وتزوجت نجد وطلقت العزوبية ، حياتي بحلوها ومرها بالدآخل ...

.،


السلام عليكم بنآت مساء الآجواء الباريسية الممطرة :biggrin2:




أنا كنت من المسنترات قديما ب هالقسم الجميل :biggrin2:





وكنت أقرى قصص البنات اللي تأخروا عن الزواج وأدعي لهم
وأدعي لنفسي معهم <~ تبي تلبس الفصصطآن الأبيض :tongue:



ثلاثة ارباع حياتي قضيتها كرف مسح وتنظيف ستني سندريلا
ههههههههههههههه لأني ساكنة ببيت جدي الله يغمد روحه الجنة
مجمّع العائلة الكريمه واللي ساكنه ببيت الجد تدرك حجم الكرف فيه ...




المهم انا مثلي مثل البنات يوم كبرت وتعديت الطعش ودخلت العشرين
بديت أفكر بالمستقبل والزواج ، والفصصصطان الأبيض <~ شاقن بها ...



لي اخوان متزوجين وماخذين بنات اصغر مني بسنة وسنتين
وأنا ماحد طق بابي مع اني اسمع ناس يلمحون يبوني بس فجأة
يختفون وكأن مالهم وجود ، بديت أفكر في نفسي ياربي أنا وش ناقصني
الحمدلله ماني شينة عادية أو بالأصح مقبوله ،





سمعت أقارب لي يتشمتون فيني وكثير اسئلة جاتني ونظرات ونغزات ،
وأشياء تقهرررر ، لدرجة وحده من البنات قالت لي أنا بتزوج يانجد
وبجيب عيال وانتي ماعرستي:huh: طيب ليش أنا وش فيني :icon33:




وبنت من بنات عمي بعد ماتوفى أبوي طلعت علي كلام تشوه فيه
سمعتي أستغفر الله يعني أبوي مات هو اللي كان ماسكني عن الحرام
أنا لي رب أخاف منه قبل البشررر ناس متخلفه وتفكيرها منتهي ...




حريم عمامي وبناتهم مستحقريني شايفيني ولاشي يمكن لأني طيبة
ومامد لساني مثل مايمدووونه بس أنا ماشية على قاعدة وعلى
نياتكم ترزقون ...!





خلاص طققققت ستبدي وتعبت نفسيا ودخلت المنتدى ولقيت مواضيع
كثيرة عن الإستغفار ، الدعاء ، قيام الليل ، حسن الظن بالله أشياء كثيييرة


اول شيء سويته مشيت على رقية للأخت وردة الاشراف الله يجزاها بالخير
صح انها متعبة شوي بس تستاهل التعب ، لما مشيت عليها حسيت بتعب
وألم فضيع ف بطني وأحلام كلها ف الجن بسم الله ..



استمريت عليها فتره وقطعتها ماقدرت اكملها ، وصرت ارقى نفسي بالمعوذات
وآية الكرسي ، والحمدلله صرت أحس نفسيتي تحسنت شوي



وبعدها صرت وقت العصر أو العشاء اجلس بمكان لحالي وامسك دفتر واستغفر
فيه ( بنية ان الله يغفر ذنوبي ) صرت اوصل للألف والالفين وماتقيد بعدد معين

احيان 500 المهم إنها بنية صادقة واخلاص لله سبحانه وتعالى ،..




صرت ادعي احيان بعد كل اذان واقامه ان الله يرزقني الزوج الصالح اللي
يعوضني عن هاللي عشته ..




وبعد كل صلاة ، وكل ماحسيت نفسي ضايق صدري وابي افضفض لأحد
كنت اروح وأفرش السجادة واصلي لي ركعتين وف السجود أبكي
واطلع اللي بقلبي وادعي بحررررقة لحد ما أحس طاب اللي بخاطري



دعيت يابنات بالمواصفات اللي نفسي فيها قلت ربي كريم وبيكرمني إن
شاء الله ، دعيت يكون كريم حنون يحن علي ومحافظ على صلاته ويعينني
على طاعة ربي ..




