعه وظفره وتهتم بنفسها وبيتها وزوجها وعيالها وخليك سنعه ومن هالكلام لكن لاحظت شي ان اللي كان ينضرب فيهم المثل وانا صغيره مانفعهن سناعتهن وراح ابدا بامي اول وحده كانت ماشاءالله سنعه وتحب تطبخ وتهتم بالنظافه وعيالها من الفجر تقوم قهاوي وكرف وتنظيف بيت وبزران وابوي يبي قهوه واكل يعني قايمه بكل شي ماشاءالله بس كل هذا للاسف مانفعها خلاص امي كبرت شوي وابوي تقاعد وصار فاضي ويشده اي تقصير لها بالبيت والناس عيونها ماترحم اخذت فتره امي ماتدخل المطبخ من بعد عزيمه كبيره سوتها والحاله الثانيهبنت عمي ماشاءالله من وعيت على الدنيا وهي مثل النحله ببيتها والله يابنات بحياتي مادخلت بيتها الا يلمع من النظافه والترتيب وريحته تفتح النفس على ان عيالها على بعض بس مستحيل تدخلين بيتها لو فجاه الا هو نظيف حتى المنديل ماتشوفينه طايح بالارض نظافه نظافه حتى تقولي زوجي اول مايروح للدوام انظف البيت كله طبعا بيتها دورين ثم تروح لغرفة الغسيل بالسطح وتغسل الملابس وتكويها ثم تقوم عيالها الصغار وتفطرهم وتلبسهم قبل ابوهم يجي ثم تجهز القهوه والغدا ثم تلبس الا زوجها جاي والبيت نظيف وعيالها نظاف بتقولون حلو بنت عمي بحملها الاخير جتها دوالي وطلبت زوجها شغاله لان بوقت عيد الاضحى قال ماعندي شي مع انه يقدر يدبرها تقول طول عمري قايمه فيه والا عمري اشتكيت ويوم طحت وتعبت يقول مامعي قال اصلا البيت ماشوف فيه شي وكل ماجيت من الدوام الا انك متبطحه والله ماعندك لاشغل ولاشي تقول هذي مشكلتي كل مايجي يلقا كل شي مجهز ونظيف ماحس بالتعب اللي يجيني والكرف من يوم يروح الدوام وفيه بعد جارتنا الله يذكرها بالخير كانت امي تقول سنعه وكانت تقوم بالضيوف كل اسبوع ذبيحه من كثر ضيوفه مره طبخت قعود وذبيحتين وهي حامل كانت تستحي منه ماتقول لا حتى وهي طالعه من المستشفى والد يستقبلها بذبيحه ويقول الذبيحه. بالمطبخ تحلف ان ماعمره ساعدها بشي مريضه والاحامل والا نفاس بكل حالاتها تطبخ بالاخير جازاها بحرمه ثانيه والله يابنات لو تشوفون كيف مدلعها عمرها ماطبخت ولا ذبيحه خلاص ترك الاولى مع عيالها والذبايح يوديها طباخ والثانيه مايقول لها لا يعني راحت تضحيات الاولى المسكينه
طبعا غيرهم كثير لاحظت كثر السنع يعجز بالوحده بدري ويمكن يعود الرجال ان اللي قدامه اله مو بشر واذ تعبت مايرحمها بالمقابل لاحظت بقريبات لي مشهورات بالرفاله ومع ذلك حياتهن حلوه ومستقره وبعضهن ازواجهن طايرين فيهم مثل مرة عمي وهي نفاس او تعبانه او معها الدوره مستحيل تسوي شي بالبيت خلاص معوده زوجها اكل من برا يجي من دوامه يغير لعياله وينظف البيت حتى قايله له بالنفاس اذ ماهتميت فيني راح يجيني الخو وهذا مو زين للحرمه مع اني ضد اللي تقول لزوجها عن الخرابيط هذي بس والله لو تشوفون عمي مايخليها تلمس شي بالنفاس مره يقول قعدت العصر كله امسح البيت وانظف المطبخ تعرفون المسيكينه نفاس واهلها بيجون مع انه لها شهر يوم يقول لنا يعني تقدر تحرك على خفيف بس ماتبي مع ذلك عمي مدلعها ومايشوف غيرها ماقال رفله ووصخه وماتهتم ومثلها قريبتي البيت دايم حايس والعيال بالشارع وهي كل يوم قهوه عند وحده والزوج طاير فيها ومريحها مافكر لا بنظافه ولا رفاله انا من كلامي هذا ماانصح بالرفاله ولا السناعه لكن الوحده تكون نظيفه لان الاسلام امرنا بذلك وتدلع نفسها وتدلع نفسها وتدلع نفسها الرجال اذ مرضت وطاحت عن حيلها ماراح ينفعها وبيبدلها بوحده يالله طولت عليكم جا هالموضوع ببالي وحبيت افضف