واسوني في مصيبتي الله يأجرني عليها //اكتفى من الردود

والله مدري ليه كاتبه الموضوع مدري ابي نصايح او مواساه او افضفض
ياخواتي الطلاق يجرح يكسر الوحده واللي تقول غير كذا ادخل بعينها واقول لاتكابرين حتى لواني مرتاحه بإختيار الطلاق وعيشتي في بيت ابوي احلا من عيشتي عند طليقي يجيني الهم من الناس من نظرة المجتمع من كل شي
ان لله وان اليه راجعون اللهم اجرني في مصيبتي واخلف لي خيرا منها
هذا طلاقي الثالث وانا بالعشرينات اللي بعمري من بنات جماعتي توهم تزوجوا واللي توها مخطوبه وانا خضت ثلاث تجارب مؤلمه
المشكله اني جمييييله وكل ماحضر مناسبه الكل يسأل من اكون؟ومحافظه ومتعلمه والكل يشهد لي بأخلاقي وقلبي ابيض 
الأول رفضوه قبلي ثلاث مافكر يتقدم لي لأنه مايحلم اني برضى فيه بس يوم مالقى وحده تقبل فيه قالوا بنت عمه اولى فيه زوجوني غصب وانا في الثانويه هو عيبه خبل تعرفون وش معنى خبل يعني الناس تضحك فيه
ومعه شهادة المتوسطه ومدخلينه العسكريه وعمره 30 بس عقله عقل طفل ترى موجالسه اسبه جالسه افهمكم وضعه
اول ليله مستحي مني يبتسم وينزل راسه تحت راح ليلنا مقابلين بعض
هو في بشته وانا في فستاني انا كنت ادرس ثاني ثانوي
وعشت معه سنه لوبقول له طب من فوق السطح بيطب واذا زعلت يجلس يبكي لين ارضى طبعا انا حبيته من اول اسبوع لأنه كان يدلعني ودايم يقول احبك
ابوي كان شديد وامي قويه ولامره ضمتني اوطلعتني معها للمنتزهات
كانت تخليني في البيت عند الخدامه واخوي الصغير وماكانت راضيه ان بنتها تزوج واحد خبل بس جدي يمشي كلمته على الكل
نسيت اقولكم سنه كامله عشت فيها مع زوجي في منطقه بعيده عن اهلنا لأن شغله هناك نروح اجازات فقط
انا كنت اروح المدرسه وارجع اسوي الغداء ونتغدا مع بعض وننام واذاكر ونطلع للمكان اللي ابيه
توفى جدي ورحنا للعزا وبعد ماخلص العزا امي قالت خلاص ماعاد تروحين مع الخبل
ليش وكيف
صارخت علي تبين يجونك عيال خبول مثله وتكلم على ابوي وابوي عند امي مايهش ولاينش وانا مثله اخاف اصلا كنت اخاف اقولها بشري روج او كحل
قالت ياويلك تردين عليه
كان جوالي في دولاب الملابس
اذكر كان يدق من جواله ومن الكباين ومارديت
وسافرت مع امي وخالي وقالوا الزوجي افتح لنا الشقه فلانه بتاخذ عفشها
ودخلت انا وامي غرفتي وصرنا نحط الاغراض بالشنط وتقول خلي اللي له
وراقبت امي لين لفت عني واخذت دهن العود حقه كان دايم يحطه كنت اشمه معه كل ماجيت انام على يده احلف لكم بالله يااخواتي اني مازلت احتفظ في دهن العود حقه بنفس علبته المخمليه
طبعا حاول يقابلني بس امي رفضت وطلقني بعد سنتين محاوله
ترى للحين ابكي عليه وللحين اقول ليش ماطنشت امي ورديت عليه وللحين اقول ليش اخاف من امي وللحين اقول ليه ابوي ماقال خليها ترد عليه او قال تعالي قابليه 
تطلقت وين كلام امي يجيني اللي احسن منه
كل اللي بغوني ماعاد يبغون وحده مطلقه اخذوا بنات ماهم افضل مني بس انا غير مطلقه
عانيت من اهلي اوووول الناس عايروني بطلاقي واعتبروني عاله هم اهلي
امي مادرت عني تاكل وتشرب وتنام وتستقبل المناسبات بكل فرحها
وانا قبل كل مناسبه اموت مية مره لأني بسمع كلام واشوف نظرات تذبح
اقرب الناس لي عائلتي وجماعتي طلعوا عني كلام وعيوب ماهي موجوده فيني قريباتي في المجالس لامزحوا قالوا تعالي بالمطلقه 
