ورطّت نفسي :/ ( مشكله دينيه )

السلام عليكم ورحمة الله ..

انا كنت مسرفه جدا بالاكل يعني كل مانغثيت رحت اتفشش بالاكل ولمن اهتديت _ الحمدلله _
كان يفسد خشوعي بالصلاة !!
وكنت احس احساس قوي بقلبي ان هالشي ما يرضي الله
وبيوم من الايام عيى لايجيني النوم ابد ..وانا لازم انام عشان صلاة الفجر ولان فيني امراض تتفاعل بالسهر
وحال قلبي تغير كاني استاحشت الحال ودقاته صارت غريبه
بس صار في نفسي انه غضب من الله
حاولت اني استغفر الله بس مافيه فايده راجعت نفسي باليوم وقلت يمكن عشان كذا واقعد استغفر بس مسار فكري يروح الى انه من الاسراف !!

وانا كنت وقتها متورطه و مرعوبه فقلت يارب ان كان غضبك علي بسبب الاسراف
فانم عيني واعاهدك الا اسرف !؟

وسبحان الله فجأه هدت دقات قلبي وماخذت دقيقه او اكثر الا وانا نايمه وكأن شي لم يكن !
لمن صحيت اليوم الثاني كنت متوتره ايش يعني الاسراف ؟؟

دعيت الله يهديني للي يحبه ويرضيه عني ففكرت في حالي واللي اكرهه في نفسي وعاهدت الله عليهم
وكنت اعرف الحديث الضعيف ( نحن قوم لاناكل حتى نجوع ) كنت اظنه صحيح و على اساس انه تربيه نبويه عاهدت الله عليه :(
والتزمت به سنتين وكانت اروع سنتين حياتي نحفت وتغيرت وصرت من ربي اقرب ودعوتي مستجابه الحمدلله مو بس كذا حتى الامنيه اللي اتمناها براسي الاقيها سبحان الله تجيني
كنت انساق للخير سوق ..يعني حفظت القران بهداية ربي ماخططت .. وكانت الاعمال الصالحه تنجاب لي وانهدي لها ولي قبول ومحبه بين الناس وكانت حياتي زي الحلم بالنسبه لي
خصوصا اني قبلها كنت داجه بالحياة ( الحين كلوا راح وبالكاد احفظ ايه وان حفظتها نسيتها :( )
حتى اصابتني عين سببت لي عسر هضم يستمر معي ايام وهو شاااق شاااق علي نفسيا وصرت اتقلب بوحل الخيانه :(

يعني انا عادي عندي اقدر اصبر يوم بدون اكل وعندي مليون شغله اتسلى فيها بس اذا مر يوم ونص
( مو جوع ) لا تاثير العين جوى البطن مزززعج لا يطاق:icon36::icon36:

وانا قريت عن عسر الهضم واكتشفت ان اللي فيني مو عسر هضم ! لان العسر غير
بس اللي فيني مدري وشو هو من اعراض العين اوجاع بالمعده وعليها الاكل مايروح من المعده
بس مو عسر لا يروح بالتدريج بس ماتفرغ معي بشكل نهائي

في رمضان قررت جاده اني اتوب لله وفرصه تتصفد الشياطين وتتنزل الرحمه
و3 ايام صبرت خلاص يوم جاء وقت السحور عجزت اكمل وماقدر افركش واضيع جهد صبري
جلست ابكي ابكي محروووقه وادعي ربي يمشي لي بطني
واخلاقي صارت زفت

والحمدلله ربي رحمني ومشى بطني .. بس كردة فعل نفسيه اسرفت ! :mad:

انا مو سمينه بذاك الوقت الحمدلله ودي تفهمون ان مشكلتي سلوكيه صارت دينيه مالها علاقه بالوزن !

المهم من بعدها الثلاث ايام صارت بنفسي صعوبتها وصرت اصوم لله يومين و بعدين ابدا اتثاقل اليوم والصعوبه النفسيه واخون العهد :(

تعبت مع نفسي ياجماعه:confused-

وانا عهدي مع الله اني مااكل الا على فراغ معده ..وعادي اشرب مويا وشاهي وافك ريقي بملعقة عسل :rotaeye:

بس طول الوقت على ماتفرغ معدتي أزمني صار يدخلني بخيانه ماتنتهي
وقت امساكي عن الاكل بعد 12 ساعه تبدا ازعاجات ببطني وغثا ؟؟:icon36:


ساعدوني الله يسعدكم ويجزاكم الجنه يارب !!

كيف احافظ على عهدي انا كل يوم اتوب لله واستغفر واجدد التوبه واتصدق بكفاره يمين عشان الله مايعذبني
بس ماش المشكله صارت نفسيه :(
حتى والله ماعندي ولا ريال ..كل فلوسي تروح كفارات !!
حتى ارواجي وشباصاتي وكريماتي وملابسي اتصدق فيها :(
لانو ماعندي فلوس خلصت واخاف ينزل علي سخط من الله لانو كثير صارت من قبل
لمن اتهاون واخون يسلّط الله علي الناس وتنكسر نفسي وانغبن بس اعرف انها عقوبة الخيانه
لوتدخلون غرفتي يادوب الاثاث ودولابي فاضي ..مستفحله المشكله معي :(

اللي ماعندها حل تذكرني بدعوه صادقه ان الله يلزم قلبي حفظ عهده
ويرزقني الوفاء والصبر والاخلاص
ولاحول و لاقوة الا بالله