وجهي حبوب ، كيف تخلصت منها .. !

السلام عليكم ..
مثل مو واضح بالعنوان..
حبوب البشرة وكيف بفضل من رب العالمين تخلصت منها ..

بشرتي من النوع اللي فترة تصصصفى وفترات ثانيه تصير تعبانه وفيها حبوب اللي محتقنه وملتهبه ..
ماخليت كريم ولا مرهم ولا دكتورة جلدية !!
سويت ليزر وتقشير بارد وجلسات عناية وتنظيف وكككل شي تقريباً جربته ، يتحسن بشكل بسيططط فترة ويرجع زي قبل !

مليت من الكريمات وعيادات الجلدية والانتظار وكل دكتورة تفتي في بشرتي غير عن الثانيه ، وكل وحده تشخيصها غير الثانية؟؟

بعد ماتزوجت ومع التحاليل اكتشفت ان عندي تكيس بسيط جداً ،قريت عن أعراضه وكان من ضمنها (حبوب البشرة) !!
انصدمت لأن ولا وحده من الدكتورات اللي مريتهم طول حياتي نبهتني على هذا الشي؟ ولا وحده فيهم قالت يمكن معك تكيسات أو سوي تحاليل هرمونية يمكن يكون معك لخبطه ؟!
اللي تقول يمكن مستخدمة كريمات ما تناسبك واللي تقول هذي بكتيريا تحت الجلد واللي واللي ... !!

المهم أني عرفت المشكله وبديت علاج بشرتي مع نفسي ..
تركت العيادات وبحثت عن طرق اتخلص فيها من الحبوب لحالي بدون استشارات لأن كل اللي قبل مانفعني ..
في البداية قلت لازم اعالج المشكله من الداخل والخارج ..
اول شي سويته أني التفت لموضوع التكيس مع انه بسيط ولايذكر لكن احتياطاً وحرصاً أخذت جلوكوفاج وصرت أمشي نص ساعه يوميا وقللت السكر في أكلي ، وصرت كل مافضيت سويت لي عصير برتقال بالبيت وشربته ..

ومن الخارج ، قطعت عن وجهي كل الككككريمات والمراهم والمكياج حتى .. !!
اعطيت وجهي فترة راحه ، وقلت لازم ألقى شي طبيعي ويكون مفعولة قوي ، ماعاد أبي أستخدم كريمات وأشياء مُصنعه!
كنت محتارة بين استخدام (قشر الرمان المطحون ) أو ( المُره )
والحمدلله ألف مره اني أهتديت ل إستخدام المُره ..

نقعت حبوب مُره مع مويا حارة وغطيت عليها ومن بكره بديت استخدمها ..
صرت أغسل وجهي بغسول طبي ، واجففه وبعدها اجيب القطنه اللي تستخدم ب ازاله المكياج واغمسها في (منقوع المُره) وامرره على وجهي كامل وكل مايجف ارجع امرر القطنه على وجهي ..
وانا أتابع التلفزيون وانا اتفرج في جوالي ، بيدي القطنه احط من منقوع المره وامررها على الحبوب .. !

واتركه يجف ومن بكره نفس الشي ووبعده ، صار زي الروتين بيومي ..


والله يابنات ..
انه خلال اسبوع تحسن الوجه بنسبة ٨٠%


الحبوب صارت تتجمع وتبي تطلع وصرت افتحها ويطلع كل التجمع اللي فيها ومع الوقت صغررررت الحبوب وصارت ناعمه وبمستوى الوجه .. ماعاد فيها بروز وتجمع تحت الجلد !!!
وجهي تحسسسسن الحمدلله ، وباقي الحين كم حبه بسيطه ومازلت استخدم فيهم نفس النظام ..
خلاصة الموضوع /
المُره معقم ومضاد طبيعي و قووووي 👍
اللي تعاني مثلي تجججرب وتدعي لي ..


نزلت تجربتي لعل وعسى وحده تكون محتاجتها وتنفعها وتدعي لي وأخذ أجرها ان شاء الله 💗