هو كده يبقى مفيش نصيب ؟؟ ولا لسه ممكن ؟؟!!

أولا إنتوا طبعا إخواتى
وفى حاجات مش بعرف أتكلم فيها مع حد وجها لوجه
فأرجوا إن إنتوا تقفوا معايا
عشان أعرف أتصرف


أولا أنا عندى 20 كنت مخطوبه من سنه ونص لشاب مكنتش أعرفه قبل كده
يعنى إتقابلنا كام مره وزى متقولوا كده إعجاب مثلا
جه وخطبنى وإتحددت الخطوبه سنتين
عشان أخلص دراستى
وإبتدت المشاكل
بسبب خجلى منه وإنى مش بعرف أتكلم زى بنات اليومين دول
وده لإن أنا مكنش ليا علاقات قبل كده
دى أول علاقه ليا

المهم الأيام عدت يوم كده و يوم كده
بس حصلت مشكله كبيره وقلعت دبلته وده كان كلامه ليا
بعد كده جه الكليه عندى و إتفاجئ إنى قلعت الدبله
وقعد فتره مش بيجى البيت خالص
والدى كلمه وقاله يجى عشان هو عاوزه
أخويا قعد إتكلم معاه كتيييييييييير ، وقاله إن الكلام اللى هو قالهولى
بسبب اللى هو مستحمله من سنه ونص وإنى بتعامل معاه عادى
هو شايف كده
إتفقوا إنه ياخد وقت ويفكر ويشوف هو عاوز يكمل معايا ولا لأ
خد وقته وبعد كده جه وقال هيكمل
بس بشروط
إنى أسمع الكلام ، هو شايف إنى عنيده
ويقولى أعمل إيه ومعملش إيه وشويه حاجات كده
وقلت ماشى
بس بعد كده إتخنقت مكنتش عارفه أتعامل معاه
بسبب طريقه معاملته معايا
مش بيتصل مش بيجى مش بيتكلم
يبقى قريب من البيت وميجيش يسأل عليا
طبعا نفسيتى تعبت جداااااااااااااااا
ووالدى كان شايف كده فحلف عليا إنه لو مجاش الإسبوع ده
يعتبر الخطوبه دى منتهيه
وأنا وبحسن نيه إتصلت بيه وقلتله على اللى حصل
وأتفاجئ بيه يقولى مش جاى
عشان إنتوا واخدينها بالعافيه وغصب
قلتله محدش هيغصب عليك فى حاجه واللى إنت عاوز تعمله إعمله
وقلت خلاص هو كده مش هيجى خلاص
وإتفاجئت بيه جه باليل بس بنفس المعامله
هو مش صافى من ناحيه البيت كله بسبب موقف أهلى منه
وأعتقد إنه كان بيعمل كده معايا عشان بينه وبين نفسه
يحاول يرد كرامته اللى هو شايف إن هى إتجرحت
أخويا كلمه وقاله إن المعامله دى مش هتنفع وإن أختى نفسيتها تعبانه
قاله إنه معملش حاجه وإن هى دى المعامله اللى هتبقى بعد كده
يعنى رسمى جداااااااا على الـ 6 شهور الباقيين ميعدوا
بابا معجبهوش الكلام ودخل قاله نفس الكلام
بابا قاله إنا كنت شاريك لأخر لحظه ومش عاوز أخسرك
بس واضح إنك مش عاوز كده
راح بابا قالى جامد قومى هاتى الشبكه
مروحتش راح مزعق فيا فقمت جبتها
خطيبى قال هو ده اللى إنتوا شايفينه خلاص ماشى
ومشى ومن ساعتها معرفش حاجه عنه
أنا مش عارفه هو كده فعلا كان عاوزنى ولا لأ ؟؟
طيب لو هو مش عاوزنى ليه جه ؟؟ كان ممكن ميجيش وخلاص
وأول مره أما أخويا قله فكر .. رجه وقال هيكمل
أنا متلخبطه جداااا جداااااا
ومش عارفه هو كده فعلا يبقى مفيش نصيب ؟؟!!
فى ناس عاوزين يدخلوا ويرتبوا مقابله بحيث نتكلم مع بعض
بس أنا مش عارفه أعمل إيه ؟؟
والمشكله اللى أكتر إن فى شخص تانى بيحاول يقرب منى وعاوز يخطبنى
وبيحبنى جدا .. وأنا مش عارفه أعمل إيه برده ؟؟
أرد عليه ولا أستنى وأعمل المقابله دى معاه الأول ؟؟
أنا فى إمتحانات ومش عارفه أذاكر دمافى مش بتبطل تفكير

جزاكم الله خيرا
:26: