واحد خاطب صنف الحريم ...شوفو وش قال؟؟

جوديه ، سنافيه ، رفلاء ، نحيفه ،مربوعه ، مليانه
تصنيفات عجيبه غريبه لاتخضع لمعايير او أسس واضحه ولكنها تصنيفات موسميه يعني لها وقت تسمع فيه زي الاوكازيون



يكثر استخدامها عندما يشيع خبر أن فلان خطب فلانه

أو عندما يرغب فلان في الزواج على أم عياله


وترددها النساء في مجالسهن الخاصه ( وعند اللي يقدرن السوالف حتى في المجالس العامه ( لاتخاف في ذلك لومة لائم )




لذلك عزيزي المقبل على الزواج نقدم لك شرح لهذه المفردات لانك بالتاكيد راح تسمع أياً منها عندما تجي لأمك ( فاق فمك ) تقول يمه اخطبي لي فلانه ومسوي فيها منحرج تلقاك تلمح لك شهر

وسبحان الله امك وجهك بوجها طول السنين وفاضيه ولكن ماعندك موضوع تكلمها فيه ويوم فعلا ً جاء الموضوع اللي عليه الكلام ماعاد تلقاها فاضية لك ( او على الاقل انت من كثر منت متحرج
ماعندك الجرأه تفاتحها الظاهر لو يفضى بيتكم كله ماجتك الجرأه



ونظراً لما سبق ذكره ولانك طبعا ماراح تجرأ تسال عن احد هذه الكلمات وتفسيرها العلمي



فنحن عزيزي في مؤسسة زرار طقطق للخدمات الزوجيه نقدم لك هذه المعاني فما عليك بعد ان تسمع تعليق والدتك أو أختك أو عمتك أو خالتك على فتاة أحلامك إلا ان تسجله بورقه ( ومعروف العذاريب واجد ) وتدخل هنا لترى اي وصفاً يطابق مدام المستقبل وشريكة حياتك المرتقبه

هذه التصنيفات نسردها لك كما يلي




أجوديه : يعني طافيه نارها لاهي بتهش ولا تنش ( وعند البعض اجوديه هي تلطيف لكلمة خبله ) وهي لاتكاد تسمع لها صوت في حالها ، لاتحب تحش ولا تحتسي بأحد ( لانها اصلا ماتعرف احد ) ماتحرص على العزايم والمناسبات ولاجت تكلمك تقول كنها مرتكبه جريمه ، بارده المشاعر ولكنها طيبه وحليله وتخاف الله فيك ( وتراعي زعلك ) وتقدر دراعات البيت القطن ( نص كم ) ودايم بالمطبخ ولو بكيفها نامت فيه ومن النوع اللي لادق المنبه عند راسك قامت من نومها بسرعه تطفيه ثم جتك بلطافه ( طبعاً ماراح تقول حبيبي لو تحب السماء ) تبي تقولك فلان اقعد الساعه كذا

التوصيات : هذي خذها وانت مغمض اذا ماتبي رومنسيه وفيك نزعه تسلطيه وفيك مشروع ديكتاتور ( صغير ) ولكن لاتقسو عليها كثيرا :30:


سنافيه
وهذه الكلمه لاسمعتها من أمك ( اعرف ان أمك مشتهيه تخطب لك هالبنت ) ولهذه السنافيه عدة مميزات كما ان لها عيوب ومن مميزاتها انها ظفره ( يعني ست بيت ممتازه ) تحب الرومنسيه وتقدرها وتحب تسمع لعبدالمجيد ( كيف اسيبك ) دايما ماتحب تلبس بنطلون بالبيت وتي شيرت فضفاض بس لاصار عندك عزيمه ومتوهق تلقاها عباره عن دينمو متحرك وشغل عدل وحلويات ( وشي يبيض وجهك قدام ضيوفك ) ومن عيوبها (تسمع كلام امها ودايم تاخذ التفسير السئ لكلام امك تحب العزايم والعروس وتقدرها ( وترقعها تقولك أنا اجتماعيه ) تحب تتغلى عليك شوي وبيت اهلها لازم تجيه بصفه دوريه ان لم يكن يوميه ولاولدت تروح لامها تقعد الاربعين هناك وتشره على امك اذا ماطلعتها ( يعني هدية المولود ) بشي يستاهل