وسبحان الله ماعدت 3 شهور وزيادة إلا وإنخطبت لواحد يقرب لي
وشبه مايقرب لي ما اعرفه ابدا ماشفته بعد ايام الطفوله الا مره او
مرتين ف البداية خفت وبكيت مادري ش راح تكون حياتي مع
هالانسان المجهول ...!



الى ان استخرت وتمت الموافقه وتملكنا لك الحمد والشكر يارب
حصلت فيه أغلب المواصفات اللي دعيت ربي فيها والله العظظيم أغلبها
بس عنده بعض العيوب طبعا مافيه انسان كامل مابي أصير طماعة:icon30:




بعد زواجي مباشرة حملت وبشرت أهلي و بشر أهله ياألله ماقدر
أوصف لكم كمية المشاعر هذيك اللحظة الكل مستانس وجدتي بكت
وأنا بكيت أخيرا بصير أم وبيجيني بيبي يقولي ماما ههههههههه


وكل شوي اتهاوش انا وزوجي أقول ياويلك لو تمد يدك عليه هذا حبيبي
وهو يقول شف شف النفاق من اللحين حبيتيه ماشفتيه الله يالحريم ماستذبكم
والله لأخليه يجنن فيك مايترك شي ف البيت الا كاسره لك :icon32:


سويت اشعة قالت لي الدكتورة اللي ببطنك عروووسة مش عريس
ومرت الأيام والشهور واحس بطني يكبرعن اليوم اللي قبله وأروع شعور
لما تحرك الجنين ف بطني مادري احساس حلو ويخوف مادري شلون ههههههه



بدينا نتقضى للنونو الجديد أنا وزوجي لبس على ذوقي ولبس على ذوقه ولما
نجي نرتب الملابس يمسك الملابس ويشمها ويضمها لحضنه ويدور ويلاعبها
ويضحك كأنها بيبي وانا اضحك عليه يامثبت العقل والدين :icon29:


وصلت للشهر السادس واضطريت فيه احضر عزى قريبة لي وكانت
أول جمعة أحضرها وانا حامل وكل الاقارب والاهل حاضرين وانصدموا
لما شافوا بطني توقعوا إن توني ببداية الشهور :(

وكككثرة الأسئلة ياربي وين ما أمشي مكان النظرات على بطني
انحررررجت وبقوه ..

بعدها
جاتني بوادر تعب ماهتميت لها ف البداية كنت احس بدوخه كاني بطيح
لحد مازاد التعب علي وتنومت بالمستشفى واكتشفوا عندي مرض بالدم
طلع فجأة والضغط عالي جدا ونبض الجنين ضعيف بالمره قالوا الجنين
بخطر احنا مضطرين نولدك قيصري انا جلست ابكي شلون وكيف وانا
توني صبروا علي لما دخلت السابع وولدوني انقطع عني التنفس
وحطوا لي اكسجين واول ماصحيت من البنج وانا اصيح بنتي بنتي
وارجع اغفي واصحى بنتي بنتي كويس ويردون علي ايوا كويس






لما جو يطلعوني من غرفة الملاحظة مسكت الممرضة وكلهم مايتكلمون
الا انجليزي العربي عندهم ميييح كنت اقول بيبي ، لوك ، واحط يدي على
صدري واقول بيبي وانا فيني الصيحة أبي أشوف بنتي


قالت اااااا اوكي اوكي بيبي وتمسك يدي وتدخلني حضانه مليانه
للأطفال اللي ماكملوا شهورهم وكل ماعدتني على طفل اقول هذي هي
وتسحبني واطالع الثاني واقول هذي هذي لحد ماوقفتني على قزازه
وتأشر لي وابتسمت أنا اطالع بنتي وكأن فيه ضباب على
عيوني للحين اثار البنج شفت بنوته مملوحه ماشاء الله نايمه بهدوء
ضحكت وعيوني غرقانه دموع وف قلبي اقول الحمدلله ،



جاني زوجي طاير والفرحة مو سايعته يقول نجد بنتنا مافيها شي ء
خدودها تهبل قلت لا اله الا الله قال هههههههه تشبه لك يالدوبا الحمدلله
مافيها شي مافيها شيء ..


بعدها مرت احداث الله وحده العالم فيها بعد ولادتي بيوم تعبت بنتي
وكل ماعالجوا فيها شي طلع شيء جديد طلعت للبيت وهي من اسوأ
لأسوأ لحد ماتمت 24 يوم وتوفت الله يرحمها ويجعلها شفيعه ويعوضنا خير..


