اهلين بنات انا ادري بعض البنات يحبون المواضيع اللي تزيدهم تفاؤل وحماس للطاعه والعباده
نقلت لكم هالقصه مابي الا الاجر والله يوفق كل بنت
تقول صاحبه الموضوع اهي كويتيه طبعا لبى قلوب الكويتيات خفيفات دم المهم تقول :27:
قصة بنت خالتي انا حيل ويها حسبة خوات وكانت متعقده من سالفة الزواج ..
اهي بصغرها كانو يخطبونها وايد وكانت ترفض بحجة الدراسه بس عقب ماتوظفت .. صارت تبي تتزوج حالها من حال باجي البنات اللي بسنها وسبحان الله انقلبت الايه عليها ..
صارو كل ما ايون يشوفونها يروحون بدون حس ولا خبر ..
واهي متعوده ان الرفض يكون منها يمكن ارفضت فوق ال 12 واحد .. بدون سبب وكلهم كانو يبونها ..
بس عقب اخر واحد ارفضته تقول حسيت انه اتقبست يمكن حوبته لانه كان ميت عليها ودق على امها شخصيا وكان يترجى امها انها تقنع البنت وهذيك الله يهديها كانت تزيد غرور مستانسه ان واحد ميت عليها واهي تقول لا..
عقبها صارو كل ما ايونها يروحون بدون حس ولا خبر ..
مع انها كانت تحس انهم يبونها .. يعني كانت تحس ان اللي جدامها ميت عليها ..
وكان في بعضهم يطلبون ان يشوفونها اكثر من مره ..
بس بدون سبب يصير رفض وتتفركش السالفه ..
اللي قالها سحر .. واللي قالها عين .. واللي قالها جفسه .. واللي قالها عقاب من الله لانج رفستي النعمه ..
وظلت على هالحال تقريبا من عمر 19 لي عمر ال 24 ..
راحت حق شيوخ يقرون عليها ماكو فاييده ..
كانت تترزز بالعروس .. ماكو فايده ..
انا حطيت اسمها عند خطابه هم ماكو فايده ..
وكنت من اسمع طاري واحد يبي يخطب اعطيهم رقم امها بس سبحان الله يتفركش الموضوع بشكل مو طبيعي ..
اهي كانت يائسه يعني 4 سنين تقريبا ايونها خطاب وكلهم يروحون بدون رجعه .. كانت تقولنا خلاص مابي اتزوج كرهت الزواج ابي اعيش حياتي .. بس كنا ندري انها من داخل تبي هالشي مافي بنت ماتبي الزواج ..
حسينا عقب هالفتره ان البنت شخصيتها اتغيرت ..
اقطعت اغاني
قامت اتصلي الليل ..
صلاتها انظبطت ..
اتقوم لصلاة الفجر ..
تسوي المستحبات ..
لبسها اتغير .. مكياجها خف .. صارت هاديه .. لطفت لسانها
صارت وحده ثانيه حتى ويهها صار نوراني ..
صفت نيتها مع رب العالمين ..
التزمت بالقرىن كانت تختمه اول بأول وماتهد سورة البقره بشكل يومي
حتى يوم قالولها فيج سحر وحسد .. تقول كنت اقرى هالايه بايمان واخلاص : إن عبادي ليس لك عليهم سلطان إلا من اتبعك من الغاوين . السحر من الشيطان والحسد من الجن والشياطين .. بس الشيطان ماله سلطان على الانسان المؤمن ومايأثر الا على اللي مقصر ويا ربه ..
تقول قبل كنت احسد اللي تتزوج بس بعدين لا كنت استانس لهم حتى نيتها صارت صافيه ..
وكانت تدعي .. بقيام الليل ..
وتكرر دعاء خاص .. كل ليله تقراه واهي تبجي وتتوسل .. وماكانت يائيسه ..
تقول كنت احلم باحلام اتبشرني ان في شي زين بيصيرلي بس ماكانت تشوف نتيجه ..
اخر شي راحت العمره ..
واخطبتها وحده من اهناك هم كانت رايحه تعتمر مع خواتها ..
ومن ردو الكويت دقو ويو شافوها .. وخلال خطبتها انخطبت مرتين بعد واحد شافها بالدوام وواحد يصيرلها << طول السنين ماكان يشوفها بس ردت من العمره قال ابيها ..
الحين البنت متزوجه وفي بيبي ياها بالطريج ..
الله يفرح قلوب باجي البنات ويستر عليهم ويرزقهم
بنات تدرون شنو السر في هاذا كله ..
النيه الصافيه ..!!
البنت كان مصفيه قلبها ومؤمنه بالله يعني ماكانت تقرى عشان بس تقرى او عشان سامعه ان هالادعيه زينه..
تقول صار في علاقه غريبه بينها وبين الله سبحانه وتعالى ..
كانت تعشق العباده .. تقول كنت ابتسم وانا اقرى وافتخر وانا اصلي الليل ..
اتقول صج الحرمان من شي عطاني شي ثاني ..
يعني صحيح ان الله حرمها الزواج بذيك الفتره بس رزقها باللي اعظم واهو التقرب من رب العالمين ..
يعني لو ماكانت محرومه جان ما تعلقت بالله هالكثر وماوصلت لي هالمرحله من الايمان ..
صفو نيتكم بالله يابنات .. ادعوه بنيه خالصه ..
خلو ايمانكم فيه قوي ..
صدقوني الله مايخيب احد
بسم الله الرحمن الرحيم :واذا سألك عبادى عنى فانى قريب أجيب دعوة الداعى اذا دعان. صدق سبحانه..
ابي كل وحده تزوجت بصعوبه تنقلنا قصتها عشان البنات يتشجعون .. وماييئسون ..
يلزم عليك تسجيل الدخول أولًا لكتابة تعليق.
عائشة المشرقة
•
الله يبارك فيك علئ النقل الموفق الله يرزقنا الازواج الصالحين انه الكريم
الصفحة الأخيرة