ودي اغني نفسي يارب توفقني

السلام عليكم ورحمة الله
موضوعي فضفضة لكن تحملوني ☺️
طبعاً انا مثلي مثل كل البنات اللي متخرجات ولا توظفوا مع متطلبات الحياة كثرت المصاريف ، خصوصا ان عندي بنوتات الله يحفظهم ومصاريفهم كثيرة والمصروف اللي يعطني زوجي مايكفي ابد واحس بااحباط ولا اقدر اطلب منه زيادة لان راتبه يروح قروض الله يعينه ونفسيته مرة تعبانة من هالسبب
فكرت اني اسوي اكلات وابيع مثلاً معمول او حلا لكن صعبة جداً علي لان يومي يروح بشغل البيت اللي ماينتهي ( بيتي كبير دورين واطفالي صغار ) ومطارد الاطفال وتدريسهم والله ان ايديني خشنات من كثر الكرف ولا اقدر اجيب شغالة تساعدني
فكرت اني اطلب من النت شنط واكسسوار وابيع استخرت ربي وطلبت من اخوي يعلمني ولا قصر الله يوفقه ساعدني وطلبت من هارودز مجموعة شنط كتجربه اذا وفقني ربي اتوسع
وصلن الشنط من اسبوعين وفتحت لي حساب بالانستقرام وعرضت فيه الشنط لكني تحطمت حتى الان مافيه زباين 😭 الشكوى الى الله
والله اني ادعي ربي دائما انه يغنيني من فضله وجميع المسلمين الحياة صعبة مع هالغلاء الله يكفينا شره ويرحمنا برحمته الواسعة
ودي بافكار تزيد الدخل المادي ياليت تفيدوننا يابنات من خبراتكم