الموضوع هذا منقووووووووووووووول بالحرف بدون زيادة او نقصان
السلام عليكم ورحمة الله وبركاته
أخواتي العزيزات
:39:
إلى كل أم محتاره ,, وخائفه بشأن طفلها
تتمنى أن تراه في مصاف الموهوبين,,
ومراتب المتفوقين,
لكنها تصدم بحالة طفلها التي بدأت بتأخر نطق تلاه تأخر الفهم
وقد يرافقه تشتت في الإنتباه, وفرط في الحركه,,,
فتحتار أين تذهب به ,,,وعند من تعالجه
...
ويصل الألم منتهاه إذا أخبرتك معلمته بمشاكله,
وتعلن عجزها عن حلها
وتطلب منك البحث عمن يعرف كيف يتعامل مع حالته
حينها تشعرين بالضياع ,,,
فلاتدرين إلى من تلجأين بعد الله..؟؟ :icon33:
.
إذا مرت عليك هذه الظروف
أو خفت أن تمر عليك.. فلاتقلقي فلدي الحل بعد الله
فقد مررت بهذا
أنا يا اخوات عندي طفلي الكبير عمره عشر سنوات وبعده طفلي
الثاني ~وهو اللي عنده المشكله ~ ثم جبت الثالث,,
الله يحفظهم جميعا
المهم إني بعد ماجبت الثالث, الأوسط تغيرت نفسيته ,,
ولكونه خجول وهاديء فلم يعبر عن غيرته بالضرب أو الصراخ
بل انطوى على نفسه ,,,وتأخر النطق عنده ساهم في المشكله
طبعا أنا حاولت بكل جهدي إني أعوضه عاطفيا, وأشبعه بالحب
والحنان,,وهذا نفع في تحسن نفسيته ,,ولكن المشكله أن تأخر النطق
عنده وانطواءه أخّر التطور الإداركي والمعرفي والإجتماعي عنده
وبدأت معه سلسله من التخبط بدأت في
أولا \ مراجعة مركز للتوحد
ثانيا \ زيارة طبيب نطق وسمع
ثالثا \ مدرسة صعوبات تعلم ذات أجر خيالي
رابعا \ روضات همها الماده وتستغل خوف أم يائسه
خامسا \ تصفح وبحث في قوقل للبحث عن الحالات الشبيهه بحالته
وكيف تم علاجها
سادسا \ تصفح للمنتديات وقراءة المواضيع التي تهتم بهذا المجال
ومنها تجمعات أمهات أطفال التشتت وفرط الحركه في إحدى
المنتديات المباركه
وراعني إنهم يعطون أطفالهم أدويه لعلاجهم, وخفت إني لازم
أعطيه وأنا مادريت:35:
المهم أني لم أترك بابا إلا وطرقته,
ولاطريقة إلا وجربتها
ولا موضوعا علميا إلا وقرأته
حتى هداني الله لطريق مشيت فيه
قطعت فيه شوطا طويلا أبهرت المختصين
وكلهم أجمعوا على أن طريقتي وخطواتي صح كلها ,,
وقالت لي طبيبة النطق
أنت سويت شغلنا هذا مايسويه إلا مختص!!
ماشاء الله تبارك الرحمن
ولله الحمد والمنه أولا وآخرا وظاهرا وباطنا
بدايه ياأخوات وقبل ما أقولكم عن اللي سويته ...
-: أبيكم أول شي
تذكرون الله عزوجل
وتسمون بالرحمن,, فكل شي لايُبدأ به فهوأبتر
وحنا نبي عملنا كامل
بسم الله الرحمن الرحيم
ماشاء الله لاقوة إلا بالله ..
ثاني شي
صلوا على النبي عليه الصلاة والسلام ولاتحرموا أنفسكم
مغفرة ربكم وشفاعة نبيكم
اللهم صل على محمد وعلى آل محمد
.....
ثالث شي
أبيكم تسمعون كلامي هذا بآذانكم ..
وتقرونه بعيونكم
وتحفرونه بعقولكم
,,
وتنقشونه بقلوبكم
..
لأنه مهم جدا
أيتها الأم الحنون ,,
..
مهما قالوا لك عن طفلك...وجمعوا عاهات الدنيا وحطوها فيه
ورصوا أمراض العصر وجمعوها بعقله الصغير
~~~ فلا يهمك ~~~
لايذبحك الهم والغم, ويسيطر عليك اليأس
...
