ودي اعرف راسي من رجليني

مرحبا انا صديقة ظلع عطتني معرفها. الله يجزاها خير المهم تقدم لي واحد قبل اسبوع جاء زارنا جلس مع ابوي واخواني ولما خرج سئلت امي هاه وش قالوا قالت ابوك واخوانك يقولون ارتحنا له شكله رجال محترم وتعرفون الرجال يعرفون قلت واخواني وش قالوا قالت حتى اخوانك قالوا انه شكله محترم وما لاحظنا عليه شي بس باقي نسئل قلت اوكيه طبعا انا ما قلت لا ايه ولا لا المهم الان مر اسبوع وامي ما جابت لي اي سيره وابوي واخواني ما اشوفهم سئلوا لاني ما اشوفهم يطلعون من البيت الا لدوام كان يتقدم لي السكير وراعيين السوابق ومع ذالك ابوي واخواني يروحون يسئلون عنهم ومن ثم يجون لي يقولون ترى الرجال فيه كذا وكذا وانت بالخيار لك وهذا هو الشخص الوحيد الي جانا في المجلس وابوي واخواني ارتاحوا له بس مستغربه ها البرود وعدم تحريك الموضوع ماهي من عوايدهم ابدا هم حريصين اكثر مني يعني لو الرجال مش مضبوط او فيه شي كان قالوا لي زي الي جونا قبله داخلي احترق اذا شفتهم جالسين في البيت ولا جابوا طاري الموضوع لاهم ولا امي المشكله اني ما اقدر اسئلهم تعرفون انا بنت واستحي خصوصا اني علاقتهم صارمه معي احيانا اذا نمت العصر ثم صحيت وتكون النفسيه ضاربه احس ودي انفجر ودي امسك احد واقول مو معقوله انا صرت اخر اهتماماتكم انا ترى ما رفضت ما قلت لا مو معقوله ها البرود يمكن عشاني في نظركم ما استاهل ترى ماراح احللكم وبعدين اجلس مع نفسي واتعوذ بالله من الشيطان الرجيم واقول يا بنت اصبري لا تتهورين ابوك وامك تراب رجولهم يسوى الف رجال بس احس يا بنات ان نفسيتي زفت ومقهوره اخر درجه