واخيرا قصه ولادتي في مستشفى الرعاية بروكير ... وتجربتي مع ابرة الظهر .. وبإسهاب .

بسم الله الرحمن الرحيم
اعزائي واحبائي .. في تجمع الحمل والولادة
اشكر من اعماق قلبي كل من ادلى بنصيحة او ذكر تجربة او حتى سأل بسؤال
عايشت تلك الصفحات يوما بعد يوم .. حتى تكثف وجودي بشهري التاسع
حتى اصبحت لدي حصيلة من المعلومات .. ادبر فيها حالي على مايقولون " ليوم الولادة المنتظر
طبعا سأذكر قصتي من يوم ان كتبت آخر رد في التجمع
وهذا هو رابطه
http://forum.hawaaworld.com/showthread.php?p=36926935#post36926935
طبعا رحت فعلا سبحت وصليت ركعتين دعيت فيها ربي ان يكتب لي اللي فيه خير
وكان ردي قبيل الفجر ... قام زوجي يصلي خبرته اني احس بآلام لكن بسيطه
يعبر عنه : بمغص مزعج للغاية ماتقدرين تنامين منه بإختصار يروح ويرجع
وكان يشتتني الألم لأني جربت الطلق في ولدي الأول لكن هذا مختلف فما كنت احس بقوه ان ظهري يمسك مع
الم بطني
طبعا طلعت من بيتي وكلي خوف وامل .. مما سيحدث لي لاحقا
طلع علينا النور وحنا متجهين بالسيارة لبروكير (الرعايه)
دخلت الإسعاف :11retcher
ورقوني فوق على قسم الولادة
وهي نفسها غرفة الولادة و غرفة التحضير لماقبل الولادة
غرفة كبيرة شرحه نظيفة توسع الصدر يطل قزازها على
الهوم كير وهي العماير اللي يسكن فيها اطباء مستشفى بروكير
قلت لهم ابي دكتورتي رنا قالو لي رنا يبدى دوامها الساعة 8 انتظري
بس بنكشف نشوف ولادة ولا لأ
جتني دكتورة مصرية الله يسامحها وكانت مناوبتها
كشفت علي زعقت زعقة كل من بالقسم جا لغرفتي
حتى مسؤولة قسم التوليد البريطانية جت تشوف شالسالفة
يدها مره ثقيلة ودخلتها بكل دفاشة
حتى نزلت مني دم :icon33:
وقالت لي مفتوح قرابة الثنين سانتي وفيه طلق
,,,
وكل ساعة رح تكشف علي
قلت الله يصبرني للساعة 8
عطوني الحقنة الشرجية وركبولي المغذي
وجاتني جليستي وهي ممرضة تكون معي طووووووول فتره مكوثي بهالغرفة :baby2:
حتى يحين موعد الولادة
هالحركة مره عجبتني تقعد تسولف معي
وتشوف نبض الجنين والطلوق
وتخدمني ماقصرت الله يجزاها كل خير

وجتني المصرية مره ثانية تكشف
حلفت يمين عظيم ما تقربين لي< مسكينه خذت موقف : :booo:كيفها>
وبعدين اقبلت دكتورتي رنا
ماتتخيلون الفرحة اللي حسيتها لماشفتها
كشفت علي وربي ماحسيت بالم إلا الم الكشف العادي
وقامت تتعذر لي تقول لي آسفة جدا شكلي عورتك
لأنها شافت دم نزل مني
ماتدري ان المصرية الله يهديها هي اللي جارحتني

طبعا انا كنت مخططة اني آخذ ابره الظهر
وشجعتني اختي الغالية :love: غلاوي22
عشان كذا جيت بدري ...

مباشرتا لما حسيت ان الطلوق مستمرة والرحم موقف على 2 سانتي
بعد ما استخرت ربي
توكلت على الله وطلبتها

أجرآتها طويلة شوي
جاني دكتور يسألني بعض الأسئلة
اعاني من امراض وراثيه
فيه ضغظ سكر .. قلب ربو
متى اكلت آخر مرة
المهم
بين لي ماهيتها وكيفية تثبيتها
وكيف ان مايحدث بها من مشاكل هو سؤء الطبيب المختص
او السمنه الزائدة في الحامل
لا موضع الأبرة على ما اعتقدت
فقد يكون زاد الجرعة واجد على المريض

بعدين وقعت على طلبي
وقامو يجهزون الاغراض
جاني الدكتور (عهد) لبناني الجنسية
وهو المختص بهذا النوع من الإبر
خطواتها كثيره يطول شرحها
بس بالبداية تكونين جالسة وضامة المخدة (مدنقة ) ههه
يحط سائل بارد على ظهرك بعدين يمسحة
يمسك طرف الحوض ويبدى يعد الفقرات من تحت
ويضغط بإبهامه
والجدير بالذكر انه دخل ابرة الظهر مرتين
لأن مكانها الأول ماكان صحيح جدا
وبعدين دخلها مكانها الصحيح
ولا فيه اي مشاكل صارت معي ولله الحمد
والسبب يرجع ان فقرات ظهري مره صغير ة على قولته وقريبة جمب بعضها
وصرحه المها لايذكر
شكة بسييييطة
وطلع انبوبها الدقيق مره حتى كتفي عشان اقدر انسدح وارتاح على كيفي
وثبت ظهري كله بلزق حتى لا تنزاح

