وحام زوجتي دمرني

السلام عليكم
أبي ادخل بالموضوع على طول ارجوكم ساعدوني
الحمدلله تزوجت قبل اربع شهور و كانت حياتنا كويسه جداً في الشهر الاول
مع مشاكل بسيطه و دلع و تنحل بينا بسرعه
أنا سافرت و تركت زوجتي بسبب ضروف العمل و أنا ودي اخذها معي لكن هي مرتبطه في وظيفه

المهم عاتبت مره زوجتي انها ما تسأل عني وآني أنا دائم الي أسأل عنها
حتى لما ارسل لها ما ترد الا بعد ساعه او ساعتين
المهم قالت لي انها حامل وانها ما تاكل و تعبانه جدا
فرحت و اعتذرت منها وقلت لها هذا اعذريني اني عاتبتك كله بسبب اني اشتاق لك
المهم مشت الامور و أخذت اجازه من دوامي اسبوع علشان اشوفها
قبل لا أسافر بيوم قلت لها بحكم انها تعبانه وما تأكل و صحتها تدهورت
قلت لها شوفي الي يناسبك ما أبي اضغط عليك إذا مرتاحه عند اهلك خليك بحكم انك تعبانه
قلت لها هذا الكلام يعلم الله عن حسن نيه وما أبي اشقيها و تطبخ لي و تنظف الشقه
المهم انها كبرت الموضوع و زعلت و قالت لا تجي وما أبي اشوفك
وحاولت اني ابين لها اني ما اقصد وآني جاي علشانها بس رافضه
وجيت في الاجازه و رفضت انها تقابلني و وحاولت فيها بس رافضه مره
وكل يوم اجلس احاول فيها و تقولي خلاص انتهينا وجلست اسبوع كامل في شقتي لحالي
ومع هذا كله ما سمعتها كلمه تجرحها ودائم تفسر أي أمر خطاء لو اقول لها السلام عليكم زعلت
كلمت امها وشرحت الموضوع و تفهمت الوضع و قلت لها شكلها متوحمه فيني
خلصت إجازتي ورجعت دوامي بعد محاولات عديده فاشله معها
المهم جلست تحط حالات في الواتس تدعي علي أنا صراحه انصدمت
وتعبت نفسيتي مع ذالك كنت ساكت ولا قلت لها شي
بعد فترة اعطتني بلوك في جميع أمور التواصل بينا
وكنت أسأل عن حالها عن طريق امها و كنت اشتاق لها كثير بس ما اقدر اكلمها
طبعاً أنا موظف عسكري وجتني مهمه في اليمن
وارسلت لها عن طريق التليجرام ادري انك زعلانه سامحيني إذا اخطأت عليك ويعلم الله انه بدون قصد وقلت لها أنا رايح اليمن مدري والله راح ارجع حي او لا
على الاقل طمنيني عنك
بعد هذا الكلام كلها قرت الرساله و اعطتني بلوك !!! اصدمتني صراحه

معقوله الوحام ينزع الانسانية من الانسان و يخليه قاسي و يدور أي زله عليك وجلست تتذكر مواضيع قديمه و الوضع صار متأزم كل ما حاولت اني ارسل لها أسأل عنها


مدري هذا وحام أولا. انقلاب في حياتي انقلبت الى حقد و كراهيه وكل شوي تدعي علي كأني ذابح قريب لها
اعتذر على الاطاله وهي الان حامل في الشهر الثالث