والدي والسرطان وسر شفاءه بعد الله ...

هذه القصه تقريبا من ثمان سنوات..

طبعا أبوي ماكان لايعاني من شيء أبدااااا وعنده متابعه كل 6أشهر في الباطنيه في المستشفى الجامعي وكانت آخر متابعه له في شهر شعبان والمتابعات السابقه كانت سليمة ولله الحمد ..
طبعا في آخر موعدله عزم على عدم الذهاب ولكن أمي ألحت عليه وبشدة ذهب وعمل جميع الأشعة اللازمة ثم رجع (لأنا إحنا موموجودين بالرياض) والنتيجة بعد كم يوم ..
عمي الله يجزاه خير لأن له علاقة بكبار الأطباء وله مكتب في المستشفى(عمي دكتور بالجامعه) فتكفل بنتيجة والدي
بعدها بكم يوم دق أبوي على عمي يسأله عن النتيجة طبعا عمي عرف وش في أبوي
(سرطان بالرئة)
طبعا عمي مابلغ أبوي مباشرة قاله الأطباء شاكين
إما التهاب شديد جدا أو درن أو بداية خلاياسرطانية ...
ولازم تجي للمستشفى علشان يسوون لك تحاليل وأشعة أوسع ويتأكدون أكثر ..
طبعا إحنا تفاجئنا وتوقعنا مباشرة إنها خلايا سرطانيه بس تفاجئنا مافيه أي أعراض مرضيه على أبوي قبل حرارة مثلا أو تعب وإرهاق أبداااااااااااااااا ماكان يعاني من شيء ..
طبعا أبوي رجل صالح نحسبه كذلك ولانزكي على الله أحدا لم يؤثر ذلك فيه ...
ذهب والدي أخذ أغراضه ملابسه وثيابه يووووه تقطع قلوبنا وأبوي يروح أصعب لحظه واحنا نودعه أنا ماقدرت بكيت حيييل لما شفت أبوي ضام أختي الصغيره (سنتين) وخانقته العبره حبيت على راسه وإيده وأنا أبكي ماقدرت أقول شيء ..

تخيلوا في الطريق دق أبوي ويثبتنا ويصبــــــــــــــرنا وهو في السيارة حتى لحاله مامعه أحد والمشوار تقريبا ساعتين...

بعدها بأربع أيام رجع أبوي .... أبوي في قرارة نفسه عرف مرضه بس الأطباء لسا ماصارحوه واحنا مابعد تاأكدنا ...

أخذوا من أبوي عينات من الغدد علشان يشوفون إذا المرض واصلها أولا ...
سبحان الله إذا كان المريض راضي بالقضاء والقدر والله ينعكس على أهله ...
والله مع أبوي طيلة مرضه كأن ماعندنا مريض أبدا ياأكل معنا يروح ويجي لأي مكان نبغاه يودينا يضحك ويعزم رجال ويكشت في البر والله راضي ...

في أول رمضان يمكن اليوم 2أو4 ماأذكر بالضبط راح أبوي للرياض عنده تنويم أول مادقينا على أبوي في نفس اليوم قال أبوي الأطباء يقولون التهاب شديد أبوي يبغى يخفف الصدمة علينا (طبعا الأطباء بلغوه أول ماراح) يحكي لنا أبوي موقف الأطباء معه يقول والله هم يعانون كيف يبلغون المرضى بمرضهم يقول وأنا أشوف الدكتور عندي يدخل ويطلع ويقول (عبدالرحمن) ماودك نطلع برى نتمشى في الحديقة يقول أبوي قلت له تعال يادكتور عندي أنا عارف وشفيني إنا لله وإنا إليه راجعون اللهم أجرني في مصيبتي واخلفني خيرا منها.. يقول أبوي ارتاح الدكتور..
واليوم الثاني بلغنا أبوي بمرضه والحمدلله ماجزعنا أبدا بالعكس والله أمي ماشاء الله عليها ثابته فلك الحمد والشكر..

طبعا سرطان في الرئه (كان نقط خفيفه في الرئتين) ومصدره الأساسي الغدة الدرقيه كان فيها سرطان أيضا واستغرب الأطباء جدا كيف وصل الرئة لأنه ليس بمدخن ولم يجالس مدخنين..

أغلب رمضان ماكان أبوي معنا أول مرة في حياتنا نفارق أبوي هالمدة وفقدنا أبوي أكثر وأكثر لأنه مؤذن ودايم نسمعه أثرت فينا هذي كثير حتى خالتي (ساكنه فوقنا) تقول والله أبكي لما أسمع الأذاتن وأقول الله يرده لمئذنته ...