جابها ابوها لي كانت ملفوفه بقماش ابيض يالله وبارده وشكلها كأنها نايمه
ضميتها بيديني وانا ارتجف وحبيت راسها وودعتها الله الحمدلله اللي عطاني اياها
اخذها مني...


لك الحمد يارب على قضائك وقدرك ،

بعد نفاسي رجعت لبيتي صرت ماأعرف أنام بالليل أحس كأن احد يحاول يخنقني
وإذا نمت كلها أحلم ف الشياطين بسم الله ، يايتهجمون علي يا واحد يتابع
تحركاتي يا قطاوه ياحيوانات مفترسة ياعقارب لا اله الا الله




أحيان اصحى واحصل يدي متعكفة كاني بنشل بسم الله صرت أبكي
تعبت نفسيا حتى زوجي نزل وزنه كثييير وماصار يضحك مثل أول
ياتعبان ياشارد ،صرت أخاف أصلي ونالحالي ف البيت لازم يكون عندي ...





لمًا وحده من قريباتي نصحتني قالت يانجد تحصصصصني انتي وزوجك
وارقوا أنفسسسكم أنا اسمع كلام كثير عنك وعن زوجك وماقلت لك
هالكلام إلا من حبي لك وخوف عليك الرقية الرقية ، الله يجزاها بالخير ..




بعدها عزمت ارقي نفسي واشتريت راديوا وخليته على إذاعة القران
ومايطفي ابدا 24 ف 24 ساعة يششتغل بعدها صرت ارتاح نفسيا

وبديت أتحصن أنا وزوجي إذا نسيت ذكرني واذا نسى ذكرته .,

والحمدلله تحسنًا كثير ومازلنا مستمرين ...

والأحلام للحين مستمره بس خفت عن أول الحمد لله

واللحين ماقدر أحمل لأن الرحم ضعيف واحتمال كبير أجهض إذا حملت
على كلام الأطباء لازم استمر على علاج معين بحدود السنة
والحمدلله على كل حال ،



هذي هي حياتي بحلوها ومرها تعلمت منها اشياء كثثثيره ،

يابنات الله مافي أكرم منه إدعوا باللي نفسكم فيه لاتقولون
مستحيل مافيه شيء مستحيل على الله ، والله كنت ادعي
بإنكسسسار ..


إنتي نصيبك مكتوب لك ماحد راح ياخذه غيرك ثقي ثققه
تامه ،

أهم شيء النية والإخلاص ، والصصدقة , والإستغفار والله
مادري ش أقول وش أخلي ف الاستغفار تحققت لي اشياء كثيره ...



حتى لما اتهاوش ويا زوجي هواش ياساتر تقولون ماراح نكلم
بعض مو أقل من أسبوع وأول مايطلع مع الباب اسسستغفر
سبحان الله يرجع نتراضى شلون كيف الله وحده العالم J




بنت عمي اللي تكلمت علي والله إني شفت عقوبتها بعيوني
انحاست حوسه شافت فيها الموت ونا ماقلت غير حسسسبي الله ونعم الوكيل
يارب عاقبها بما تستحقه ، صرت ادعي ان الله يرفع عنها مابلاها ...

والبنت اللي تشمتت وقالت لي أبتزوج وأبجيب عيال وانتي للحين
ماتزوجتي هذي هي للحين ماتزوجت الله يرزقها الزوج الصالح ويسامحها ...



الحمدلله الله نصرني على ناس كثثثير بالدعاء ثم الدعاء ثم الدعاء
بالذات في السجووود وحسن الظظظن بالله ....


لله الحمد من قبل ومن بعد ..
اللهم لك الحمد حتى ترضى واذا رضيت وبعد الرضى ..


هذي قصصصتي من وإلى مع إني حذفت أشياء كثير لق لق واجد ههههههههه

اتمنى إنكم تستفيدون منها ، وتدعون لي ان الله يرزقني الذرية الصالحة المعافاة ...
والله يرزقكم بالأزواج الصالحين الحنونين اللي يدلعونكم ويهنونكم ...