لايغطي عقلك وقلبك الحزن والتفكير,
فينسيك أنه مهما كانت مشكلة
طفلك فهو نعمه يجب أن تشكري الله عليها فغيرك محروم ,
ويتمنى حتى معاق !!
ولاتنسي أيضا أن هناك ماهو أسوأ من طفلك
والتفتي لمستشفيات سرطان الأطفال أو النقاهه أو السكر أو الفشل
الكلوي أو العنايه المركزه,,,
وعندها ستحمدين الله على نعمته
.
أيضا مهما قالوا لك
من تعذر علاجه لديهم,,أو صعوبته,أو غلاء ثمنه
,,فلا تحزني ولاتغتمي,,,:44:
فربما صعُب عليهم أو غلا عندهم فقط ,,
بينما هو سهل عند غيرهم
أقول لك هذا الكلام من واقع تجربه فلا تنسيه يا أختي
,,,
نأتي الآن للعلاج
,,,
أولا اعلمي وتيقني أن الشفاء بيد الله سبحانه وأنت والأطباء والأدوية
والوسائل التعليميه كلها مجرد أسباب فاجعلي اتكالك على الله وحده
ولاتنسي الدعاء والاستغفار
والصراحه يا أخواتي بعد ما يأست من الأطباء
والمدرسات ,,وصرفت ميزانيتي عليهم
عرفت إن ماراح يعلم ولدي غيري,,,
للعلم هو مايعرف أي شي,,
لا أرقام ولاحروف ولا أشكال ولاحيوانات
ولاألوان ولا مسميات الأشياء من حولنا
..
يعني الولد مثل الرضيع!! :04:
حتى كلامه غير واضح ولسانه ثقيل,
مع إن عمره أربع سنوات
والخطأ اللي ارتكبته وكل الأمهات زيي
عدم {محاورة الطفل} وراح أقولكم كيف
مدرسة صعوبات التعلم اللي رحت عندها
عشان تكشف عليه وتعرف نوع
الصعوبه اللي عنده عن طريق اختبارات بسيطه
{صحيح خسرتني الله يصلحها والتحسن كان بطيييييييييء جدا
بالمقارنه بقيمة تدريسها}
بس قالت لي كلام مهم وخطير واستفدت منه جدا
تقول ياطويلات العمر
من واقع خبرتي وعملي في السعوديه لاحظت خطأين تربويين يقع
فيه معظم الأمهات الخليجيات!!
تعرفون وشو هالخطأين اللي وقعنا فيهم؟؟ :mad:
أنا أقولكم
!! أولا\ التدليل
نعم التدليل
تقول إنكن تعتقدن أن التعبير عن المحبه والأمومه تكون
بتدليل الطفل وهو توفير كل مايطلبه دون تفكير وأيضا عدم تكليفه
بشيء حتى إنجاز أموره الشخصيه
~انتباه أنا أقول البعض وليس الكل ~
وهي صادقه أنا لما انتبهت على طفلي إني مقصره معاه عاطفيا
حاولت أعوضه عن النقص بس بطريقه خاطئه للأسف
فكنت حتى ملابسه أنا اللي ألبسه حتى كبر وهو لايعرف كيف
يلبسها
إلى ان صار عنده ارتخاء بعضلات يديه من قل استعمالها وهذا أثّر
على الكتابه عنده ,,يعني ضريت وأنا أبي أنفع,,
بس هذا الجهل الله يبعدنا ويبعدكم عنه :(
الخطأ الثاني عدم التحاور مع الطفل تلقينه يكبر ويشيب وحنا نقول
مايفهم
تصدقون بنت المدرّسه اللي أروح لها عمرها عشره شهور
تقول من زمان وأنا باديه معها
بالحوار والتعليم عن طريق الصور أو الإمساك بالأشياء ثم التلقين
يعني
تمسك البالون وتقولها بالون وتركز على هالكلمه بس ,,
وحتى لو هي صغيره على الكلام
أو ظهر لك إنها~تدربي راسها~ بلهجتنا يعني {ماتفهم شي}
معليش استمري لأنها الآن في مرحلة تخزين
وبعد سنه بتبدأ بالإنتاج والتعبير
وترى نفس الملاحظه والخطأ هذا قالته لي الطبيبه النفسيه اللي
بالمركز
يعني هالصفات معروفين فيها نساء الخليج
وهذا إن دل فيدل على كمية الأمومه والحنان
الزائد عندنا ولله الحمد
بس يحتاج لشوية وعي وتقسيم الدلال بذكاء وفهم
