والله مصخوها المسلسلات الخليجية كل شريفة تدفع هالقرف عن بناتها

والله ما أدري وش أقول :angry2:
قرفت وطفشت من هالمسلسلات اللي مبينتا كإننا مجتمع فاسد ضايع وكإن بناتنا يعشن في ماخور كبير
السموحة من اللفظ بس من قهري
يعني هالحين كل شبابنا صايع ضايع وكل رجالنا شهوانيين
معقولة ان مافيه نور وكلنا نعيش بظلام
أجل العريفي والعودة والقرني (ياحبي له)من أي بلد
والدعاة اللي جابوا الأرض شرق وغرب من أي بلد وأهل الخير والناس اللي تشتغل في جمعيات خيرية وتهتم بالمسكين والضعيف من أي بلد
هالحين كل بناتنا شاذات وبويات وجالسين في كوفي شوبات كلهم مصاحبات وحريمناخاينات مانعرف نجيب الا هالنماذج ماعندنا هيفا جمل الليل د.سامية الميمني د. مها المنيف نورة الفايز د.حياة سندي
د. سلوي الهزاع هذولي ليش مافي شبههم في المسلسلات السعودية
كل المسلسلات جايبة نماذج مقرفة والطيبة فيهم هذي الطيبة حبت واحد مسيحي وخلته يسلم
كم في المية في مجتمعنا تصير هالقصة ليش المسلسلات ماتكتب عني وعن أمي وعن بنت الجيران انا ماشفت وجيههم بين هالوجيه الضايعة اللي مالها لون ولا طعم المحترمة فيهم المتربية جابوها في مشهد من أقرف ماشفت اغتصبوها أصحاب أخوها الثلاثة ياخي لمح للموضوع من دون المباشرة اش استفدنا من هالقصة
والله ان صوتها وهي تصرخ في اذني ثلاث أيام ليييييييش لأنها جرحت شي في نفسي
انا ما خليت بناتي يشوفون هالحلقة والبنت بعدها شفتها وارمة ورقبتها مبقعة اش هالقرف
زوجي يشوف مرة مسلسل والرجال يشد شعر حرمته علي غرفة النوم والباب بعدين ينقفل وهي تصارخ ببشاعة وتدعي عليه زعل زوجي مرة وقال لي لما اساوي انا أو أحد من أهلك كذا بعدين شوفي هالمسلسلات والله من يومها ما أجرؤ افتحها مع ان زوجي متفتح وتاركني علي حريتي
انا أخواتي من أول مقاطعين هالمسلسلات لاوابشركم بناتي يقلبون عنها علي طول يقولون لي تجيب الكآبة
انا ماصحاني الا بنتي وهي تقول لي هذي نماذج مشوهة وانتوا كل ما تشوفون هالمسلسلات يتغير شى فيكم وتتخيلون ان احنا كذا
لا تجي واحدة مطفية النور وتقول لي ان هذا مجتمعنا واحنا نناقش مشاكله احنا مو كذا ابدا ومع اننا مو ملائكة وفينا الخير والشر لكن مو كذا ادخلوا داخل اعماقكم وقولوا لي ان الجرايد والأخبار الللي دايما دايما تجيب أخبار عن اغتصاب الأب لبناته انها ماجرحت فينا شي وانها ماخلتنا نرتاب في أهلنا ورجالنا
وبعدين كل المسلسلات ماتقدم اي حلول بس جلد للذات وتشويه للصورة
المؤلف من هذولي خايف علي عمره يموت ولا يطلع ابداعاته في نفس المسلسل ونفس العيلة يجيب واحدة تنخطف وواحدة تغتصب وواجدة يضحك عليها حبيبها وشي آخر قرف وربي
أمس أشوف المسلسل اللي لهم شهر يسوون دعايته وقلت شكله غير وانصدمت قال ايش رجل الأعمال ما ادري الشيخ مادري المليونير مادري اش شكل امه يقول للسكرتير مادري مدير اعماله روح قولها تجهز نفسها
مين اللي تجهز نفسها زوجته اللي هربت ليلة الدخلة ويطلع السكرتير فوق ويبلغ الشغالة وهذي تدخل بفستان الفرح وترميه لها في السرير واخونا يجهز نفسه يلبس روب الحمام معليش هذي وين تصير عندنا معليش
أعرف كثير وقليل... ........... ما أحد في بيئتنا يسوي كذا
انا أقولكم اش بيصير ....... اي واحد من برة يشوف المسلسل بيصدق ان كل رجالنا يسوون كذا بالذات ان الخيال في الأفلام الأجنبية يصورون الرجال عندنا بير بترول جنبها خيمة فيها جواري يرقصون حول ذاك الأهبل
انتوا كذا بكيفكم انا وأهلي مو كذا
سألوا واحد اش شفت في سوريا قال ملاهي وتلاهي وحريم زينات وسكر للصبح
وسألوا ثاني قال أكل وشرب ومطاعم من كل شكل ولون وبساتين وجو حلو وشي
وسألو ثالث قال أصالة وعراقة ومساجد وقبور صحابة وتاريخ
يعني كل واحد وصف الشي اللي راح دور عليه
والمؤلفين من هالأشكال عبروا عن بيئتهم هم والحريم اللي يشوفونهم هم
يعني هالحين المسلسلات السورية الجديدة كلها جايبة نموذج شخصيات نساء محجبات .....طبيعي لأنهم موجودين في المجتمع هم والمنقبات والمتدينات ما يصير كل المسلسلات تتكلم عن بنات الليل
انا مشاهد الاغتصاب اللي شفتها في المسلسلات الخليجية السنة الماضية قد كل اللي شفته في الأفلام المصرية
احنا لازم ندافع عن نفسنا بشراسة والا هم يصيرون القاعدة واحنا الإستثناء
انا اعرف نماذج مشرفة عن سعوديين وسعوديات تملا مجلدات
خلني أضرب مثل صغير
شفتوا معرض نيارة النسائي في الرياض من سنة لا تقولولي انكم شفتوا البنات بويات ويدخنوا في الحمامات هذي عيونكم
انا عيوني شافت بنات يحاولون يثبتون نفسهم بكل الطرق هذي تصمم فساتين وهذي مبتكرة ديزاينات تجنن للكمبيوتر وواحدة مزينة الشنط الماركات بفصوص وكثير كانوا مسويين اكسسوارات بيدهم ايه بيدهم والله ن فيه بنت عمرها ما يزيد عن العشرين يانها مسوية افكار تصوير للبنات اتعب اقولكم اش حلوة
وهي تشرحلي كيف انها استغلت هوايتها وسوت مكان للتصوير في بدروم المنزل ومصورة أطفال وبنات شى روعة والله اني انبسطت وحسيت بالفخر
ليش نرسخ الصور السلبية وهذولي واللي مثلهم مين يتكلم عنهم
قاطعوا هالمسلسلات الخايسة والله ان طاش ما طاش اللي قاموا عليه في المساجد صار حلقة ذكر جنب اللي قاعدين نشوفه يعني مسلسل ام البنات مثلا ليش نجح ببساطة لأنه قدم نموذج عادي من البيوت والبنات بالذات كانوا لابسين ملابس بسيطة زينا ولهم أحلام كل البنات العادية وما كان فيه أي مبالغة وقدم حلول وماكان سوداوي بالمرة
اتفقنا دافعي عن نفسك وعن امك وعن بنتك
وقولي احنا مو كذا ولا تشوفي هالنوعية من الجرايد اوالمسلسلات تراها طاقة سلبية ما تسوي