اللي تشوف فيني شي احلا منها على طول قدام الكل هههه انتي مطلقه غصب تدخل طلاقي حتى لوالموضوع عن لبس او دراسه
حتى الأعياد صرت ابكي ليلة العيد من اللي بيجيني واحزن اذا انعزمنا
كنت اشوف البنات يفرحون بالإستراحات والجمعات وانا لااا
تزوجت من مطلق وراني نجوم الليل بعز الظهر مالوم زوجته يوم انحاشت عنه من شهر العسل وانا صبرت على الضيم بس عشان مارجع لقوقعة الطلاق نفسي بأسرة نفسي بطفل نفسي ادخل واطلع مع زوجي 
سبحان الله كل ماتمسك فيه اكثر كل ماشوف منه مصايب وكأنه يقول خلاص روحي لأهلك على انه مايبي هالشي بس ردي وطبعه كذا بلا رحمه
كنت اشوفه كيف يضرب خواته وأتألم واكرهه اكثر
جبار وماهمه احد تخيلوا جالسه تحت مع خواته مبسوطين وهوجاي من برا ويدخل عندنا ويروح عند اخته اللي في الإبتدائي ويدها على الارض ويدعس عليها بجزمته ويفرك جزمته على يدها وهي تناظر فيه تبكي تترجاه يبعد
كرهته كرهته وطلبت طلاقي بعد ماضربني واهانني وذلني وظلمني
جلست سنتين مطلقه ورجعت لنفس الحزن والهموم وبزياده لأني مطلقه مرتين وذبحتني نظرات الشفقه والشماته والتجريح كنت اقول ليت الله رزقني بطفل من اللي تطلقت منهم طبعا بعد كل طلاق تطلع عني اشاعات وكلها ظلم وكذب حسبي الله ونعم الوكيل
وابوي صار يسبني ويقول فضحتينا بنتهم المطلقه بنتهم المطلقه
وصار يضربني وبكل جلسه يرفع يده كأنه بيضربني ومايعطيني اشري مثل خواتي حتى الأكل يعطيهم يطلبون وانا اشتهي اكلهم واجلس اكل من البيت حتى صرت اتسلف من خدامتنا نسيت اقولكم ان ابوي يوم رحت اجيب عفشي من طليقي الثاني تفل علي بالسياره وطول الطريق يسبني وكانت معنا الخدامه وامي وحتى يوم دخلت الشقه اخذ عفشي كانت ام طليقي فيه وتفل علي قدامهم وكان يمشي وراي وانا اجمع ملابسي ويضربني مع ظهري ومع راسي مع ان ام طليقي ظلمتني وكانت تعذبني مع ولدها وكانت تقول والله لأقول فيك عند الناس وافتري عليك وفعلا اول ماطلقني ولدها تكلم عماتي وبناتهم وتقول وسخه وماتعرف تلبس وماتلبس عند زوجها
وانا يابنات قمة النظافه والشياكه وحفت رجلين من الإجتهاد له لبس وطبخ وكل اللي يطري عليكم كنت ابي احببه فيني بس ظلمتني عشان تشوه سمعتي وقالت ارحامها فيها بلاء ماتحمل مع ولدها خبرها ان حنا كشفنا وانا سليمه وهو طلع عنده عقم وقالت ان ابوها تفل عليها 
وصاروا البنات يضحكون يقولون صدق ابوك ضربك
وصاروا الناس ينظرون لي اني اتطلق لأني وسخه وان البلاء فيني
واهلي سفروا الخدامه وصرت انا اللي اكرف واطبخ حتى امي الله يسامحها تصارخ علي تقول انتي مافيك خير
تدرون ليش قالت كذا
عشاني طابخه لأهلي عشى وقال اخوي المتزوج مشتهي كبسة لحم وقالت امي سوي له قلت زوجته تسوي له 
وانا صادقه زوجته ليه ماتسوي له هي اصغر مني بسنتين وفاضيه لاشغل ولامشغله هي ساكنه فوق اهلي وعندها مطبخها بس يوميا تنزل تقلط معنا بدون احد يعزمها تعشى وتمسح يدها 
قامت امي تصارخ علي ورحت اطبخ عشى ثاني ويوم خفضت النار عن الرز دقت صديقتي ورحت اكلمها ودخل اخوي من برا وامي وزوجته جالسين قال خلص عشاي قلت باقي شوي ويصارخ ويسبني فضحني بصديقتي
