وتستمر الدراما

السلام عليكم
تم تسريحي مرة ثانية ل بيت اهلي امس الصباح بسبب ام زوجي
العلاقة كانت مقطوعة تماما بيني وبينهم لا اتصالات ولا رسائل
ضغطت علي وحاولت تخنق فيني
سحبت السواق وسيارته سحبت الخدامة لانه كلهم على كفالتهم
ماعطيتها اي اهتمام
وجهت ولدها انه يرسلني ل بيت اهلي وافتعل معي مشكلة على نفس الموضوع اني اهين اهله وبعدها قالي روحي بيت اهلك
كسرت الشر وقلت لا
استمر وقالي روحي ومشيت اخذت بنتي وطلعت
على مدخل بيتنا صادفت اخوي هو وابنه وشافني شايلة شنطي وقالي وبعدين معاكي انتي ماغير تزعلين من زوجك واحنا نرجعك
فهم السالفة واتصل على زوجي قدامي
قاله النهاية ايش لهذا المسلسل يا ترجعها عندك يا طلقها وفكنا ياشيخ
كان جوابه متخبط واستقر اخيرا على الطلاق وانه ياخذ بنتي وينتظرني اولد ويكبر الولد شوي وياخذه عنده
وكان جواب اخوي عيال زفت مافي لاتحلم فيهم وقدامك محكمة روح لها ودق راسك بالجدران او اشتري سيراميك وروح بلط البحر الأحمر
ثم عاد وقاله رجعوها لي خلاص
قاله اخوي واحنا شغلتنا بالحياة تزعل اختي ونرجعها لك انت ماتفهم وحسمها معاه انه تعال وحط حد يا تصير رجال وتعرف قدر الحرمة وتبطل حركات المراهقة يا طلق وانقلع
كلمني بعد ساعتين وعصب يقولي اخوكي مايعرف مين انا يكلمني بهالطريقة كيف رضيتي على زوجك يكلمه كذا هذا الجاهل انتي ماتنفعيني خلاص ما احتاج الحرمة لي ترضى اهانة زوجها
وهو يرضى على حرمته انها تنهان
ثم عاد بعد كم ساعة يرسل رسالة يقولي البيت موحش من دونك واشتقت ل بنتي واخذها شماعة وقعد يقولي ماباقي شي على ولادتك يعني تبغي ولدك يطلع للحياة بين ام واب منفصلين اذا تطلقنا بنتنا هذي واخوها بتصيبهم عقد نفسية انا مستحيل اطلقك لو تروحين مية محكمة مارح اطلقك ولو ماجيتي البيت بشتكي للشرطة وبجيبك غصب
وكأنني انا من اطلب الطلاق !
رفضت العودة نهائيا
اتصل ب امي وكلمها ساعتين ونفس الدراما كررها معاها وعلى اساس انه بكرى جاي العصر يحل الموضوع نهائيا