واسوني .. انفصلت عن خطيبي

السلام عليكم يابنات

حبيباتي انا بدخل بالموضوع على طول ، ماابي منكم غير كلمة تواسيني لاني جد محتارة مع اني احس الانفصال احسن لاني واجد تعبت معاه بس كان عندي أمل نرجع لبعض او يعتذر لي على اسلوبه معاي أو اقل شيء يندم على تصرفاته ويجازيني على صبري بس خلاص ماعاد ينفع شيء .. هو كسر كل شيء كان بينا وزعزع الثقه..

حاسة باحساس غريب ضايعه ومحتارة وتايهه وخايفه وحزينة ومقهوره ماني عارفه اوصف شعوري احساس بالغضب من كل قلبي

انا قد كتبت موضوع عن مشاكل مع خطيبي وكثير بنات نصحوني اتركه ، وانا بعدها استخرت وارتحت وقلت خلني اصبر ماابي اهدم كل شيء ورجعنا لبعض بس الظاهر جد انا مالي نصيب معاه .. كل فترة تطلع مشاكل جديدة وتتعقد قصتنا اكثر واكثر ..

المهم له فتره يمر بشويه ظروف وماهو مستقر بعمله وهالشي انعكس مره علي لانه يحس انه مو قادر يعطيني شيء ويمكن لانه يشوفني ناجحه وموناقصني شيء فهالشيء مأثر عليه ماادري أو انه اكتشف انه مايحبني والله ماادري ..انا قلت بصبر ما ابي اظلمه أو اتخلى عنه علشان ظروف حاولت اتفهم واصبر واخليه براحته ومااضغط عليه وبالنهايه باعني برخيص..

المهم انفصلنا خلاص ماله داعي كل هالتبريرات .. بس اليوم انا مره متلخبطه ومتفشله من اهلي ومنحرجه منهم حسسني اني مره رخيصه قدام اهلي ولا كأني اسوى عنده شيء ، وماادري كيف راح اخبر كل اللي حولي مره منحرجه كان الكل فرحان فيني واخاف يرمون القصه علي ويقولون ماعندك صبر مع اني حاولت اتحمله كثير بس مافي فايده ..

حاسه انه داخلي مره مكسور وبغصه غريبه واحسه جرحني بقوة وداس علي بكل قوته ..لاني حبيته جد بقلبي وعقلي وحاولت اعطيه كل شيء واحافظ على اللي بينا واجد صعب البنت تختار واحد بصعوبه وتحبه وتبني معاه كل شيء وينهدم والاصعب اني لازم اكون قويه قدام الكل لو علشان امي .. الله يصبرني ..

بس مابقول غير الله يسامحه والله يعوضني خير .. ماابي زواج بس ابي راح البال لاني اعرف نفسي صعبه وما اتقبل أي احد ..

قولولي اي كلمه يا بنات والله مخنوقه وبرضو بسألكم عادي اطلب منه صوري والاحسن ارجع له الشبكة ؟؟ لاني قلت بغير رقمي فأدق عليه بالاول واخذ صوري وارجع له الذهب والا اغير رقمي وخلاص..:icon33: