معليش يابنات ودي اتكلم معاكم في موضوع حساس وادري ممكن اتعرض لهجوم عنيف بس ماهمني انا لاقلت مافي خاطري والله ماابالي وان شالله مااجرح احد وان احد فهم كلامي غلط المعذرة والسموحة ........
ملاحظة يااخواتي ان الغيرة عند بعض البنات وصلت لحدود مستحيلة وطبعا الغيرة اشكال والوان وفي مختلف انواع العلاقات ،،
تغار على زوجها لدرجة اتهام سلفتها او اي احد من قرايبها اتهامات شنيعة قد تصل للشرف والاخلاق والسمعة ... ويبدأ تفكيرها الغيور الشكاك يترصد للادمية وكل حركة تسويها تعتبرها موجههة لزوجها وتبي تلفت نظره خير ان شالله ماحد عنده زوج غيرك يازوجة براد بت؟؟ ،،، واكيد تبدا تنشر هالكلام عند اخواتها وصاحباتها ويمكن اهل زوجها وتنتشر سمعة سيئة على انسانة وهي يمكن ماتدري وش يدور حولها ،،، طيب وبعدين لفين بتوصل الامور؟؟؟ بتنتشر الكراهية والقطيعة في العوايل وبتنعدم علاقات الازواج ببعض ومصيبة لو كانو اخوان،، وكله كوم واذا جاتك وحدة حاطة على سلفتها الا هذي تقلدني وهذي تناظرني هذي تتقصى اخباري تقلد لبسي خليها تقلد لبسك وش بيضرك اشتريتي ملابس المحل حصريا لك ؟؟ ماتبي احد يلبس مثلك سافري واشتري ملابسك من برا انتي لك ستايلك وهي لها ستايلها الوحدة ماتتضايق في هالحالة الا اذا حست في اعماقها ان اللبس طلع على هذيك احلى منها،،
عموما هذي بعض التصرفات اللي تخطر على بالي مما سمعت وقرأت في هالمنتدى وبحكم خبرتي المتواضعة في نفسيات البشر وقوة ملاحظتي_نتيجة هوايتي الي نميتها بالدراسة_ راح اطرح اسباب غيرة الحريم اللي مافي غيرها مهما حاولت الوحدة تلف وتدور وتقنع نفسها والاخرين بعكس ذلك:
1).عدم الثقة بالنفس طبعا هذا اهم الاسباب ممكن تكون الوحدة تملك كل شي من جمال ومال وغيره لكن عندها شعور بالنقص لسبب ما يتعلق بطفولتها ماضيها تاريخها
2). عدم الثقة في الزوج وعدم الشعور بالامان معاه
نتيجة سلوكه ،سمعته،ماضيه او شي مسكته عليه او لاحظته عليه،، مثلا انها تلاحظ انه بصباص ممكن يبصبص على سلفتها او الخدامة تقوم ماتزعل من زوجها ابو عيون زايغة اللي البلا منه _وهي تدري_ تحط حرتها في الطرف الثاني وتجي هنا تتشكى ان الادمية مستقصدة تغري زوجها
3).مرض نفسي لا اسباب له الا انها فقط حقودة وغيورة بالفطرة ماتحب تشوف وحدة احلى ولااسعد منها تجيها حالة اسقاط وتتخيل اشياء وتتهم الاخرين فيها وبكذا ترفع من حالتها المعنوية
تقريبا مافي غير هالاسباب
طيب اختي وعزيزتي ،، اقدم لك هالنصيحة وادري الغيرة طبع في الحريم بس من قلب اقدم لك هالنصيحة لاني مايهون علي اشوف وحدة معذبة روحها بنار الغيرة ومستهلكة طاقتها على الفاضي وفي النهاية الغيرة ماوراها الا الدمار
السر يكمن في الثقة بالنفس صدقيني خليك واثقة من نفسك تصرفي كملكة الكل راح يفتكرك ملكة تصرفي كجميلة بينتهي الامر ان الكل يعتبرك جميلة حتى لو كنتي عادية ،، شفتو سعاد حسني كيف انها انسانة عادية الجمال وقصيرة القامة وكيف صارت سندريلا الشاشة ؟؟ انتهى الامر بالجميع ان اعتبرها جميلة الجميلات _بغض النظر عن سلوكها وجرأتها اللي اتحفظ عليها بس ماابي اتكلم بسوء عن موتى هم بين يدي الحكم الجبار_ يعني اختي اللي تغارين على زوجك غاري في حدود لانك ان اظهرتي غيرتك بزيادة راح يكتشف كل نقاط ضعفك ممكن يستغلها ويمكن تطيحين من عيونه ترا الرجال مايهتم بالبنت الضعيفة المسكينة المغلوبة على امرها يميل كثير لصعبة المنال حلو تحسسيه بغيرتك بطريق غير مباشر واحيانا تحسسيه انه ماهمك حتى يظل االشعور الجميل بالترقب اللي كان موجود فترة الخطوبة لازال موجود ،،، يمكن في بداية الايام بينبسط على غيرتك عليه وبيحس انها علامة حب بس بعدين بيمل ،، قريبتي تطلقت بسبب غيرتها الزايدة على زوجها حتى من اخواته لين مل من المشاكل وماالومه،،
صدقوني خواتي لو نمينا الايجابية في انفسنا بنتخلص من كثير من الحزن والضيق والهم اللي احيانا نوجده بانفسنا بسبب الاستسلام لفكرة
اللي حاسة انها غيارة وودها تتخلص من هالصفة المزعجة اول خطوة انها تعترف بينها وبين نفسها انها مصابة ومبتلاة بهالصفة وتعترف بين يدي رب العباد تقول يارب اعترف اني غيورة_واحيانا الغيرة تجر للحسد وصفات بغيضة اخرى_ يارب طهر قلبي وعقلي وروحي
بعدين مو صعب العلاج بس الخطوة الاولى هي الصعبة
اترككم بحفظ الرحمن
ღ عنفوان ღ @gh_aanfoan_gh
عضوة فعالة
يلزم عليك تسجيل الدخول أولًا لكتابة تعليق.
الاسيـرة
•
رفع
dudi
•
مشكوورة حياتيمشكوورة حياتي
صحيح كلامك وعين العقل الحريم اللي يغارون اغلبهم ماعندهم ثقه بنفسهم الله يهديهم
الصفحة الأخيرة