مو نكب الحنان كب ليما يخربون
والسواليف مهمه يااخوات بس مو على جارتك واختك لأ
سولفوا على أطفالكم واسمعوا كلامهم وهرابيدهم حتى لو
كانت خرابيط وأظهروا الإهتمام باللي يقولون وشجعوهم على
التعبير عن مشاعرهم ولاتدقمون فيهم وتسكتونهم
هذا بيضعف ثقتهم بأنفسهم وبيخلي لغتهم التعبيريه ضعيفه ومهزوزه
أنا ركزت في هذي النقطه وطولت فيها لأن لها تأثير كبير جدا على
نفسية الطفل وتطور لغته
وتنمية مهاراته المعرفيه والإدراكيه والإجتماعيه
لأن وسيلة التطور عند الطفل هو الحوار معه حتى لو ماتجاوب
معك في البدايه ,,اصبري وسوف ترين العجب بإذن الله
ثاني شي سويته \ رحت لمكتبه عاديه واشتريت بطاقات كل بطاقه
مكتوب عليها رقم من 1 إلى 10
وبجانبها صور أشياء بنفس العدد المكتوب في
البطاقه يعني واحد وصورة دراجه واحده ,
اثنين وصورة تفاحتين اثنتين وهكذا
وأخذت بطاقات أخرى مكتوب على كل بطاقه حرف من حروف
الهجاء ولصقت كل بطاقه باللي بعدها
حتى تكون ورا بعض ويحفظها مرتبه
, وشريت ملف اللي في داخله أكياس شفافه لحفظ الأوراق
دايم يطلبونها المدارس الأهليه ,,
يارب فهمتوا علي
ودخلتها فيها, والغرض هو حفظ الكروت من الضياع أو الإتساخ
وشريت كتب صغيره فيها حيوانات مع أسمائها وصورها
ورحت لمكتبة جرير ركن الألعاب التعليميه
وأخذت مكعبات الأرقام وبعض الألعاب الأخرى
وبعدين توجهت لركن التعليم المبكرفي جرير
وأخذت كرتون صغير داخله مجموعة كروت عددها 27 ترتب
على حسب المطلوب في ورقه مرفقه
يعني رجل لابس قبعه مثلثه, والكرت الثاني شكل مثلث,
والشكل الثالث طفل يأكل آيس كريم شكله مثلث
والمطلوب أن يجمع الأشكال المتشابهه مع بعض
ومعها ورقه توضح طريقة جمع الأشكال
والمطلوب من الطفل أن ينظر إلى الصور ويجمعها
كما هو موضح في الورقه وهذه طريقه ممتازه في استعمال
الذهن وتجميع الصور في العقل ثم تطبيقها على اللعبه
أناأخذت
الأشكال المتضاده,
والألوان ,
والأشكال الهندسيه
إذا رحتوا لجرير وسألتوا عنها بيعلمونكم وش هي
وترى إذا فهمها طفلك راح
تكون جدا ممتعه له بس يبيلكم صبر في تعليمهم
ورحت لركن الكتب وأخذت مجموعه كبيره من الكتب
لطلاب الروضه والتمهيدي كلها عن الحروف والأرقام
وآخر شي وهذا أهم شي ساعدني بعد الله
كرتون يحتوي على 12سيدي كل شريط يتكلم عن شي
الأرقام والحروف والأشكال الهندسيه وأسماء الحيوانات والألوان
وتوكلت على الله وحاسبت عن كل الأغراض
تصدقون إن المبلغ كان أقل من الي صرفته على وحده
من الروضات والمدرسات الاستغلاليات! والله المستعان
وبعدين طلبت من الله العون والسداد لأن الموضوع يبيله سعة صدر
وتفرغ شبه كامل
ودخلت معاه في كورس امتد مده ماهي طويله ,,الحمدلله
حتى أصبح ابني بفضل الله أحسن من أول بكثير
بعد أن يأسوني منه وإنه يبيله وقت طويييييييييييييل عشان يتحسن
المسأله ماهي صعبه ياحبيباتي سووا مثل اللي سويت ولا تتكلين
على أحد
أصلا من تبدأين بالتعليم والتلقين بتلقين مخ طفلك
بدأ يشتغل ويتحرك ثم يستقبل ثم يستوعب ثم يخزن ثم يحفظ
ثم ينتج ويطلع لك الدرر ان شاء الله
واللي ولدها بعده ماتكلم لا تيأسين منه ترى هو مايتكلم بس يسمع
