والحل مع هالمجنونة؟؟؟

صباح الخير.. الصراحة مش عارفة من وين أبدى، بس يا بنات في ناس ربنا باليهم بالجنون والحقد الله يكفيكم شرهم..

القصة وما فيها إنه أنا ساكنة في شقة تحت شقة أهل زوجي، وبالمقابل إلنا ساكنين اثنين من أعمام زوجي واحد فوق وواحد تحت وبجنبهم عمة زوجي وزوجها.

المهم ربنا بالينا بزوجة واحد من أعمامه، شرانية وحقودة على الآخر... ما في حدا في العائلة بحكي معها، معادية الكل من لؤمها وبوزها اللي دائما شبرين.

من أول ما خطبت كنت أروح أزور أهل زوجي وكنت أصدفها أسلم عادي أقول صباح الخير مساء الخير، كانت تتطلع فيه بحقد وما ترد!! وأنا ما بعرفها لسة بس من باب الذوق، كنت أقول لخطيبي وقتها شو مالها هاي يقولي إنسيها هذي لئيمة.

المهم يوم عرسي أجت على العرس ولو تشوفوا شكلها كيف جاية على العرس لابسة ملابس متل اللي قايمة تشطف البيت، في الوقت اللي كان بعد عرسنا عرس ابن عم زوجي أجت وهي على سنجة عشرة، يعني بالعربي محتقرتنا!

المهم اتزوجت وأنا عادي بسمع قصصها إنها لئيمة ومعادية الكل ودائما عندها مشاكل مع سلفتها اللي فوقها ودائما عداوة، بس حماتي كانت اتطنش وما تتخانق معها لإنها طيبة كتير... قعدت معها كام مرة وأعوذ بالله من هيك نفسية، حش وكلام على الناس يا لطيف لا تطاق بس كنت أجامل أقول ما إلي فيها.

المهم حملت أنا وهي بعدي بكام شهرت حملت برضوا، وولدت أنا وما أجت باركتلي ما بعرف شو السبب، ما صار شي بينا نهائياً.. وهي خلفت بعدي وما رحتلها أكيد لإنها هي ما عبرتني، المهم في هاي الفترة هي دائما مشاكل مع كل العائلة وصدامات.

وفي يوم اتصل عم زوجي الكبير هو ساكن في غير مكان، قال لازم انحل المشكلة مع أخونا الفلاني وبكفي مشاكل، بدنا كلنا نروح نباركله في المولود الجديد... وأجت حماتي وقالتلي هالكلام، أنا قلتلها كيف بدنا نروح وهي ما عبرتني لما ولدت، قالتلي حماتي معلش معك حق بس مشيها خلينا نختصر الشر، قلتلها حاضر كلامك على راسي، ورحت اشتريتلها هدية ورحنا كل العائلة رجال وستات عند جنابهم وباركنالهم، وبعدها استحت على دمها هي زوجها وأجو باكرولنا بعد ما صارت بنتي ست شهور وما بدي أحكي عن الهدية المقرفة اللي جابتها مستعملة من أولادها دليل على استهزائها فينا وبروضوا مشيتها.

ومرت الأيام وهي ما بطلت عادتها وبروضوا مشاكل مع الكل وأنا كافية خيري شري أنا وحماتي.

ومن سنتين صار سلفي بدو يتزوج وكان في مشاكل لإنه ما كانت العائلة موافقة عليها لأسباب ما بدي أذكرها، وفي الآخر وافقوا لإنه سلفي صمم عليها وحددوا موعد العرس وجناب الملكة ما عجبها وما خلت علينا كلمة إلا وحكتها وتسمع كلام لحماتي وحماتي ساكتة من طيبتها.

وقت العرس حماتي اتصلت تعزمهم وراح العريس على بيتهم يعزمهم وجنابهم ما أجو على العرس، ووقتها أنا كنت حامل في ابني وبصراحة بطلت أسلم عليها لا صباح ولا مسا لإني كنت مقهورة من الكلام اللي كانت تقوله علينا وكمان هي لوحدها بطلت تسلم علي.

وبعد كام شهر ولدت أنا وبرضوا ما أجت باكتلي ولا عبرتني، ويوم بعد الأربعين كنت طالعة من البيت وكانت هي وجارتنا واقفة برا وجارتنا باركتيلي وهي جنبها ولا كلمة ولا عبرتني ولا الحمد لله على سلامتك حتى.

وعملنا حفلة علشان المولود الجديد وطبعا ما عزمتها وهي انقهرت وصارت تلطش كلام لعمة زوجي وأجت عمت زوجي وقالتلي إنها زعلانة ليش ما عزمناها ولا حدا فينا بعبرها، قلتلها كيف أعزمها وهي حتى ما قالتلي مبروك ما أجاكي، أنا شو عملتلها؟ ولا جتى أجت على عرس سلفي!

ومن وقتها قطيعة، وطبعا بنتي وابنها كبروا، وكل يوم بطلعوا بلعبوا باب البيت، وبنتي وابنها كتير متعلقين في بعض، أطفال وبدهم يلعبوا، أنا عادي ما عندي مشكلة بالنهائية هم أطفال وحرام ندخلهم في قصص الكبار، وحتى لما أعطي بنتي شوكلاتة أو شي بعطيه متلها، وهي لما تشوف هيك على طول بتسحبه على البيت.

وآخرتها امبارح بنتي طلعت برا تعلب مع ابنها صار يقولها ما بدي ألعب معك أمي قالتلي ما تلعب مع فلانة اللي هي بنتي، بنتي زعلت ونزلت عيونها بالأرض، أنا انفجرت لما شفت بنتي بس ما قلت شي مع إني عارفة إنها المجنونة واقفة بتتفرج على الشباك، قمت أخدت بنتي وقلتلها يالله تعالي انادي فلانة تلعبي معها.

وقلت لزوجي وحماتي، زوجي انقهر وانجن وحماتي، وقالولي إذا أجا هو أو حدا من أخواته يلعبوا جنب بيتنا اطرديهم على طول وخلي أمهم تحكي شي وقتها خلينا نفرجيها شغلها هي زوجها اللي ما إله شخصية.

شو رأيكم في هالمخلوقة الغريبة هاي، ما بعرف ليش كل هالحقد مع إنه ما حدا فينا عملها شي، وهي دائماً مشاكل مع كل العائلة وما حدا بطيقها ومسيطرة على زوجها وأولادها وكلهم مقاطعينا!

من بعد موقف بنتي أنا مقهورة منها على الآخر ومع ما كنت بدي أنزل لمستواها بس قررت أعاملها بنفس أسلوبها!


نسيت أقولكم على موقف مرة عملتله، من سنة ونص تقريباً اتوفى عم زوجي هو ساكن برا البلد، وحسب العوايد لازم العائلة تعمل أكل للمعزيين، وطبعاً الأخوة كلهم بشتركوا في تكاليف الأكل، فحضرتها منعت زوجها إنه يدفع وبررت إنه هذي كلها تكاليف ما إلها لزوم وإنهم ما راح يشاركوا وطبعاً ما شاركوا، حضروا العزاء ربع ساعة متل الأغراب وبعدين طلعت هي من قاعة النساء ورنت على زوجها وخلته يطلع من قاعة الرجال وأخدته وراحوا على البيت والناس ما خلت ولا كلمة عليهم!! وبعد العزاء بفترة قصيرة كان العيد، والكل طبعاً حزينين وا عيدوا، وهي ولا همها لبست ملون ولبست أولادها وطلعت تعيد هي وزوجها وأولادها ولا كأنه في حدا ميت! وهذا الشي اتكرر في أكتر من عزاء للعائلة!1!