هوس تجارة الزيوت تلاحظونه مثلي ؟؟

السلام عليكم و رحمة الله
كيفكم خواتي عساكم بخير
في شي ملاحظته مدري هو طبيعي ولا انا ابالغ
تجارة زيوت الشعر (من غير ذكر اسماء) .. شي غريب والله يا بنات الاعلانات كثيفه في الانستقرام و الاسناب بالذات .. ويكتبون هالزيت اللي يحل جميع مشاكل الشعر ويطول و ينعم ويحطون صورة وحده شعرها ماشاء الله لين فخذها.. مو معقوله زيت بيخلي الشعر كذا ويكون هو الحل الوحيد للشعر..
ومن المشاكل اللي يحلها الشيب الصراحه ماني مقتنعه ان في زيت يغطي الشيب !! ولا مثلا يقولون يطول الشعر شبر خلال شهر !!!! مدري احس مبااالغه واستغرب ان في ناس تصدق .. استغلال لحاجة الناس خصوصا نارد تشوفون وحده راضيه عن شعرها يا اما تساقط او خشونه او ما يطول ..والله والحين الموضوع طال بزياده صار حتى الرجال يعلنون لهم.. طبيعي الرجال يكون شعرهم اخف من الحريم معروف الصلع بين الرجال اكثر من الحريم .. قبل كم يوم شفت اعلان لزيت انه ينبت شعر الرجال وجايبين شاب مزيون ما شاء الله وشعره ماشاء الله تبارك الله الله يهنيه شكيت والله انه باروكه مو شعره الحقيقي وحاطين مقطعه مع الاعلان !!
وغير الاطفال بعد .. يجيبون تجربة وحده حطت الزيت لبنتها وتقول شعر بنتي طال و نبتت الفراغات!! طبيعي اي طفله بالدنيا عمرها سنتين او ثلاث يكون راسها فيه فراغات لين تكبر ويطلع شعرها و يكثر و يطول .. انا بنتي كان شعرها خفيف وهي صغيره وعمري ما حطيت لها زيت لانها ما تحبه ومع ذلك طلع شعرها و راحت الفراغات وطال والحين عمرها ثلاث سنوات ولو بحط لها زيوت ممكن بس عشان ينعم شوي و يترطب مو عشان يكثر او يطول لان طبيعي بيكثر و يطول لانها صغيره ..
احس فيه مبالغه والله والاسعار يااا لطيف يا لطيف .. عمري بحياتي ما شريت من هالزيوت ابدا ابدا والله لا يحدني لها.. رغم ان شعري فيه مشاااكل بس كل ما حبيت اعتني فيه اشتري اي زيت يناسب شعري بسعر يا بلاش واسوي ماسكات وخلطات واقطع الاستشوار والسيراميك وكلها كم شهر ويتعدل شعري ماشاء الله .. ليه استغلال الناس وحاجتهم .. الشعر الناعم الكثيف يكون من جينات وراثيه مو من زيت!! احس الزيوت نفس مفعول الكريمات اللي بالسوق بس ترطب وتطول مع الوقت اما انها تحل كل المشاكل ماني مقتنعه !!!
الله يرزق الجميع بالشعر الصحي ويرضي الجميع بما قسمه لنا رب العالمين .. ويهدي تاجرات الزيوت يخففون الاعلانات و يخففون الاسعار