هو ابتدائي وهي جامعي !!

السلام عليكم يا بنات حوا

والله أنا اليوم متنكده مرة مرة :44: عشان هوشة بيني وبين طويل العمر !!

المهم ما يرضي الرجال شيء :06:

قلت ابدخل أفرح بنات حواء

يا بنات أشوف بعض البنوتات تحكي عن مؤهل الزوج العلمي معه ابتدائي وهي جامعية ...

أبي أقولكم تجربة حضراتنا أنا وأخواتي

إحنا خمس بنات ، وإخواني 4 وأزواجنا متفاوتين ، في المؤهلات

لكن وحده من أخواتي زوجها معه خامس ، وما أدري أكثر منها ، وإلا لا

المهم إنه شا يلها بكفوفه الله يسعدهم ، ورجال يعرف المرجلة يبيع ويشري ، ولا عمره اعتمد على راتبه القليل لأن وظيفته بسيطة جدًا ، وتلقينة مرة يشتغل في العقار ، ومرة في السيارات ، مرة يجلب البضايع ....

أنا اعتبره رجل مكافح ، والله يا بنات أبوي دايم يدعي له على اللي يسويه مع أختي

وأختى اللي أكبر مني زوجها (ضابط ) أيام يخطبها طبلوا له خواتي : وافقي وافقي ضابط ، ويسافر برى ، وكشخة وخرابيط كلها سراب

كل يوم والثاني طقاق مع أبوي مغرور متكبر معتمد على فلوسه يجي من الدوام ، ولا يتمرجل لا عزايم ، لا روحات لا تمشيات ، ولا سفريات ، ومع هذا حاس إنه نعمه عليها ، ولا يملى عينه منها شيء

يعني العشرة معه استغفر الله

حتى لبس أختي وبيتها موب هالزود !

الرجال يا بنات عمره ما ينقاس بشهادته بالعكس غالب اللي معهم شاهادات عالية تلقينهم أخلاقهم ضعيفة من جهة الرجولة لأنهم انعزلوا كثير عن مجتمع الرجال ، طمعًا في هالشاهدات

وإلى الآن بعد ما توفى أبوي جعله للجنة ، وأختي زوجة الضابط حاسة إنها فقت شيء كبير