احلف لكم بالله سنتين متزوج ماقد ضايقنا زوجته بشي ولاقد طلعنا لها فوق ولاقد ذقنا طبخها ولانبي لها شي حتى احيانا تنزل المغرب تقهوى من قهوتي ويكونون اهلي طالعين والله تتفق مع زوجها وين بيتعشون ويطلعون من عندي او تقول جب لي كذا ويجيب لها ويطلعون فوق ولامره قال بجيب ﻷختي معنا ولامره قالوا لحالك روحي معنا 
وخلال هالسنتين مره وحده فقط رحت معهم لسوق كانت عندنا مناسبه وبنشري فساتين وكان السوق بعيد فقلت اروح معهم لأن ماحد موديني
وكانت تاخذ شوري وتاخذ وتقيس ونتشاور على اللي لها وتقول سكري السحاب لين لقت فستان ضبط عليها واليوم الثاني نزل اخوي يقول لأمي ماخلتني انام البارح تقول ليه اختك تروح معنا وتصارخ عليه وحالتهم حاله
ويوم نزلت قلت ليه يافلانه هذا جزاتي اختار لك وتشاوريني قالت ماطلبت منك انتي اللي رحتي
من بعدها ماعاد رحت معهم لاسوق ولاغيره
انخطبت وتزوجت الثالث اخذني وهوحابني صار موقف خلاه يشوفني وصار الزواج وعشت اسعد انسانه معه وقلت عوضني الله ولله الحمد بس اهله ماكانوا راضين ياخذ وحده من برا قبيلته ومطلقه مرتين وافق ابوه على شرط بعد سنه من زواجنا يزوجه بنت منهم وحصل  بعد ماخلصت الأربعين لأني ولدت في بنت الحمدلله تزوج زوجي وكل خالاته وعماته يقولون كيف فلانه دخلت على فلانه الحلوه
كثرت مشاكلنا بسبب الغيره ماعاد اتحمل ان وحده تشاركني زوجي الكلام سهل بس الواقع مر وشديد قال لي زوجي مرة اذا انتي المزيونه الغيره ممرضتك كيف هذيك المسكينه اللي تدري اني ماخذك حب وتشوفك ازين منها
زوجي يضرب لها الف حساب عشان اهلها وعشان ابوه
خلاص شالوني من الحسبه وصاروا ينادون بنتي..بنتنا بنتنا وانتي مومنا
ابوه كل مغرب يجينا ويتكلم علي ويتكلم على زوجي قدامي انه اخذ وحده داخلين عليها اثنين قبله يقول ألفاظ قويه  واني مالقيت احد من ربعي يضفني مدري يضمني نفسيتي تعبت رحت لأهلي طلبت طلاقي خاصة يوم زوجي بوقت زعلنا يردد كلام ابوه جرحني..ارسل لي اعتذار وانه قال الكلام كان وقت غضب ومنقهر وظروف بس ماعاد ينفع اعتذاره 
تركني كم شهر لين ابوي قال له خلاص مصممه على الطلاق ودق علي قبل يومين وطلبني ارجع ورفضت واصريت ع الطلاق وجلست اصارخ عليه ابي اسمع طلاقي قال خلاص اسمعيها 
قال انتي طالق
قلت ابي اسمع ثلاث
قال ورقتك تجيك
بكيت كثير ﻷني احبه واتذكر كل شي حلو بيننا بس كرهت عيشتي عنده وكرهت نسبهم وكرهت اهله
بس بعد مارتحت للحين مهمومه حزينه
بنتي ماكملت سنه كأنها يتيمه 
اذا جاء اخوي من الدوام تلحقه في المشايه وهي مبتسمه وهويروح يشيل بنته اللي عمرها ثلاث سنين ويضمها ويقول هلا هلا وبنتي رافعه راسها تضحك وهومادرى عنها  والله تعبت ومدري كيف بقابل الناس وانا مطلقه لثالث مره مدري كيف بتحمل الضغط النفسسي مدري كيف بتحمل معاملة اهلي وشغل البيت وللحين ماعندي غرفه عفشي وملابس بنتي بالسيب طايحه بأكياس وشناط ونومنا في المجلس مافيه الا غرفه فاضيه كانت للخدامه قلت بحط عفشي فيها بس اخوي رفض عشان زوجته تبيها لأهلها اذا جو يجلسون فيها مع ان اهلها يجون بعد سنتين مره لمده يومين واساسا الغرفه في بيت عائله ماهي بشقتها بس اخوي وزوجته كلن يعرف عنهم هذي الصفه ان ودهم يملكون كل شي
ولااحد له كلمه على اخوي وزوجته
مشكلتي ماهي غرفه بس افضفض لكم
مشكلتي ألم الطلاق ونظرة الناس مدري كيف بقابلهم ومدري كيف بتحمل  اشاعاتهم واكاذيبهم علي