بسم الله الرحمن الرحيم
السلام عليكم و رحمة الله و بركاته
اللهم لك الحمد حمدا كثيرا طيبا مباركا فيه
ياااابنات
ما تصدقون
جم سنة صار لي أنتظر هاليوم
اللي أطل فيه على وجهي بالمراية
ماأشوف و لا حبة و لا راس حبة
و لا نقطة بيضاء أو بقعة حمرا تنذر بقدوم حبة علىالطريق ،
يا رب لك الحمد جد أحس إني بقمة الفرحة
و الحمدلله الذي هداني لهذا العلاج الممتاز،
أتمنى إن استفدتوا ما تنسون دعواااتكم لي بالشفاء
بشرتي مختلطة مايلة للدهني
وما يمر يوم إلا وطالعة لي حبة جديدة
طبعا حبوبي هرمونية ناتجة عن لخبطة الهرمونات
فكلها كانت متركزة في منطقة الذقن
و كانت أنواعها كثيرة صغيرة وكبيرة
براس أبيض و بدون راس تحت الجلد و فوقه و جنبه :icon31:
و ما يخلو باقي الوجه من الحبوب
أصلاً من كثر ما انترس حبوب حتى بجفني يا بنات قد طلعت لي حبة ! :06:
عموماً خلال الشهر الماضي بدأت بمجموعة شريتها من محل Lush
بعد ما شفت عليها مدح و تجارب واجد باليوتيوب
قررت أتوكل على ربي و أجربها
خاصة إن المحل مواده عضوية وطبيعية 100%
و الحمدلله خلال شهر انعدمت الحبوب من وجهي انعدااام تاااام
ما أقول خفت لا انعدمت ما شاء الله تبارك الرحمن
بالإضافة إلى إن الناس لاحظوا على بشرتي تفتيح
أنا ما كنت ملاحظته بس أكثر من وحدة قالت لي وجهج صايرأكثر بياض عن أول :icon20:
بالنسبة للآثار لا تزال موجودة
لكن بكمل على هالمنتجات لين أخلص كميتها
لأن ما خلصت حتى نصها ما شاء الله كميتها رااااهيه
و بعدها راح أبدأ بإذن الله برنامج التخلص من الآثار،
و كتبت لكم هالموضوع لأني طمعانة بإفادتكم ودعواتكم الطيبة
تكفون يا بنات أتمنى تدعون لي بظهر الغيب
دعوة من القلب إن الله يشفيني مما فيني :( الحمدلله على كل حال ...
:
:
:
المجموعة تتكون من :
غسول – تونر – ماسك – جل موضعي لعلاج الحبوب
طبعاً اهما عندهم أكثر من تونر و أكثر منغسول
و أكثر من كريم بس أنا اخترت الأكثر نفعاً لعلاج الحبوب
واللي كان عليهم آراء جيدة بشكل كبير ...
أولاً الغسول قوامه ليس سائل بل شبيه بالصابون
اسمه فريش فارمسي FRESHFARMACY
من مكوناته :
عشبة البابونج ، زيت بذور اللفت،
زيت جوز الهند ، زيت الخزامى،
زيت شجرة الشاي ، الجلسرين،
اهوا عبارة عن قالب كبييير جنه حجرة و يقصون لج منه
و يوزنون القطعة بالغرام ويسعرونها على حسب اللي قصوه
و أنا قصت لي البياعة قطعة كبيرة فأخذت مني 5 دينار كويتي
و خلص الشهر و للحين والله ما خلصت ربعها تتخيلون !
