الحمد لله رب العالمين والصلاة والسلام على أشرف الأنبياء والمرسلين ، نبينا محمد وعلى آله وصحبه أجمعين
حياكم الله ياأخواتي منورين فديتكم
بدخل بالموضوع على طول لاني بصراحة اشوف الشي هذا يتمادى الله يصلح لنا النية والذرية
والشي اللي بقوله ويقرقع في قلبي من زمان عن التصوير بالجوال مش القصد التصوير ككل لاا
قصدي تصوير نفسك وخواتك وبناتك طبعا الكبار اللي وجب عليها الحجاب ..
ودي اعرف ياحبيباتي والمقصود اللي تصور نفسها هل انتي مجبورة أو غصب عليك تصورين نفسك
ليش الوحدة ماتعتبر من اللي صار للناس اللي انتشرت صورهم بالنت وسببه ضياع الجوال او سرقته وهو مليان بصورها ياااارب ستر الدارين ..
ياما سمعت مشاكل بخصوص صور الجوال وحدة تبكي تقول جوالي انسرق وفيه صور زواجي واللي تقول يافضحي جوالي ضاع بالسوق وفيه صوري وصور خواتي ياويلي من زوجي ليه ياخواتي ؟
والله لو الوحدة حريصة وتخاف من ربها وتبي الستر ماتجرأ تحط صورها بالجوال يعني انا ضامنه هالجوال مايضيع ابد !!
مرة كنت في صالون انتظر وحدة وتدخل علينا حرمة مع بناتها المهم بناتها جالسين جنبها فتحت شنطتها وصورت بناتها كل وحده لها صورة والبنات يضحكون يقولون لا يمه لاتصورين صراحة تضايقت تمنيت ان الام تكون احرص من بناتنا من ناحية التصوير وواجب عليها انها تحذرهم من هالمرض اللي انتشر صراحة اعتبره مرض فتاك يفتك بالاعراض الله المستعان ..
ومرة قاعدة اسولف مع قريبتي مش كبيرة بنوته في العشرينات اخذت جوالها بعد اذنها وقعدت اتفرج ولا اشوف العجب صور صديقاتها كلهم لا واللبس يارب سترك اغلب البنات فساتينهم فوق الركبة والكتوف ماعليها شي قلت فلانه : قالت نعم .. كيف البنات يرسلون لك صورهم وبهذا اللبس غريبة موخايفين على انفسهم وش هالثقة
قالت عادي انا دايما الجوال معي ومحافظه عليه قلت : لا ياقلبي من ناحية هالامور ماأضمن انه يكون دايما معي واتسبب في فضح هالبنات اللي متساهلين بهالأمور طيب وين الخجل وين الحياء .. ولاهتمت من كلامي قالت كل البنات يصورون ماصار شي ..
ايش رايكم بكلامها ؟
ليش بناتنا وصلوا لهالدرجة واستهتارهم بهذا الأمر ..
ياااااااااااااااااأمهات تراكم مسؤولات عن بناتكم تكفون انتبهوا مايضرك شي لو تطلبين جوال بنتك تقولين لها بتفرج على جوالك شوي آآآآآآآآآآآه ياقلبي تراهن جاهلات يبي اللي يوجههم ويحرص عليهم تراها أعراض وشرف لاتتهاونون تندمون
واجب علينا نعلمهم الاخلاق والادب والدين ولاننسى الدعاء لهن ولاولادنا وللمسلمين بالهداية والستر
واعذروني اذا ضايقت احد فيكم والله ثم والله من كثر خوفي عليكم الله يقطع هالتكنلوجيا اللي افسدت الناس
مانبيها ياليتنا نرجع مثل اول لاجوالات ولا بلاك بيري ولافضائيات ولو ان بعض الناس فيهم خير يستخدمونها صح لكن بعضهم مشغول في الملهيات وغااافل الله يهدينا واياه الى مايرضيه سبحانه
هذا والحمدلله رب العالمين
الله يجزاك خير ..... والله يهدي الجميع