السلام عليكم ورحمة الله وبركاته ...
كل وحدة منكم أكيد حاسة يعني وشهو ( أب ) وأكيد كل أب وله مواقف مشرفة بل بطولية مع عياله وخصوصا البنات ... عاد أنا أبوي شي ثاني وأكيد كل فتاة بأبيها معجبة بس بقولكم شئ بسيط عنه وشوفوا يستاهل كلمة بطل وإلا لا...
أبوي (الله يشفيه ويطول بعمره) مشهور بالقسوة والجمود وإنه مايحب المجاملات والناس كلهم يهابونه ويحترمونه أنا وخواتي خمسة بنات الناس كانوا يحزنون علينا على بالهم إنه طايح فينا ضرب وصراخ في حين إنه كان قمة الحنان والرافة بنا طبعا شئ طبيعي أن الأب يكون حنون على عياله وخصوصا البنات لكن بطولة أبوي ظهرت في زواجاتنا وبعد زواجاتنا
يوم كنا نقضي أغراض العرس عمرك يابوي ماقلت لوحدة منا لا هذا غالي وإلا كفاية كذا كنت تزيد من جيبك على مهورنا ولاتخلي نفسنا في شئ ماناخذه
في كل صلاة يابوي كنت تدعي لنا بالستر والصحة والسعادة والذرية كنت اسمعك بنفسي
يوم نمرض يابوي ماكنت تقول خلاص متزوجات كنت تصر علينا تودينا المستشفى حتى وإنت مريض
حتى يوم نزعل ونجيك عمرك ماسألتنا وش إللي صار كنت تطمنا أنك معانا وإن مابيصير إلا إللي يرضينا
تذكر يابوي يوم زعلت أختي من زوجها وكانت في مدينه ثانية وكانت تدرس تذكر إنك تركت كل شي ورحت سكنت بنفس المدينة وأخذتها في بيت هي وبنتها وصرت تداوم بها كل يوم للكلية عشان تكمل دراستها وتركت أمي و أخواني وبيتك وراحتك كله عشان لاتفرح زوجها إللي طردها فيها ولاتخليها تحس بطعم مايسمى (قهر الرجال ) لاوأختي كانت ماتصحى إلا فطورها جاهز وكنت توديها بنفسك للكلية ..وتذكر الحادث إللي صار عشان كنت مستعجل توديها عشان المحاضرة لاتفوتها.. والخساير اللي تحملتها وكنت تقول عادي أهم شي ماتضايقين نفسك وإلا تزعلين
يوم زعلت أنا مع زوجي وبغيت اتطلق منه ماسألني أبوي ليش بس قال لي الطلاق موزين وإنت عاقلة وأنا عارف وش إللي تحملتيه وإللي تبينه بيصير قلت له يابوي خايفة على عيالي يضيعون ... قال لاتخافين عليهم تبين ترجعين بيتك من بكرة ارجعك وراسك مرفوع وماعليك من الناس ماعاد تبغينه هالرجال أنا من بكرة أفضي لك شقة من البيت واسكنك إنتي وعيالك فيها وأصرف عليكم بعد بس الطلاق يابنتي دمار..وفعلا خرج المستأجر وراج جدد لي الشقة على ذوقي أنا وقالي هي تحت تصرفك وعطاني فلوس قال روحي جيبي ملابس أو أي شي تبينه بس لاتقطعين قلبي ببكاك ..وشوفي الأكل إللي يناسبك وأنا أجيبه بس أشوفك تاكلين وتسولفين وتضحكين
كنت أشوفك يابوي تقوم تصلي وتدعي لي كنت أشوفك لاحطت أمي الأكل تجي من بعيد تشوفني آكل وإلا لا وكنت أشوف ابتسامتك وفرحتك لاشفتني أحط اللقمة بفمي
ماعمرك قلت لي كلمة تزعلني بس تقول إللي تبينه يصير يابنتي وخلي راسك مرفوع ولاتشيلين هم وأنا على قيد الحياة ( ملاحظة : الناس وأولهم أمي كانو يلومون أبوي على الوقوف في صف البنت من دون مايفهم السبب بس ماهموه يقول البنت ضعيفة إذا أنا مانصرتها ووقفت جنبها من يوقف معاها )
وحتى يوم هو مريض إذا اتصلنا فيه يرفع صوته ويضحك يقول أنا بخير أهم شي انتم لاتقلقون ...حتى وإنت مريض يابوي خايف علينا
وقصص كثيرة تحكي بطولة أب مع بناته وأكيد في آباء كثير مثله الله يحفظ كل أب لعياله
المهم ألحين إن ابوي البطل (عساني أفديه ) جاته موية على الرئة وماعرفو الدكاترة وش سببها ويقولون كل التحاليل سليمة وأنا كنت مطمئنة بس لاحظت أخواني مهتمين زيادة لدرجة مرة كان عنده موعد في مستشفى حكومي كبير دخلوه بواسطة فيه كان أخوي الصغير مسافر وقتها أخوي الثاني جاء مع إنه ساكن في مدينة بعيدة يمكن ست ساعت جا بس عشان يروح معاه الموعد وأخوي الكبير راح شرى له سيارة جديدة وجابها هدية
المهم أنا شكيت ورحت بحثت عن المرض أمس واكتشفت إن من بعض أسبابه .... أورام سرطانية على الرئة ...ومن ساعتها وأنا ابكي وسألت وحدة من خواتي قالت هم شاكين وراح ياخذون عينه ويفحصونها
وألحين ماعندي إلا الدعاء إن الله يشفيه ويطول بعمره ولايبتلينا فيه ولا يورينا فيه شر والله أخاف عليه من الكلمة لاتجرحه ويحس بألمها في قلبه فما بالك هالمرض عاد ...والموت الواحد مايقدر يرده عن أحبابه بس الدعاء والبلاء يدفع بعضهما البعض لين يوم القيامة
وأكيد كلكم بنات حلال وفيكم من هي مستجابة الدعوة ماعليك إلا إنك ترفعين يدينك وتقولين هالدعاء ( اللهم اشف والد الجليلة الأزدية ووالدتها وأطل عمرهما في طاعتك وأحسن لهما الختام ) يمكن الله يدفع عنك مصيبة إنتي غافلة عنها أو يرزقك بشي تتمنينه بتفريجك لهم أختك المسلمة ودعاؤك لمسلم بظهر الغيب :44:
الجليلة الأزدية @alglyl_alazdy
عضوة فعالة
يلزم عليك تسجيل الدخول أولًا لكتابة تعليق.
امنيتي الامومه
•
الله يشفيه ويخليه لكم
يااااااااااااربي يحفظه لكم ويشفيييييييييييييييه ويطول بعمره ..
مره قطعتي قلبي .. الله يخليه لكم
مره قطعتي قلبي .. الله يخليه لكم
الله يطمنكم عليه ويرفع عنه البلاء ويشفيه و اميمتك وكل مسلمالله يطمنكم عليه ويرفع عنه البلاء ويشفيه و اميمتك وكل مسلم
الله يسعد كل من رد ولا يبتليها في غالي
الصفحة الأخيرة