بسم الله الرحمن الرحيم
السلام عليكم بنات حواء جعلكم الله في سعاده دائمه
حياتي زي اي ربة بيت عندها مسؤليات اطفال ومدارسهم وطلبات ابو العيال والاشغال المنزليه الي ماتخلص.
من اقوم لين انوم وانا في شغل روتيني ان اهملت شي تراكم علي الشغل.
واذا ماصار عندي شغل في البيت طلعت ارفه عن نفسي شوي,وربات البيوت عارفين اكيد كل الكلام الي اقوله ومجربين.
بس الحمد لله اموري ماشيه وشغلي مرتب طوال الاسبوع.
بس عندي هم يلازمني وهو :متى احدد لي وقت للقران؟
كل ماابدئ يومي اقول ابقرى اليوم ,ويمر الوقت ويخلص يومي ويجي وقت النوم وانا مااضفت شي في صحيفة اعمالي من قرائت القران,ويمر اليوم واليومين والاسبوع والاسبوعين وانا اقول كل يوم بكره.
ولما يجيني العذر اقول بخصص اوقات الصلاة لقرائت القران,بس للاسف مافي عزيمه.
يضيق صدري اخاف لما يجي يوم الحساب يكون القران حجه علي لالي والعياذ بالله,اخاف ايامي تمشي ويحل موتي وانا هاجره للقران,واخاف يكتبني ربي من الغافلين والغافلات.
كل يوم نسمع عن وفات فلان وفلانه ونروح نعزي ,وبيجي يوم الناس يجون يعزون فينا,وكلنا بروح والموت علينا حق وماراح يدوم الاوجهه,بس الاهم وش قدمنا في مسيرت حياتنا ,ووش الي راح يثقل موازيننا من اعمال صالحه تنفعنا.الله المستعان.
فكرت كم مره كيف احدد لي وقت للقران ,ولاحظت اني ماراح يكون في مجال الااني اخصص لي وقت مخصص للقران واني الزم نفسي فيه حتى استفييييييييد.
فقررت اني لما افرش سجادتي للصلاة احط بجنبها المصحف بحيث اني لما اسلم من السنه اخذ المصحف على طول واقرى صفحتين في كل فرض,والزم نفسي في المصحف زي مالزم نفسي في فرض الصلاة والسنه البعديه.
حتى لو اكون مشغوله ااجل شغلي شوي ماراح يضرني بالعكس راح اكسب حسنات بكل حرف اقراه والحسنه بعشر امثالها,وماراح اصلا تاخذ مني وقت لانها صفحتين ماراح تاخذمني الا دقيقتين في كل فرض صلاه.
وبكذا اكون قريت على الاقل 100 ايه في اليوم ,واذا فيه وقت حاولت اكملها بالي اقدر عليه.
و100 ايه كفيله باذن الله اني اكون من القانتين وقانتات ولا اكون من الغافلين والغافلات نسال الله العافيه.
جربوها مره مرتين وراح تتعودون باذن الله ,وبالعكس راح تحبون الشغله,وخصوصا اذا لاحظتوا انها ماراح تاخذ منكم وقت.
بتحسون براحه نفسيه كبيره انكم طول الوقت في ذكر, وانكم مرضين ربكم باذن الله.
بتلاحظون انشراح في الصدر وسعاده مالها حد.
ولياقه كانكم لسى خالصين رياضه .
يعني اذا الرياضه تطرد السموم من الجسم .القران يطرد الهموم من الصدر.
وجربوا ماراح تخسرون شي.
ولا تنسون قوله تعالى(ومن اعرض عن ذكري فان له معيشة ضنكا)
وقوله(الا بذكر الله تطمئن القلوب)
تقبل الله منا ومنك صالح الاعمال وختم لنا بخاتمه حسنه ووالدينا اللهم امين ومن امن.
ارفعوا الموضوع لتعم الفائده.
بالااله الا الله محمد رسول الله.
ادعوا لي بالفردوس الاعلى من الجنه.
وبصلاح اولادي وتسخير زوجي.
وان يغفر الله لي ولوالدي.
ودمتم احبتي
اكبروتكبرمسؤلياتي @akbrotkbrmsolyaty
عضوة فعالة
يلزم عليك تسجيل الدخول أولًا لكتابة تعليق.
اجمل انســـــانــه
•
يعطيك العافيه
الصفحة الأخيرة