ويخزن عنده,,
فأنت حاوريه وكلميه وخبريه عن اسم كل شي
تستخدمينه أو يمر عليه وهو راح يخزن
وراح يجي وقت ويتكلم ان شاء الله ,,
بس إذا كان ما خزن شي من كلامك في ذاكرته كيف بيتكلم؟؟
عشان كذا أقولك حاوريه وعلميه
ولا تقولين صغير,,
والله ماضيعنا وأخّر نطق عيالنا إلا هالكلمه
شوفي المصريين من يوم هو نتفه وهو ملكع بسم الله عليه
عشانهم يحاورونهم مثل الكبار وحنا يشيب وحنا ندقمهم ونسكتهم
طبعا أنت لاياخذك الحماس وتبدأين كل شي مره وحده وتشتتين ذهن
طفلك
وتضيعينه بكثرة المعلومات لأنها تعتبر كلها جديده عليه أنت إبدأي
بالأسهل فالسهل وهكذا
وإذا حسيت إنه أتقن هالمهاره إنتقلي للي بعدها وبعدين ارجعي
للأولى كمراجعه وحتى تتأكدين إنه حافظها صح
أما إذا كان حافظ الأحرف مثلا حلو,,
راجعيها معه وإذا تأكدت إنه حافظها روحي للألوان مثلا
طبعا كل المعارف والمهارات شفهيه لاتستعجلين على الكتابه
أهم شي يتقن المهارات الأوليه والكتابه تعتبر آخرعنصر
وإذا كنت تحسين بارتخاء يد طفلك ممكن تمرنينها بإعطاءه ورق
جرائد وتمزيقها ثم تكويرها واللعب بها
بيوصخ البيت والله يعينك على التنظيف
بس تراه تدريب مجدي ورخيص
وممكن يلهو بكره لينه ويضغطها بأصابعه ويكرر هذا التمرين يوميا
أو يلعب بالصلصال أو تلعبين معه لعبة جر الحبل
كل هذه التمارين مفيده في
تقوية العضلات الصغيره والكبيره لليدين
حتى ما يتعبك بعدين في مسك القلم
ويستغني لاحقا إذا بدأ بالكتابه عن طبيبة العضلات المهاريه
لأنه راح يكون بوعيك ومبادرتك صاحب
يد قويه ومتمرنه
ْْْْْْْْْْْْْْْْْْْْْْْْْْ
اللحين الكلام اللي جاي موجه فقط لحبيباتي بنات الشرقيه الحلوات
كون المكان اللي رحت له موجود بالدمام
ولا أدري إذا فيه بالرياض بس أتوقع أكيد كونها العاصمه
ماتخلو من أمثال هذي المراكز الحكوميه اللي تهتم
بهالشريحه من الأطفال
عزيزاتي
تصدقون على الرغم من إني علمت ولدي وتعبت عليه إلا إنه مقطع
قلبي ,,حاسه إنه مو مثل اخوانه,,
الصغير أحسن منه
فقلت لطبيبه الخاص للعلم هو طبيب أطفال شاااطرجدا بس عضوي
مو نفسي بس وش أسوي من غُلبي :icon33:
فقال جيبيه أشوفه وهذا حط عندي أمل في العلاج بس لما شافه قال
ابنك راح يلقى علاجه عند مركز الأمير سلطان للتأهيل
وعطاني رقمهم
ذيك الليله مانمت من التفكير
ويوم قمت لمدارس عيالي مانمت كالعاده أفكر بحل لهالولد
وقعدت انتظر لحد ماصارت الساعه ثمان وربع
واتصل في المركز
اللي أعطاني إياه الدكتور وترد علي وحده
الحبيبه رحّبت وهلّت ماقصّرت وقالت جيبيه بس لاتتأخرين كلما
صرت أسرع كلما استفاد من العلاج
أختكم ما صدّقت خبر,,من متى وأنا أبي مركز خبره يكشف عليه
بدون مبالغ خرافيه وخبره خرطي
وأروح من بكرا الصبح الساعه ثمان ولارجعت إلا 2وربع الظهر
أنا ماراح أقولكم الحوسه اللي حستها بس بقولكم الزبده اللي تفيدكم
وتكفون ركزوا معي زييييييين لأن الكلام
اللي بقوله مهم وراح يوفر عليك
المشاوير والتعب والحوسه
مركز الأمير سلطان مركز خيري مجاني يعتني بالأطفال المصابين
بالتخلف أو صعوبات التعلم أو فرط الحركه أو تأخر النطق أو
التشتت وغيرها من الأمراض العقليه او السلوكيه