وبعدها جرب جرعة تست
وشاف استجابتي له
حسيت بتنميل بسيط برجلي وعادي اقدر احركها
وبعدها سبحان الله ,,,, إختفـــــــــــــى الم الطلق نهائيا وكأن شيئا لم يكن
نمت على كتفي الأيسر
لأني من شهوري الأخيرة احس بضيقة بالنفس وانه ينقطع
وانك تنامين على شقك الإيسر يريحك كثير
وتمر الساعات
وطبعا بنوتتي كان طلقها مستمر والرحم مو راضي يزيد عن الأربعة سانتي
وحمدت ربي اني اخذت ابرة الظهر
لأني اشوف بالجهاز الطلقة تعلو حتى آخر الشريط وانا مو حاسة بشي
وكنت ارسل لخواتي مسجات
ادعولي الرحم فتح كذا وكذا خخخخ
والطلق يزيد ولله الحمد هههه <<< مستانسه طبعا منتب حاسه بشي:icon32:

حتى صارت الساعة 2 ظهرا
وكانت د. رنا كل شوي تطل تطمن علي وتروح
وولدت كم وحدة بوجودي وانا موسعة الصدر وقاعدة
بعدين حسيت بألم مثل النار والحرارة تضرب على مقعدتي
قلت نادولي دكتور التخدير وااااع<بشويش خخ
جاني وقال نسيت اخبرك ان وقت قرب الجنين وطلوع الراس
تبدين تحسين بالألم .. أفا

جتني رنا وقالت يالله ولاده
وجت معها د . بشرى باكستانية << تهبل :llove:
واخيرا
بس الحمدلله كان عندي جهد
وقوة تحمل لـــم تنهكها آلام الطلوق

وكنت اميز وقت الم الطلقة أدفع
ووقت ذهابها آخذ نفس
حاولت بشتى الطرق انها تخرج طفلي بدون ان تقص
وفعلا صبرت حتى ساعدت انا نفسي بنفسي
لكن بنتي شقتني شوي لما طلعت
لم احس بطعم ولادة كهذه
فكنت واعية بكل احداثها
خرجت اللي انتظرتها الأشهر التسع تلك
خرجت من اذاقتني تعب الحمل بدايهً بالوحام
حتى الم الظلوع حتى الم المفاصل والحموضة وضيقة النفس
ههههه احس اني مالي داعي هههه
قبلت بنتي وحضنتها بقوة:icon33:
(الله لايحرم احد من هذا الشعور)

اخذوها وغسلوها
وبدأت انا بالخياطة
بس قبل الخياطة هالمرة حسيت بخروج المشيمة
وترى البكريه تختلف اللي تقول ماتحس فيها
انا لما كنت ببكري فعلا ماحسيت وماكنت آخذه ابرة الظهر حتى
لكن هالمرة دفعت كأنها ولادة حتى خرجت المشيمه وتوابعها

　
لحظات الولادة انهكتني واحسست بتعب ورغبه في النوم
ما حركوني غطوني ببطانية دافية
وبدأو العاملات ينظفون غرفة الولادة اللي انا فيها
ماخلو شي الا عقموه وغسلوة
حتى الأشياء اللي مالمست مسحوها بديتول
وتقريبا 3 مرات مسحو الأرضية بلا مبالغة صدقا
حتى قلت بنفسي طولو واجد على الأرضية شفيها

بعدين نقلوني بسرير وودوني غرفتي بعد ماجابولي حليب دافي
فكانت ولادتي

يوم الأحد 20 - 11

1430
هــ


نجي للغرفة



طبعا احلا شي ان الغرفة شرررررحة مره

وقزازها كبير

ويطل على مجمع الظهران<< على بالها انها بتزرق شوي وتمر الظهران
وشاشة بلازما
وكنب راااايق
وجهاز ظغط وقياس الحراره في كل غرفة
ولو كنتي نايمة مايزعجونك
ولو طلبتني طفلك يوقعونك بكل طلب < افضل للامان
ومايجيبون ولدك بالليل عشان ترتاحين
وغير ان وجباتهم توسع الصدر وطيبة وانتي تختارينها
يجيبون لك سناك وجبه خفيفة .. كل فتره :f226:
ونفسياتهم تهبل ما شاء الله << عسى ما تخرب
وبس








طلعت بالسلامة وكنت واعدتكم بالصور بس للأسف جوالي انسرق مني اللي مصور فيه

غرفة الولادة

لكن الوجبات وغرفتي الخاصة مصورتها بس الكمرى مو متوفرة عندي حاليا
ومقرره انزلها بموضوع إن شاء الله








　

ختاما اشكر كل من سأل عني ودعا لي وربي يعلم اني دعيت لكم على وجه الخصوص

ولقسم الحمل والولادة على وجه العموم
ولقسم تأخر الحمل
وربي لايحرم هاللحظات لكل محروووم








وإن شاء الله ما كان كلامي يجيب الملل

بس والله اسهبت من باب المعرفة, والعلم والخبرة اللي تعلمتها , تشاركوني فيها






　

تحياتي للجميع





محبتكم : بياض الثلج