التوصيات : إذا انت رجال يعني مرات تصير شديد ومرات طيب ولاعندك نزعه تسلطيه ولازعلت ماتروح بعيد فنوصيك بها :42:


العوبــــــــــــــــــاء

ولاسمعت هالكلمه من أمك فاعلم عزيزي انه لو تنطبق السماء على الأرض ماخذت هالبنت واذا تحديت اهلك واخذتها فتاكد عيشتك بتصير نكد بنكد ولكن معني العوباء او مميزاتها بالاحرى هي ( مدروة مشاكل ) تدور عليك الزله من اول شهر اذا انت ساكن مع اهلك بتقولك ابي بيت بلحالي وكل يوم لاجيت من دوامك عطك تقرير مفصل عن العذاب اللي تعرضت له يوم كنت غايب ولو يجي ظرف طارئ او مهمة سفر لو بالشغل يوم واحد تلقاها تقولك بروح معك واذا قلت لها يابنت الناس رحله عمل ومعي زملاء قالت طيب ودني لاهلي ( اذا لها شغاله خاصه فصفقني ياشيخ لو شالت منديل من على الارض ببيت اهلك او غسلت ملابس او كوت شي تلقاها بس كنها معزبتها مغير ترزز وتنفخ بعد ) ودايم شوشتها طايره خاصه بالبيت والا لو معزومه بعرس والا شي شفتها مطلعتك من الصبح عشان الكوافيره وتقدر الدراعات العاديه ( حقات دبي )

التوصيات : هالنوع انحش عنه واذا شفت امك ماتبيها فلا تحرص وتسوي فيها عاشق ( كل تبن واسمع كلام امك ) لانك ماتدري لو أنها خير ة لك :06:



الرفـــــــــــــــلاء
هذي بعد من الكلمات التي قد تصرفك امك فيها ولكن عليك من يقصد بالرفلاء : فهي اللي ماتعرف السنع وهي اقل درجه من الأجوديه وتشترك معها في عدة امور ولكن اذا انت محتار بين الثنتين فعليك بالاجوديه ، هذا النوع قد يفشلك لاجاء عندك عزيمة رجال طارئه شاهيها وقهوتها ماهي بثابته ( كنها الأحوال الجويه ) متقلبه تحب الفصفص وتقدره ودايم تلقاها مقابله التلفزيون مسويه نفسها فاهمه في امور علميه وثقافيه ( يعني تبي ترقع هالحين وهي مع جنبها ) لاجت تسولف معك تقط كم كلمة انجليزي مسوية فيها مواليد كوبنهاجن لاجاء الصيف تزعجك تبي تسافر مثل صديقتها فلانه وفلانه مسويه قدامك انها ماعليها من عالم الحريم وحشهم وتقطيعهم بعباد الله وهي حية من تحت تبن ، تقدر حفلات الأستقبال ، ولاهي بتعرف تقهوي اي وحده جايبه مولود جديد ( من الوكاله )

التوصيات : فيه رجال تصلحلهم هالنوعيه وهم من درجه ( طالعين فيها ) بس صراحه المجتمع المحيط ماراح يتقبلهم يعني مثلا الحرمه ماهي بتنهضم يجي زوجها بعد نفس المونه ( ضاعت الامه العربيه )
:29:

ونورد لك عزيزي هنا بعض الصفات على الطاير

المربوعه : هذي طال عمرك وزنها 2 طن لاصرت مثلا طالعن معها على الخط السريع لازم تصفط عند الميزان حق الشاحنات كذلك عليك ان تلزم المسار الايمن وفي سيارتك حط في كفرات الجهه اليمني هواء اكثر من الجهه اليسار وهالنوع من النساء عزيزي المقبل على الزواج غيور جداً ( على مايقال لي ) وياويلك تسهر بالبيت وراء 12 :23:




المليانه : وهي من جسمها زين يعني لاهي بعصلاء ولاهي بمتينه ( ولو ان بعض المتان استغلن هالكلمه فتلقاها وش كبرها وتقولك انا مليانه (ايه هين ) وهالنوع حبيب بس يحب المسايير وقهاوي العصر وتنفخ على عيالها كثير :02:





بقي ان نخبرك عزيزي ان اهم صفه يجب ان تتحلا بها المرأه قبل ماذكره اعلاه وقبل اي شي وهو الدين وقال صلى الله عليه وسلم ( فأظفر بذات الدين تربت يداك )


نتمنى للجميع التوفيق بإذن الله

منقول