كوبونات الراقية تسجيل الدخول

عجايب في زمن خايب

واخيرا عرفت من سحرتني وكادت تتسبب بطلاقي وهدم بيتي!!

الأسرة والمجتمع •


بداية قصتي كانت تقريبا من عشر سنوات كنت توني طالعه الاربعين في ولدي ...وتراها طويله شويه للي مالهم خلق يقرون :)

حياتي كانت حلم اي وحده زوج صالح محب راحه نفسيه وماديه وجسميه يعني ما علي قاصر كانت معاي بنتي الاولي وولدي الاول كون زوجي يعمل بوظيفه مرموقه وشخص معروف كان حلم اي بنت وطبعا اللي ما يخافون الله كثير وعندهم الغايه تبرر الوسيله :(

طلعت الاربعين ومن طلعت وانا ملاحظه نفور مو طبيعي مني لزوجي بدا هالنفور بالتهرب من الجلوس معه واشغال نفسي باي شي المهم ما اقابله ...وشوي شوي صار نفور حتى من العلاقه الخاصه وبرود غير طبيعي وغير مبرر هالشي كنت اتعذر لزوجي باعذار واهيه لكن مع الوقت صار الامر اكبر صرت اتعمد اكبر اي مشكله واي موضوع بسيط اقلبه لمصيبه !! في البدايه كان زوجي يحاول يتغاضى عن الموضوع لكن مع الوقت الرجال مل وصرت انا اتفنن في طرق التنكيد عليه وقلبت حياته من يدخل البيت لنار هالموضوع كان يقابله ندم واسف وبكاء حار في غيابه وكنت اوعد نفسي اتغير واعدل من وضعي لا طلع بس من يدخل يركبني ابليس اللهم يا كافي وبما اني كنت ارفض اني ادخل اي شخص بحياتي ما علمت اي شخص بهالمشاكل اللي للاسف انا من يختلقها لكن بلحظتها كنت ابرر الامر لنفسي بانه هو الغلطان مع انه يا عمري ما يضر ترابه :( ومرت اربع سنين على هالحال

وصل الامر لطريق خطر قمت اعيره واسبه رغم انه رجال مو سهل وكان يحاول يمنع نفسه انه يمد ايده والغريب اني كنت اقول له بصراخ اذا انت رجال طقني يا الله اشوف مد ايدك !!! اثبت رجولتك وطلقني يا الله .... ومن هالكلام الجارح وكان اكثر من مره يهددني بزوجه ثانيه او بالطلاق اذا ما عدلت وضعي :( نادرا ما يلاقي الهدوء والراحه كنا على حافه بركان والغريب اني ماكنت اهدا الا في اوقات الدوره اللي طبعا زوجي ما يقدر يسوي اي شي فيها يعني شبه محروم :(

مرت الايام والحال من سيئ لاسوأ لين وصلت للشعره للي قصمت ظهر البعير على ما قالو

صارت مشاده كبيره وسحب نفسه لمجلس الرجال وطبعا هالمنطقه محظور علينا حتى اننا نمرها لانها نادرا ما تفضا
وتكون خاليه ليل نهار ....وكان الوقت الصبح الساعه 6 صباحا ما حسبت بنفسي الا وانا اركض مثل المجنونه وادخل عليه المجلس واصيح عليه انحشت يا جبان طلقني واقوم امد ايدي وارافس طبعا زوجي تبارك الرحمن طوله فوق 180 وانا دوبني فوق 150 ثبتني على الطوفه لين خفت موجه جنوني ووقال لي شيلي اغراضج وورقتج توصلج وشالني لبيت اهلي الساعه 7 انا في بيت امي طبعا امي استغربت وكان ردي عليها ان الكهرباا طافيه عندنا ببساطه !

الساعه 9 لقيت اختي الكبيره فوق راسي وسووو لي لجنه هههههههههه امي وخواتي الثنتين الكبار اعترفي قولي شنو اللي صاير ومن كثر الضغوط اعترفت وكنت استهزئ فيهم خلاص انا ما ابيه خل يطلق ووووو اتصلت اختي على زوجي وكلمته وحكا لها كل القصه وانه بيخليني اسبوعين اذا ما تعدلت ماله حاجه فيني ( ما الومه ) شالوني والساعه 10 انا على باب شيخ كبير وعنده زحمه امة محمد على بابه دخلت عليه وحكيت له القصه علمته اني ما اهدا الا وقت الدوره سألني عن زوجي اشك فيه هل له علاقات وتحقيق طويل عريض كانت نتيجته اني متعرضه لسحر تفريق يكره زوجي فيني وانه اكيد فيه وحده مخططه عليه عطاني سدر وماي ومشيت علي كلامه وبعد نصائح اخواتي وقراءة القرآن هدأت نفسيتي وتحسفت وندمت على اللي سويته وصارحت اختي بهالشي وانا انا سبب المشاكل واني واني ..... الخ كان رد اختي علي ان اكثر شي بيرد الماء لمجراه اني احمل واجيب طفل جديد يجدد ويغير حيااتنا وفعلا خليت حبوب منع الحمل وردت حياتي بعد ان انفك السحر لكن قعد في قلبي وبالي شبح المرأه اللي حاولت تضرني وتهدم بيتي وهل زوجي يعرفها هل كان على علاقه بوحده هل هي احلا مني كم عمرها .... واسئله سخيفه لازم تمر في بال اي انثى في هالموقف ورغم محاولاتي بزوجي انه يعترف لي الا انه كان ينكر هالامر بشده ويتنرفز من مجرد الطاري ........ومشت الايام والحال رد احلا من قبل وثلاث سنوات مرتاحه بعد كابوس الاربع سنين وقررت احمل مره ثانيه وجبت ولدي الثاني ومن طلعت الاربعين...

