واخيرا حققت حلمي بشعري بفضل الله يارب لك الحمد

السلام عليكم

دايما كل قسم ادخلو بالمنتدى اقول ياربي نفسي اعمل تجربه وتنفعني واجي افرح اخواتي لعلهم ينتفعوا بيها زيي

سواء قسم النحافه والسمنه قسم الشعر قسم الديكور كل شي

المهم ربي اكرمني بلحظه وبلمح بصر اتحقق حلمي اللي كنت اتوقع حيكون تحقيقه بعدين بعد ما اتخرج او لما انخطب او كدا يعني

شعري ملفلف مررررررة زي الاندومي واكره الترويش وربي كل ما اتروش اكره نفسي لانه ينكش نكشه مو طبيعيه واذا لميته وهو مبلول يصير شكلي زي العواجيز يعني مقدر اعمل فيه حركه او تسريحه

كنت اضيع خرجات كتييييييييييييييييييير بسببه لانه مافي حيوية ومنكوش ومو اي تسريحه تنفعني مقدر اخليه مفتوح ومقدر المو بحركه حلوة

طبعا انا اذا معزومة او ورايا خرجه استشورو اليوم اللي قبل المناسبه ليش لانه تاني يوم يحتاج اعاده عليه هههههههههه لانه مستحيل يهجد من اول مرة وبنفس اليوم اللي حخرج فيه يفضحني وياما سواها فيا وفشلني :(


واذا جاتني خرجه فجائيه طبعا اذا مستشور مسبقا هههه رحتها واذا كان على نكشته ماخرجت لانه اكره شكلي يبيني اكبر من عمري بسبب اللمه اللي المو هي ومقدر المو بغيرها :(

بس ربي من عليا ورسلي صحبه ماما ودلتنا ع كوفيره تيجي للبيت وتعمل الفرد وهي تسوي لصحبه ماما اشياء زي حلاوة وكدا من سنين الحمدلله هي شاطرة وصحبه ماما مادلتنا الا وهي واثقه في شغلها

قالت حسويلك فرد اسمو ماتريكس مو كيراتين بس حلو انا قلتلها اخاف يطلع شكل شعري باين انه معمول فرد ويبين مو طبيعي انا ابغى شي يبين شعري كانو طبيعي قالت ما تخافيش انا حزبطك دا يطلع كانو طبيعي


وسوتلي هو طبعا ليش انا كان حلم بالنسبالي انه اعمل شعري فرد او كيراتين الا بعد ما انخطب او اتخرج لانه كل مشغل يقولي 1500 و1200 ما اختلفنا ع السعر بس لما ابحث عن المشاغل بالنت ناس تمدح وناس تذم احترت وانا ما بدي ارمي فلوسي بالارض

سالت الكوفيرة بكم تعمليلي وتيجي البيت مابدي صالون بدي اخد راحتي ببيتي قالت اعملك هو 800 ريال زي سعر المشغل بس قالتلي حسب طول شعرك لان العبوة تكفي طول شعرك اما لو كان شعرك طويل اضطر افتح عبوة تانيه وتضطري تزيدي المبلغ واذا زاد من العبوة التانيه اعطيكي هي تخبيها عندك عشان انتي دافعه تمنها وبعد 6 شهور ترجعيها ليا واعملك منها الجذور اللي نبتت انبسطت والحمدلله شعري ما طلع يحتاج عبوة تانيه وعملتلي ب800 ريال بس وبالبيت


الطريقه للي حابه تعرف اول شي حطتلي الدوا اللي يفرد خصله خصله من الجذور وتحسيه كانو جبس على راسك ههههههه وتخليه مدري قد ايش هي حسبت انا ما ركزت معاها بالوقت وتغسلي هو بدون شامبو وتنشفو شوية بالاستشوار وبعدين تحطلي المثبت حق الفرد وبرضو خصله خصله والجذور وتخليه برضو مدري قد ايش هههههه مهوية انا بعدين غسلتو بمويه بس برضو بعدين يتنشف بالاستشوار شوية وتعمل البيبي ليس عليه او على قولتها السيراميك خصله خصله من الجذور وشغلانه كل ما اقولها طفشت تقولي لازم عشانت يطلع مزبوط والجذور ما تبين خشنه والباقي يكون ناعم

وبجد سوتلي وقالتلي 3 ايام ما تغسليه ولا تعرقي ولا تلميه ببكله عشان الفرد ما يتكسر يعني يطلع شكل الشعرة مكسورة تنطعج 3 ايام انتظار ع اعصابي بدي اشوف كيف يطلع هههههه ولما غلستو قالتلي اغسليه ببلسم بس شامبو لا لانه الشامبو يضيع مفعول الفرد بس بعد كدا عادي اغسلي طبيعي شامبو وبلسم وقالتلي كتري حمامات كريم وزيوت بعده والله يا بنات طلع كانو طبيعي شعري صرت اقول وين كنت ووين صرت الحمدلله رب العالمين


حبيت افيد كل اللي زي حالتي محتاجين الشي دا ويارب اكون افدتكم بتجربتي

هي بجده للي تبغى تعمل بجد حبيتها الحرمه :love: حمدلله يارب