ولكن المهم أنه يشترط شرطا وحيدا في الطفل
كي يقبلون علاجه عندهم وهو أن يكون معاقا حركيا وذلك لأن
المركزمخصص للمعاقين فقط
يعني إذا كان عندك طفل عنده مشكله في أحد أطرافه
فهذا مكان علاجه ومجاني بعد
أما غير المعاقين ممن يعانون نفس المشاكل فإنهم
يتوجهون فورا إلى مستوصف المزروعيه في الدمام ولازم تاخذين
معك قبل لاتروحين
\دفتر العائله\ وشهادة التطعيم \
وهناك يسألون الأم عدة أسئله عن الطفل وولادته وماهي مشكلته
حاولي قد ماتقدرين تكونين دقيقه وصريحه
في عرض المشاكل اللي يعانيها طفلك لأنك
كلما كنت دقيقه كلما كان تشخيصهم صحيح وعلاجهم ناجح
ثم يسألون الطفل عدة أسئله
يختبرون خلالها ذكائه وإدراكه ومعلوماته ثم يعطونك
تحويل إلى مركز الأمير سلطان
فتروحين ومعك الأوراق المطلوبه وهي
دفتر العائله
\ورقة تحويل يعطونك إياها المستوصف
\ مائة ريال قيمة فتح الملف
وتعطينها الإستقبال وراح يعطيك إيصال بالمبلغ وفيها رقم الملف
{إحفظيه تراه ضروري لكل زياره تزورين فيها المركز }
وبكذا تكونين استكملت اجراءات فتح الملف
بعد دقايق راح يحولك لإحدى الطبيبات اللي بتسألك نفس الأسئله
تقريبا
وبعدين راح تحولك لطبيبة نطق وطبيبه نفسيه
وتروحين لمكتب الإستقبال الخاص بترتيب مواعيد طبيبة النطق
لأن جدولها مزحوم وتطلبين منها موعد..
اطلبي فوزيه سماعي تجنن ماشاء الله
وبعدين موعد للطبيبه النفسيه
أنا رحت للدكتوره جميله حبوبه ماعليها
وقبل لاتروحين للطبيبه النفسيه لازم تروحين لطبيب عيون
حتى تتأكد الدكتوره سلامة طفلك من ضعف أو انحراف يمكن هو
اللي مسبب له التأخر في الفهم واذا كان سليم تاخذين منه تقرير يثبت
هالشي واذا كان محتاج نظاره تقصين له
وبعدين تروحين لطبيب سمعيات وتطلبين كشف على آذانه
يمكن عنده السمع ضعيف ومحتاج سماعه
أو عنده التهاب ومحتاج علاج
واذا كان سليم نفس الحكايه اطلبي تقرير يثبت سلامة آذانه وسمعه
والغرض من هذين الكشفين هو استبعاد أي مرض عضوي يمكن
أن يكون هو السبب في تأخر الطفل
وخوذيهم للطبيبه عشان تركز على شي ثاني
وللعلم يوجد في المركز طبيبة سمعيات وبالمجان بس الأدوات سوف
تعمل بعد شهر من الآن تقريبا
وممكن تفحصين سمعه عند المغربي مثلا
وبعد الكشف عليهم روحي للطبيبه النفسيه وسلميها التقارير
والله يعينك على الشرح والكلام عن حالة ولدك
أنا تمنيت إني أسجل كلامي بمسجل وأشغل
لهم وبس لأني هلكت من كثر ما أعيد وأكررفي شرح حالة ابني
بس دام إنه بفايده ماعليه
لاجل عين تكرم مدينه
المهم وبعد كذا راح يجتمعون الأطباء اللي كشفوا على ولدك
ويتشاورون في تقرير يوضح رأيهم النهائي
وتحليلهم لحالة طفلك واللي يحتاجه من برامج
علاجيه ونقاط النقص عنده ومايعاني من ضعف أو صعوبه أو
غيرها ,,ويجمعونها في تقرير واحد
وراح يرسلونه بالفاكس خلال أسبوع أو أكثر
والأفضل إنك تتابعينهم حتى يحرصوا على إرساله
ولو تقدرين تاخذينه منهم وتودينه بنفسك أفضل
وهذا كلام طبيبة المستوصف لي
طبعا المركز ينتهي دورهم بكتابة التقرير ,
يعني للأسف لايقدمون علاج
للمريض بل يرسلونه هو وتقرير عن حالته
لمستوصف المزروعيه وهناك
