الله يجزاك خير ويكتب أجرك

اسعد الله صباحكم ياجميلات

راح اشرح لكم افضل طريقه للبخور ..
هالطريقه اخذتها من وحده عمانيه الله يسعدها وين ماكانت ..
اسمه (بخور السكر)
راح تستغربون من الاسم .. وبتجي ببالكم تساؤلات .. كيف سكر ؟ وكيف طريقته؟ وكيف بتصير ريحته؟
وانا بريحكم من هالاسئله ..
البخور العادي ان سويتيه بالطريقه التقليديه ماراح تستفيدين لانه راح يطلع معه دخان كثييير وتضيع ريحه البخور .. وبعض المرات ماينجح معك بحيث تبخرين والريحه تمام لكن 5 دقايق ولا كأنك بخرتي ..
فالفائده من اضافه السكر هو لتثبيت رائحه البخور بالبيت وجعله يدوم لوقت اطول

مكونات البخور هذا بسيطه وغير مكلفه .. والنتيجه روووعه ومنافس للبخور المتواجد بالمحلات وباسعار باهظه الثمن ..
هالبخور ياحلوات ماراح يكلفكم من 100 الى 120 ريال تقريبا وتسوين منه طول السنه او اكثر .. ايش رايكم؟
مكوناته عباره عن ..
عود خام( دقة العود) 》》 اخذته من بانافع الكيلو ب20 ريال فقط ويكفيك لسنه تقريبا مررره كثيير
3 الى 5 زيوت عطريه ع ذوقك بنسب متساويه ماعدا نوع ركزيه اكثر من بينهن .. مثلا انا خلطت (لافندر+روح البخور+عطر البودره+اصفهان) وزدت تركيز اصفهان بمعنى تكون نسب الزيوت كالتالي 4:2:2:2
كوب سكر (ابيض او بني )
نص كوب ماء (مقطر او ماء ورد)
وبس
ملاحظه* لازم يكون العود خام لانه اذا بتسوين بعود مستخدم من قبل وعليه اصباغ ف ماراح تستفيدين ابد وبتطلع معك ريحه مو زينه وكذلك لانه العود الخام يتشرب الزيوت بسرعه ..

اول شي راح تسوينه انه تكونين خالطه هالزيوت مع بعض وبالنسب اللي ذكرتها وتكونين مخمرتها لمده 3 الى 5 ايام في زجاجه غير شفافه واذا ماعندك قصدريها وسوي منه كميتين يعني زجاجتين واذا تبين تغيرين بالنسب بينهن براحتك او بتغيرين روائح زجاجه عن زجاجه كمان براحتك مثلا زجاجه خلطتي فيها(لافندر+بودره+روح البخور+اصفهان) وزجاجه ثانيه (روح البخور+اصفهان+ارماني ملكي+بودي بربري) ويكون الزيت اللي بتزيدين تركيزه هو نفسه للزجاجتين يعني تركيز اصفهان عالي بالزجاجه الاولى كذلك للزجاجه الثانيه يكون عالي التركيز》》 ان شاء الله وصلت الفكره
ثاني شي بعد الخمس ايام تاخذين كميه من البخور اللي تشوفينه بيتشرب الزيووت .. مثلا كوب وانتي شوفي لما تخلطين اذا تشرب الزيوت كلها او يحتاج تزيدين او تنقصين .. طبعا تاخذين زجاجه وحده بس والثانيه اتركيها لبعدين ..
مثلا بعطيكم الكميه اللي معتمدتها ..
كوب بخور + 80 جم من الزيوت العطريه بمعنى اكثر بقليل من نص الكوب
تخلطينه تمام وتحفظينه بعلبه زجاج غير شفافه وتتركينه يتشرب الزيوت لمده اسبوعين بالتمام
(الطريقه سهله لكن انها تاخذ وقت لكن سوي لك كميه كثيره)
انا هالكميه تكفيني شهرين الى 3 شهور تقريبا