والله الظاهر انا هذا حظي معهن 🥲

السلام عليكم 
العاملات المنزليات حظ يانصيب 
كنت مو مقتنعه في هذا الكلام واحسب انه من المعامله ياتخليها تزبط او تخليها تضرب
طلع بعد معاشرتي لهن المسألة كلها حظ يانصيب 
اول عاملة جبتها فلبينية اشتغلت ٣ شهور ثم اضربت عن العمل على كلامها وكلام اغلب العاملات(( بابا موت انا يبغى روح )) وطبعا عقب تكتشفين من شغالة امك انها تكذب كل مافي الحكايه انها ملت وتبي ترجع طبعا قدمت انا وسلفتي وام زوجي سوى عام ٢٠١٨ انا اضربت 
ام زوجي اليومك عاملتها عندها ماسافرت ابد ومبسوطه رغم ان آم زوجي شديده وحازمة ودقيقه بالنظافه ومن النوع اللي ماتاخذ وتعطي مع العاملات كلمة ورد غطاها  الا ان عاملتها تعشقها وماتبي تسافر ومبسوطه
نجي السلفتي نفس الشي عاملتها عندها الى الان سافرت اجازة شهر الديرتها ورجعت لهم وتعشقهم وتحبهم ومسؤله عن الاطفال وسلفتي صحيح مش دقيقه بالتنظيف وماتهتم لكن مسؤلية الاطفال عليها ومع ذلك مبسوطه ومرتاحه العامله وبالدليل راحت ورجعت
نجي لي انا جتني اول ٢٠١٨ واضربت بعد ٣ شهور عن العمل  وفكت اضرابها عندي شهر زيادة عشان حق التذكره وبعدها اخذت راتبها وعلى اول طيارة
الثانيه جلست عندي سنتين لكن لو هي لكيعه والله ماتجلس لانها كانت فيها زي التخلف والغباء ووضعها مو طبيعي وصبرت عليها ومشت معاي سنتين ثم سافرت رغم غبائها طلبت منها ترجع لي لانها افضل من غيرها وخفت ما اتوفق مع الثانيه لكن رفضت ماتبي تجيني وراحت تشتغل بالكويت بالتوفيق لها كثر خيرها جلست سنتين
الثالثه ماهي يم الشغل ماتنظف وصبرت عليها واعلمها بهدوء تسلك لي لكن التنظيف ولا٣٠ بالمئه بختصار يوميا فقط تكنس الصاله وتغسل المواعين فقط هذا شغلها باقي البيت وسخ الملابس تجلس عندها شهر ماتغسلهم ومع ذلك سلكنا ومشينا وسكتنا ابد ٦ شهور وماعجبها هربت من البيت تبي فرصه قبل رمضان تعرفون العروض 
قلت خلاص انا غسلت يدي حظي مع العاملات زفت انا انسانه مو موفقه معهن لازم اقتنع وماعاد اجيب وخساير وقلق بتعامل مع الساعات تجيني مرتين او ثلاث مرات بالاسبوع انظف وتطلع هذا اللي ينفع لي وممتاز لي  ،، أتفاجأ تدق جارتي وتقولي عندي لك على ضمانتي عاملة فلبينيه ممتازة مررره جالسه عند اختي لها شهر جربيها ترى كل طلبها غرفه خاصه واختي بحكم انها بشقه ماتقدر توفرلها غرفه خاصه وابد لك أسبوع تجربه
كلمت العاملة كانت واضحه معاي قالت انا لي شهر عندهم وماناسبني وضعهم انام مع الاطفال و قالت انا ابي غرفه خاصه وما احب اطلع مولات مع المدام والاطفال ولا احب اطلع من البيت بصفه عامه شغلي في بيت المدام وبس ،، قلت عز الطلب وهذا يناسبني لكن بيبي اذا بطلع احطه عندك قالت مافيه مشكله يا مدام عادي
الادمية اشتغلت عندي لها تقريبا ٣ اسابيع رهيبه ونظيفه ودقيقه خصوصا مقارنه بالي هربت كانت هذيك ماتنظف الدرجة مكانس الكهرب نظفتهن من جوى بدون ما اطلب منها  وتعقمهن وتبخرهن الحمامات بعد ماتغسله ترش معطر جو يعني بختصار الادميه بيرفكت
اخذتها ونقلتها في اسمي
اتفاجىء قبل امس انزل مثل العادة الاقي البيت مو منظف مواعين الفطور على حالها ماسوت ولاشي وطالع في الساعه ١ الظهر رحت غرفتها الاقيها منسدحه وتقول يامدام انا جسمي متكسر وتعبانه برتاح ساعه قلت خذي بنادول ولك ساعه راحه ثم انزلي نظفي قالت طيب مدام خليتها وفعلًا بعد ساعه نزلت ونظفت ومشيتها اها ولاعلى بالي ،، خلصنا من قبل امس نجي الامس نظفت عادي وطبيعي والامور تمام اليوم اصحى ١٢ :٣٠ الظهر الاقيها مرسله لي بالواتس يامدام إبي أجازه يوم واحد .. مارديت عليها طلعت غرفتها سألتها وش المشكله؟؟ قالت جدتي توفت وانا حزينه قلت اوك هذا امر الله والحمدالله لكن حبستك بالغرفه ماهي علاج انزلي نظفي البيت قايم قاعد 
وفعلا نزلت ونظفت .. انا ما اقتنعت بسالفة جدتها وادري تتحجج عشان ماتشتغل الحرمه نشيطه وشغيله لكن ماادري ليش تسوي هاالحركات ولا ادري وش تبي ؟؟ وسالفة كل يوم والثاني الاقيها منسدحه  بسريرها وتتحجج هذي مره ضايقتني وسببتلي توتر
انا والله ماادري وش اسوي هل ادق على جارتي اقولها عن اللي حصل ويتصرفون والله خايفه فلوسي تطير علي وتطلع الحرمه مو حقت شغل انا ما احط في ذمتي ابدا انها غشتني لكن والله قلبي نغزني هذي مو بتجلس يوم او يومين بتصبر عليها هذي بتجلس سنتين مادري انتم وش رايكم اخواتي افيدوني
هي سبق اشتغلت عند ناس سنتين وكم شهر ثم راحت ديرتها ورجعت الاخت جارتي وجلست عندها شهر ثم تنازلت عنها لي 
مادري هي وش براسها او وش تبي بالضبط والله خايفه فليساتي تطير