يتم علاجه حتى يتعافى باذن الله
وأهم شي يأخوات
إنكم تتقيدون بالتوصيات والنصائح اللي يعطونك
اياها وتطبقينها بدقه وانضباط ولاتتكاسلين نهائيا
هذا إذا كنت تبين طفلك يتعافى
بسرعه ويصير كأي طفل طبيعي ويلحق اللي بعمره
أو يكون أفضل بعد باذن الله
أقولكم هالكلام لأني لما كنت عند طبيبة النطق
واخذت تسألني عن مشكلة طفلي عطيتها
المشكله بشكل دقيق لأني لي فتره أشتغل عليه ومن كثر ماأقرا
صارت عندي خبره بس هي مااهتمت وماصدقتني
ولما كشفت عليه قالت ماشاء الله عليك حللت مشكلته بشكل علمي
ودقيق
وسألتني وش سويتْ عشان أحسّن من وضعه ولما علمتها
على اللي سويته له انبهرت وقالت كنت دايما
أقول عطوني مرضى بس قبلهم عطوني أم واعيه
وقعدت تشكي من جهل الأمهات بطريقة
تربية الطفل وفهم مشاكله النفسيه’
وتقول ينبح حلقي وانا أدور كلمه عربيه عشان الأم تفهم
وبالتالي تفهّم ابنها وتساعدني في علاجه
لأن الطبيبه جزائريه ولغتها العربيه ضعيفه تقول بدال ما
أتعب على الطفل بس,, أتعب على أمه بعد!!
عشان كذا يااخوات أقولكم إفهموا مشكلة أطفالكم
عشان مايبقى على الطبيبه إلا تعلمك كيف العلاج
وبكذا تكونين وفّرت وقت طويل على نفسك
وعليها والمستفيد بالطبع هو طفلك
أتمنى إني ما أكون قد أطلت وأمللت وقد فعلت
بس والله كله عشانكم
وعشان هالعصافير الأبرياء اللي أذكى وأحلى منهم مافيه
بس قلة حصيلتهم اللغويه هي اللي خلتهم مايقدرون يعبرون عن اللي
بداخلهم ويطلعون إبداعاتهم
بس هذا أول الآن نقول:-
لاللجهل نعم للوعي والفهم
لا للتدليل نعم للحنان والحب المعتدل
لاللصمت نعم للحوار الهادف الواعي الراقي
لاللأميه نعم للتعليم والتلقين
لا لكلمة صغير ومايفهم نعم لكلمة كبير وواعي ويستوعب
الله يعافيهم ويشفيهم
ويفتح عليهم ينابيع الحكمه وأنهار الذكاء
ويقر أعيننا بصلاحهم وبرهم وحفظهم للقرآن
ونراهم في أعلى المراتب وأحسن الوظائف آميييييييييييييين
والله هو الشافي
والحمدلله أولا وآخرا
منقووووووووول
لنرقى بالقران @lnrk_balkran
محررة برونزية
يلزم عليك تسجيل الدخول أولًا لكتابة تعليق.
لنرقى بالقران
•
رفع
معلومات مهمه جداً
الله يكشف ضر هالاطفال المساكين
صحيح ان الام عليها نصف المسؤليه اذا مو اكثر
بيداها بعد مشيئة الله تنمي مهارات طفلها او تنهيه بمعنى الكلمه
احيان اقول ليت قبل مايكتب عقد الزواج يطلبو اجتياز دورات في التربيه والتعامل وبعض المهارات مثلها مثل التحليل
سبحان الله تعامل الاهل وتربيتهم للطفل لابد ان تظهر بيوم من الايام في شخصيه سويه او غير سويه
الله يجزاك الجنه
الله يكشف ضر هالاطفال المساكين
صحيح ان الام عليها نصف المسؤليه اذا مو اكثر
بيداها بعد مشيئة الله تنمي مهارات طفلها او تنهيه بمعنى الكلمه
احيان اقول ليت قبل مايكتب عقد الزواج يطلبو اجتياز دورات في التربيه والتعامل وبعض المهارات مثلها مثل التحليل
سبحان الله تعامل الاهل وتربيتهم للطفل لابد ان تظهر بيوم من الايام في شخصيه سويه او غير سويه
الله يجزاك الجنه
طيب ياعمري طلبتك ممكن اذا رحتي لمركز الامير سلطان تسألين اذا عندهم فرع بالرياض سويت بحث بقوقل طلع لي اشياء ثانيه
الصفحة الأخيرة