والله حرام..مشكلة جارتي..

الأسرة والمجتمع

حصل لي موقف وحبيت أشارككم وأسمع رأيكم فيه..اتمنى ماتبخلون علي بأول موضوع لي

_________________________________________

المكالمه الأولى:

اتصلت علي جارتنا من اسبوع تقريبا وهي امرأه متزوجه ماشاء الله يمكن من عشرين سنه

قالت لي: مشاعل تعرفين للنت؟.....قلت لها: ايه.....قالت: طيب يعني ايش دردشه؟؟!!؟؟

انا احترت بصراحه شلون اوصل لها المعلومه...لانها ماعمرها مسكت جهاز ولاتعرف

حتى شلون تشبك الفيش

حاولت ابسط لها الفكره..وقلت لها هذا موقع أي واحد ممكن يدخل بأسم مستعار

ويسولف مع الناس

قالت شلون يعني؟؟.....يعني في أي وقت القاهم..؟؟؟ قلت لها: لا هم موجودين 24

ساعه مايقفلون ابد

وقلت لها السواليف بين رجال وحريم عادي...وغالبا بصراحه وللأسف تكون سواليف

مالها معنى..وخربطه وممكن تكون كتابيه وممكن صوتيه...المهم.......هو وسيلة

تعارف بصراحه وفساد للأسف للكثيرين

قالت: طيب واللي يسهرون عليه بالليل كيف اخلاقهم؟؟...قلت: انا مااقدر احكم على

اخلاقهم ممكن واحد فاسد ويدخل عز الظهر..وممكن واحد انسان خلوق لكن طفشان

ومافيه النوم وداخل بنص الليل..هالشي يعتمد على شخصيه الانسان وقوة ايمانه

وقدرته على مواجهة التيار وعدم الانجراف..

قامت الحرمه تبكي..وسكرت السماعه بوجهي..

المكالمه الثانيه:

بعد يومين اتصلت سألت: مشاعل تفهمين في الفقه؟؟.....قلت لا عاااااد نت

وبلعناها..اما فقه قويه!!!

لا والله من قال لا اعلم فقد أفتى..قالت طيب لو واحده بينها وبين زوجها عشرة سنين

طويله واكتشفت انه يسلك سلوك

غير حسن وحاولت تناقشه وتفهم السبب.....وقال لها: انتي عمرك ماكفيتني...هل هي

عليها ذنب في هالحاله؟؟!!؟؟

قلت والله انا ماأفتي بس اقولك رأيي...هو غلطان دام انها ماتكفيه يروح يتزوج ليش

يدور على الحرام..؟؟

وبعدين عشرة سنين طويله توه يحس انها ماتكفيه....قلت لها والله انها كافيته بس

عقب ماشاب ودوه الكتاب يعني كبر وانهبل...وسلك طريق الحرام وشاف المنكر فالان

فعلا اصبحت زوجته ماتكفيه

زوجته العفيفه الفاضله اللي متربيه في بيت ناس وطالعه من بيت دين صارت ماتكفيه...

قالت طيب هو يفكر يطلقها...قلت لها والله ماعليه حسوفه...واساسا صدقيني هاذي

نزوه وراح يرجع لها انا داريه وواثقه..

انا لست ضد الزواج الثاني...اللي بيتزوج بكيفه الله محلل له..لكن لايقعد يعذرب في

بنت الناس ويحط فيها عيوب

زوجتك ام عيالك اللي صابره عليك اخرتها تنكر فضلها وتكفر عشرتها..وبعدين شلون

تكون قدوه لعيالك..؟؟ وين حبك لها ليش مانبهتها لتقصيرها؟؟

المهم كالعاده سكرت السماعه بوجهي ومااعطتني فرصه اني اكمل كلامي معاها...


هذا مادار بيننا بإختصار....لكن احب اوضح شي

انا من بعد ماسمعت هالسالفه حمدت ربي اني افهم وادخل النت واستعمله وعارفه كل

شي..

لازم الزوجه تكون واعيه وفاهمه...تعرف زوجها وتفهم هو وش يسوي...عشان

تعرف تحافظ على بيتها

مو يقعد الزوج على النت الى الفجر والزوجه نايمه بفراشها ماتدري وش يسوي من

وراها..لا والله الا تعلموا وشوفوا كل شي وافقهوا الواقع اللي انتم فيه...

لا احد يظن من كلامي اني من دعاة تحرير المرأه لا والله ...بل اكره كلمه على قلبي

كلمة تحرير المرأه

لكن نفهم الكمبيوتر والانترنت ونستخدمه بالخير...عشان ننفع نفسنا وبيوتنا...

وشكرا لكم..اتمنى اسمع أرائكم..
12
2K

يلزم عليك تسجيل الدخول أولًا لكتابة تعليق.

تسجيل دخول

om nona
om nona
مشكوووووووووووره عزيزتي وصراحه الله يكون في عون الحرمه اللي عيون زوجها فارغه
ومايقدر اللي عنده ويعين جارتك على مابلاها
المباركه
المباركه
مشكوره يا مشاعل .........

وصادقه والله الوحده لالالالالازم تكون واعيه جداً مو في النت فقط لالالالالالالالالالا بل في أغلب الأمور إذا ماهي كلها

لأن الزوج يحب الزوجه الواعيه الفاهمه يمكن ما يقولها بصراحه لكنها في نفسه

أما جارتك الله يكون في عونها ويفرج همها

تسلمي يا عسل .............
tamo
tamo
مشكوره يا مشاعل ......... وصادقه والله الوحده لالالالالازم تكون واعيه جداً مو في النت فقط لالالالالالالالالالا بل في أغلب الأمور إذا ماهي كلها لأن الزوج يحب الزوجه الواعيه الفاهمه يمكن ما يقولها بصراحه لكنها في نفسه أما جارتك الله يكون في عونها ويفرج همها تسلمي يا عسل .............
مشكوره يا مشاعل ......... وصادقه والله الوحده لالالالالازم تكون واعيه جداً مو في النت فقط...
رسامة عيون
رسامة عيون
أنا مومتزوجه
بس موضوعك عجبني مره
وجارتك الله يعينهاا ياااااااااارب

يعطيك العافيه مشاعل
موضوع رائع

ننتظر مواضيعك فار الصبر ^-^
تحياتي لكِ ..
رسامة عيون
رسامة عيون
عفواً في لط أملائي

فار = فارغ

سوري ^-^
بايوو..