بناء ع طلب الاخوات ورشه مستقله لهذا الجاكيت اعدة تصور الجاكيت بشكل اوضح مع ترجمه
وافيه لخطوات عمله ، واي سؤال ان شاء الله ما اقصر المقاس لعمر سنه واكبر اشوي حسب السناره الي بتختاريها ونوع الخيط
انا استخدمت خيوط اليز ديفا وسناره رقم 3
بسم الله الرحمن الرحيم
الجزء العلوي :-
1-اعملي 108 سلسه بعدها تعدي 3 سلاسل وفي الرابعه تشتغلي عامود بلفه وتكملي لحد ما يصبح العدد 105 عامود بلفه
2-ارتفعي سلسله وحده واشتغلي غرزة حشو ع الاعمده كلها
3-ارتفعي 3 سلاسل واشتغلي 16 عامود بلفه ، في السلسه الي بعدها اشتغلي 3 عامود بلفه ( يعني 3 اعمده في نفس سلسله ( في مكان واحد))، بعدها اشتغلي 19 عامود بلفه ، في السلسه الي بعدها اشتغلي 3 عامود بلفه في نفس المكان ، اشتغلي 32 عامود بلفه ، وفي السلسه الي بعدها 3 عامود بلفه كملي واعملي 19 عامود بلفه + 3 اعمده بلفه في السلسه الي بعدها + 16 عامود بلفه
4-ارتفعي سلسله واشتغلي غرزة حشو فوق كل عامود لحد ماتوصلي للعامود الثاني من الاعمده الثلاثه الي اشتغلتيهم في سلسله وحده من السطر السابق واشتغلي عليه غرزتين حشو وكملي فوق كل عامود غرزة حشو لحد ماتوصلي للعامود الثاني من الاعمده الثلاثه واشتغلي عليه غرزتين حشو
5-ارتفعي 3 سلاسل واشتغلي فوق كل غرزة حشو غرزة عامود بلفه لحد ماتوصلي بين غرزتين الحشو واعملي 3 عامود بلفه وكملي فوق غرزة الحشو عامود بلفه . كرري السطرين 4-5 لحد مايصير عندك 15 سطر
6-السطر 16 راح ارتفعي سلسله و اشتغلي غرزة حشو فوق كل عامود لحد ماتوصلي للعامود الثاني من الثلاثه الاعمده في السطر السابق واشتغلي عليه 3 غرز حشو بعدين فوق كل عامود غرزة حشو وهكذا
7-السطر 17 ارتفعي 3 سلاسل واعملي عامود بلفه فوق غرزة الحشو لحد ما توصلي لغرزة الحشو الثانيه( من الثلاثه الغرز الي في السطر السابق )واعملي عليها 3 اعمده بلفه وبعدين فوق كل غرزة حشو عامود بلفه وكملي شغلك ع هذا الاساس . كرري (6-7) لحد ما توصلي للسطر 24
8-لما توصلي للسطر 24 راح يكون طبعا غرز حشو راح تمشي الشغل زي ماقلنا لحد ماتوصلي لعند الزيادة الي هيا 3 اعمده راح تعملي ع العمود الاول غرزة حشو والثاني 3 غرز حشو واعملي سلسله او اثنين بعدين بتشبكي شغلك بـ3غرز حشو ع الطرف الثاني من الكم (الصورة بتوضح ) وكملي شغلك بنفس الطريقه مع الكم الثاني
الجزء السفلي :-
9-كملي الجزء السفلي ع اساس الباترون السطر الاول والثاني 3 مرات ،السطر الثالث 4 مرات ،السطر الرابع 12 مره لحد ماتوصلي للطول الي تبغيه
الباترون في هذا الرابط اضغطي ع الرابط الي تحت الصورة في مربع الكلام لتحميل الباترون
http://www.kouzlenishackemajehlicemi.cz/products/navod-na-hackoovany-svetyrek/
الرقبه واطراف الجاكيت :-
10- راح تعملي ع الجزء الامامي والرقبه داير ما دار غرزة حشو السطر الثاني راح تعملي 4 او5 سلاسل وتعملي غرزة حشو في السلسه 3 او 4 من السطر السابق زي ماتحبي الموقع مو ذاكر بالزبط كم سلسله نترك ، السطر الثالث راح تعملي جو السلاسل عدد من الاعمده 6 او 8 برضو ماذكر الموقع وتعملي غرزة حشو جوا السلاسل الي بعدها وكمان غرزة حشو جوا السلاسل الي بعدها وبعدين 6 او 8 عامود بلفه في السلاسل الي بعد كذا من السطر السابق لاخر السطر يعني (عدد من الاعمده(6 او 8 اعمده )+حشو+حشو+عدد من الاعمده) ، وهكذا شوفو صورة الجاكيت عشان تفهمو اكثر
الكم :-
11-راح تشتغلي ع الكم غرز حشو داير ما دار والسطر الثاني عامو بلفه وكرري السطرين لحد ماتوصلي للطول الي تبغيه وبعدين اشتغلي الطرف زي ما عملنا في الجزء الامامي والرقبه ، بالنسبه ليا اشتغلت كم بنفس الطريقه والكم الثاني1- سطر غرز حشو 2- وسطر عامو بدون لفه +سلسله وتتركي من السطر السابق غرزة وحده+عامود بدون لفه في الغرزة التاليه ( يعني عامود بدون لفه + سلسه + عامود بدون لفه) وكرري 3- سطر غرز حشو 4- سطر عامود بلفه . كرري الاربع خطوات للطول المناسب
12-بالنسبه لطرف الكم طلع معايا عدد الغرز 64 جمعت كل 4 غرز في غرزة وحده واشتغلت عليهم 3 او 4 سطور عامود بدون لفه واخر سطر غرز حشو وبس
دعواتــــــــــــــــــــــكم AbeeR
لعمر كم هذا المقاس ؟