هيئة..الهيئة... وبعدين وش اخرتها معهم؟؟

بصراحه من زمان ودي اقول هالكلام يقرقع بقلبي بس كل يوم اقول اليوم والحمد لله اللي فضيت اكتبه :35:

ماادري لاحظتوا مثلي هالايام طفشونا هالجرايد مالهم شغل ولامشغله الا انتقاد الهيئه وكانه مافيه احد يغلط الا هم

صح الهيئه بشر وماهم معصومين من الغلط لكن بصراحه هم رادين شر كبير عن المجتمع والله يعينهم ويسدد خطاهم

وودي اقول لهالصحافين اللي قلامهم ماتعرف الا اخطاء الهيئه وين قلامكم وعيونكم عن اخطاء الغير

عندنا مثلا

الاطباء ياكثر مانسمع عن اخطاهم وياليتها اخطاء عاديه الا توصل لقتل انفس برئيه ومع ذلك مااحد ينقدهم الا قليل ولايقارن باللي ينقدون اخطاء الهيئه

وعندنا مثلا الشرطه والمرور الحين هاللي يفحطون ازعجونا بكل مكان لدرجه صار الواحد يخاف يطلع منهم واذا اتصلنا نشتكي قالوا وش نسوي لهم ادعو لهم <<< ماادري وشوله ياخذون رواتب وترى مااتبلى عليهم صايره معنا

والا اذا احد انسرق بيته ولا سيارته وراح يشتكي قالوا احمد ربك انت ماجاك شي غيره انسرقوا عيالهم <<< من جد مهزله

ولا وزاره العمل وحنا وهالعماله المتسيبه الواحد يدفع ماوراه ودونه ويجيب شغاله وماتجلس الا كم شهر <<< هذا اذا طولت وتهج والمواطن المسكين الله يعينه يجمع مره ثانيه علشان يجيب له خدامه ثانيه والا اللي هجت يخلف الله مالك شي هذا غير العماله البنقاليه ولا ودي اتكلم فيهم لانه يبي لي صفحات علشان اوفيهم جزء من حقهم :o مايحتاج اتكلم كلنا عارفين وكلنا ملينا من الحكي فيهم

وينكم عن الغش التجاري وهالتجار اللي مايشبعون ان ارتفعت الاسعار على طول يرفعونها ويقولون مالنا دخل من برى ونزلت الاسعار بس خلاص مايقدرون ينزلونها لانه مالهم دخل باللي برى :06:

وغيرهم كثير وبكل القطاعات وبكل مجتمع

كلنا نخطي وكلنا بشر لكن انا مايقهرني الا ليش اخطاء الهيئه هي اللي تنتقد حتى لو كانت تافهه وماتذكر وغيرهم ولاحتى يذكر لهم خطا ولا ينتقدون مع انه يمكن اخطاءهم افظع واشنع :16:

المفروض كل واحد يحاسب نفسه ويعرف انه عمله امانه خاصه موظفين الدوله وانهم لو مااحد حاسبهم بالدنيا فالله يوم القيامه بيحاسبهم على تقصيرهم وغشهم وخيانتهم للامانه

هذي مجرد هواجيس كانت تقرقع بقلبي وقلت ودي تشاركوني الراي والموضوع اطول من كذا لكن ابعطيكم مساحه للتعبير <<< متعوب عليها :hahaha:


ونقول لرجال الهيئه مره اخرى الله معكم والله يسدد خطاك ويعينكم على الامر بالمعروف والنهي عن المنكر



ملاحظه نبهتني عليها الاخت ميهاف الله يجزاها خير


نسيناهم بسبب الزحمه ماندري مذكر مين ولامين الا وهم رجال الدفاع المدني البواسل <<< من جنبها والدليل وحده من جماعتنا احترق بيتهم وهم اللي طفوه هم والجيران والدفاع المدني حضرتهم ماشرفوا بس ماينلامون زحمه الرياض ماترحم ولاهم مايقصرون :p