والمفاجأه المرررررره رجع السحر علي :( :( :(

رجعت اللي ما تخاف الله تحاول تخطف زوجي وتهدم حياتي يا ربي شنو سويت لها ليش جذي

رجع الكابوس الاولاني ومعاه صرت اطق عيالي وانا اللي ما عمري مديت ايدي عليهم لدرجه اني قمت افكر والعياذ بالله بالانتحار !!! وهالامر غصب عني ومو راجع ابدا لقلة الايمان وصار الوضع مشتعل من جديد

وفي مره من المرات وانا جايه من السوق فتحت علبه حبوب منع الحمل اللي اتناولها وقرأت نشرتها والاعراض اللي ممكن تسببها ولقيت بلاوي البلاوي اورام امراض ومن ضمن الاعراض وسواس قهري فصام بالشخصيه عصبيه زائده ........الخ ومن هاللي قريته قررت اترك الحبوب غير اسفه وانا بنصف القصدير للحين ما كملته وصار امر غريب


من تركته وانا راجعه الاولانيه اللي تحب زوجها وعيالها شالسالفه؟؟؟؟

وين السحر .....؟؟؟؟

شنو اللي فكه فجأه..؟؟

معقوله يكون السحر اللي فيني من حبوب منع الحمل !!!!!!!

بيتي كان بينهدم ؟؟ حياتي وحياة عيالي بتنهار؟؟؟ ما كان فيه وحده طمعانه بزوجي الشبح اللي في بلاي كان خيال؟؟

طلع سبب الجحيم اللي كنت فيه هالحبوب ورغم اني تناولت اكثر من نوع ظلت نفس الاعراض .... واسترجعت الماضي وكل ذكريات ازمتني ولقيت اني كنت في فترة مشاكلي اتناول هالسموم بانتظا م !!

تركت الحبوب

ومن تركتها وانا في احسن حال وحلفت واقسمت قسم اني ما عاد اخذ حبه لو مهما يكون .......

موضوعي كان للاحتياط والعبره يمكن تكون هالحبه اللي تتناولينها يوميا اخطر من حبوب المخدرات اللي خطرها علي الشخص نفسه بينما هالحبه ممكن تهدم بيت وتفرق عائله .....


ودمتم برعاية الله ...
42
10K

يلزم عليك تسجيل الدخول أولًا لكتابة تعليق.

تسجيل دخول

Andromeda
Andromeda •
يووه ضيقتي صدري
انا اللحين مخطوبه ومفكره اخذ حبوب لانه ماودي احمل من اول سنه
وش السواه؟؟:(
(((( ام لاما ))))
(((( ام لاما )))) •
لا حول ولا قوة الا بالله 00 ياربي كل هذاا سوته فيك الحبوب ؟
الحمد لله على سلامتك
نور امل
نور امل •
الحمد لله على سلامتك
عزي شموخي
عزي شموخي •
مشكووره بس يا ختي كثير حريم ياخذون هالحبوب وعايشين بسعاده وهناء

يعني مااتوقع المووضووع من الحبوب والله أعلم

تقبلي مروري

عزي شموخي
ريلافين
ريلافين •
يوه ياكرهي للحبوب انا نفس الشيء من ابدأ فيهم يركبني مليون شيطان واصير ادور المشاكل دواره تصدقين من بديت اقرأ قصتك وقبل ما اكملها كنت مجهزة الرد في نفسي وكنت ابقول ما فيك سحر لا تتوهمين ما فيك الا اكتئاب النفاس وتركتية ما عالجتيه او وووووو الحبوب ما ناسبتك بس يوم كملت الموضوع وشفت السبب الحقيقي ضحكت لاني ذكرت نفسي وانا اوقف عند الباب وانا انتفض من الشر الي فيني احتري زوجي يدخل علشان اتهاوش معه