وتصيبني ذكراه مثل السيوفي

مرت سنة وشهور وبدري بقبره *** بدرٍ بنصف الشهر جاه الكسوفي

كن الخبر توه جديدٍ بنشره *** كن الخبر توه يجي وسط جوفي

شبت بقلبي عقب فرقاه جمره *** وتصيبني ذكراه مثل السيوفي

وكم ونةٍ جريت عقبه وعبره *** وياليت عبراتي بحالي تروفي

يا ابو محمد عقبك العين سهره *** وقلبي عليك يا روح روحي شغوفي

غلاك ما اقدر يا حياتي أسره *** أبعلنه لو الخلايق صفوفي

يا ابو محمد يا زهر فاح عطره *** يا ابو محمد يا الحنون العطوفي

كم لوعة خلفتها وكم حسره *** حيث انك بقلبي وزولك بشوفي

ولامه حياتي مظهرٍ كل بره *** قلبه يمده دنيتي والكفوفي

قلبي انكسر عقبه ولا يفيد جبره *** ما يجبره إلا الرحيم الرؤوفي

حتى القلم يشكي على فراق حبره *** واقول تكفى يا قلم شف ظروفي

وآخذ من بحور الشعر كم قطره *** واقول يمكن ارتوي بالحروفي

لكن قصيدي يعطي القلب حره *** وما تعطي الاشعار غير الحسوفي

والموت حق ودرب كل يمره *** يمر ويا خذ اروحنا ما يروفي

والموت ما يترك صغيرٍ لصغره *** ولا يترك اللي كامل بالوصوفي

ولا يترك الشايب لعجزه وكبره *** ولا يترك الانثى عليها عطوفي

يمرنا وحنا بلهو وسمره *** ويجي مفرق جمعنا بالحتوفي

ونروح وندخل كلنا وسط حفره *** يا رب امنك عند فزعي وخوفي

والموت واعظ وكم مشهد وعبره*** نشوفها وقلوبنا ماتشوفي






يا غافلين اليوم دنيا وبكره *** اهوال لا وصف ولا شرح يوفي

يا الله توبه قبل ما تصير حسره *** بقلوبنا يوم الحشر والوقوفي