طبعا الأطباء حددوا لوالدي عمليه في 10شوال قبل العمليه استمر في الرقيه الشرعيه لنفسه وأيضا شيخ يقرأ عليه
سبحان الله العجيب بعد الجلسة الأولى عندالشيخ (أبوي كانت لحيته طويله) في الجلسة 3لما رفع الشيخ لحية أبوي ارتااااااااااااااااااااع قال وشذا وشفيك كلهاااااااااااحبوب حمرااااااااااا كثيرة جداااااااا فعرف الشيخ إن مرض أبوي على سبب (عين) أعطاه زيت مقري فيه وأصلا أبوي عنده زيت ومويه وحبه سوداوحلبه قاري فيها وكان يستخدمهن خلال مرضه ...

أبوي يوميا يقرأ سورة البقرة في النهار والليل يرقي نفسه طول الوقت يعني طول وقته قرآآآآآآآآآآآن ودعاء يقوم قبل الفجر يبكيييييييييييي ويدعي بيقين وانكسار وحسن ظن بالله حتى الصدقه ماخلاها ...
والحمدلله سوى العمليه وشالوا الغدة كامله وبعد أربع أيام في البيت عندنا ونفسيته أحسن مايكون ....
أهل ديرتنا كلهم جو يسلمون عليه (يحبونه) واحد من العمال في ديرتنا يقول (بابا عبدالرحمن قلب أبيض)
أبوي كان مدرس بس متقاعد سبحان الله في نفس السنة اللي تقاعد فيها جاه المرض
وبعض المدرسين فقدهم أبوي ماجاوا له والله إنه راح وسلم عليهم في المدرسه وهو ماله أسبوع من العمليه ..
والأذان على طول رجع له بعد مارجع من العمليه...
والحمدلله رضى أبوي بقضاء الله وقدره أثر علينا كثير والله العظيم كأن ماعندنا مررررررررريض في البيت..

طبعا اللي في الرقبه استأصلوه بس باقي اللي في الرئه طبعا مايقدرون يسوون له عمليه لازم علاج نووي وقرروه له بعد 3شهور ...
ولازال أبوي مستمر على الرقيه الشرعيه والدعاء ...

تصدقون مرة ناداني أبوي أدهن ظهره لقيته كله حبببببببببببببوب صغيره حمراء بعد3شهور سافر أبوي للرياض علشان العلاج تعرفون كيف العلاج يعني
خلوه 4أيام في غرفه لحاله يعطونه حبه كل يوم ملابسه يرمونها ماأحد يدخل عليها يالله الأطباء حتى المويه اللي بعده لها مخرج خاص تخيلووووا
أربع أيام ماكلمنا أبوي مانعينه حتى من الجوال....
وسمحوا له بالخروج بعد6أيام يومين بس زيادة بالمستشفى لأن النووي لازال في الجسم

ومنعوه لمدة 3أيام زيادة ماأحديسلم عليه إلا مصافحة ولايقبل الأطفال وملابسه تغسل لحالها والأكل لحاله والله تعبت نفسيتنا في هالحاله ... بس هو ماشاء الله عليه ..

وأمي كانت حامل فلازم يكون بينهم مسافة متر حتى ماتأثر على الجنين ..

بعد شهر كان عند أبوي موعد يشوفون تقبل الخلايا للعلاج قبل الموعد بأسبوع سافرأبوي لمكة بالسيارة(وهو اللي يسوق ومعه أحد إخواني علشان يساعده لويحتاج) جلس أبوي في مكة 3أيام ورجع بعدها ولما راح لموعده سووا له أشعة وكانت نتيجتها
مااااااااااافيه ولاأثر للخلايااااااااااااااا راحت كلها
سجد أبوي عند الدكتور
بلغنا مباشرة بكيت و أمي وأخواتي وأخواني
خالاتي وعماتي كلهم بكوا لأن مرضه كان فجأه ....

فلك الحمد أولا وآخرا لك الحمد كما ينبغي لجلال وجهك وعظيم سلطانك...

طبعا أبوي قبل مرضه رأى رؤيا لكن مابلغنا بها إلا بعد شفاؤء
رأى إنه مع ثنتين من عماتي(طبعا هم متوفيات بالسرطان) يقول أبوي هم ذهبوا في طريق وأنا في آخر فعلمت أنه يصيبني نفس المرض ثم أشفى منه,,

ورؤيا أخرى خلال المراحل الأولى من مرضه وتفسيرها تعاني الآن من مرض وستشفى منه

وأخرى لكنه بعد رجوعه من مكة كانت صريحة جدا يقول رأيت رجل يمشي مسرعا على جبل وكله نور ويقول أبشر بالشفاء ياعبدالرحمن.....

أسأل الله أن يطيل في عمر والدي ووالدتي على صحة وعافيه وطاعة وبركة وخاتمة حسنة....



لوكان والدي متشائم وجازع وساخط وكثير البكاء والحسرة فكيف سيكون حالنا,,,

أسأل الله أن يجبر كسر قلوبكم ويصب عليكم الرضا والثبات صباصبا ولايجعل للحزن في قلوبكم مكانا وأن يملأها رضا وسعادة بالقضاء