فإنتي لما تروحين قولي للبايع من قبل لا يقص لج مااابي أكثر من 100غرام
لأن مرات من قلة الخبرة أو استغفال للزبون يقصون قطعة كبيرة
و تطلع أغلى عالفاضي لأنها تقعد فترة طويلة،
والقطعة أول ما تجيبينها البيت قصصيها بسجينة معقمة إلى قطع صغار
و احتفظي فيهم بعلبة نظيفة ومحكمة الغلق
وكل مرة اخذي قطعة بللي وجهج وفركيه بالقطعة لين تتكون طبقة بيضا خفيفة عالوجه
خليها دقيقة تالي غسليها بالماي ورجعي قطعة الغسول للعلبة بعد ما تجففينها بكلينكس
عشان ما تذوب من الماي.
على فكرة يا بنات ريحة الغسول هذا سيئة ريحةأ عشاب بس مركزة و مووو عطرية،
إذا كنتي من النوع اللي ما يستحمل الروائح حاولي تشوفين غسول ثاني غيره.
تقييمي له 8 من 10
نقصت درجتين الأولى عشان قوامه يعني لو كان سائل أفضل،
والثانية عشان ريحته ماحبيتها أبداً أبداً
ثانياُ التونر اسمه تي تري واتر
Tea tree water
أخذت الحجم الكبير سعره 7 دينار كويتي
من مكوناته :
زيت السمسم، ماء شجرة الشاي، الجريب فروت
طبعاً مثل أي تونر طريقة استخدامه سهلة
تبخين على بشرة الوجه من مرة إلى ثلاث مرات يومياً ،
على فكرة هالمنتج من أكثر منتجات محل لاش مبيعا و شهرة
و يقال إن الاستمرار في استعماله يخفي مظهر المسامات الواسعة تماماً ..
تقييمي له 10 من 10
ممتاز من كل النواحي
حجمه كفاني لمدة شهر و للحين باقي فيه
و ريحته حلوة أعشاب بس خفيفة
و مفعوله تمام يخفف الدهون
بس ما يجفف البشرة أبداً
ويعطي انتعاش مووو طبيعي
لما أقوم من النوم أبخ منه
و خلال النهار أبخ منه مرة ثانية.
ثالثاُ الماسك اسمه ماسك أوف ماقنامنتي
MASK OF MAGNAMINTY
من مكوناته :
العسل، بذور زهرة الربيع المسائية، النعناع، الفانيليا
أخذت الحجم الكبير سعره 8 دينار كويتي ،
استخدمته أربع إلى ست مرات طوال هذا الشهر
يعني كافي عليه مرة أو مرتين بالأسبوع،
وكميته أكثر من ممتااازه ممكن تكفيني سنة بإذن الله.
ريحته نعناع قوية بس حلوة حبيتها
لكن واجد ما حبوا تركيز ريحة النعناع فيه،
تحطينه على بشرة نظيفة و تخلينه ليمن يجف
و يتحول لونه من الأخضر الفاقع لين يصير أخضر باااهت و ناشف غسليه.
تقييمي له 9 من 10
لأن ريحته قوية + ما يصير نقربه للعين راح تدمع و تتحسس منه انتبهوا
أخيراً الجل الموضعي قريس لايتننق
GREASE LIGHTNING
من مكوناته :
الزعتر ، إكليل الجبل ، الصبار ، الخزامى
بما إنه جل فقوامه جدااا ممتاز
تتشربه البشرة بسرعة وريحته حلوه حيل
حبيتها ريحة أعشاب طازجة وواضح جدا ريحة المرامية فيه.
تقييمي له 10 من 10
طبعا هو موضعي يعني بس على الحبوب
بس أنا أدهنه على كااامل وجهي يومياً قبل النوم
وهالطريقة أخذتها من بنات اليوتيوب
كلهم يستعلمونه بهالشكل عشان يحققون أقصى استفادة منه.
:
:
بنات حبيباتي اللي تبي تعرف هل المحل موجود في دولتها ولا لا و فروع المحل
تدخل قوقل و تكتب اسم المحل بعدين دولتها
مثلا
Lush ksa
وراح تلقى في الموقع كل التفاصيل حتى أسعار المنتجات موجودة.
دعواااتكم لي بالشفاء