ورق العنب بطريقة سهله ولذيذه وكمية قليله.. مع الصوره

السلام عليكم

تذكرون طريقتي المميزه في ورق العنب اللي الحشوه بالفريزر واللي ولله الحمد كل من جربها مدحها وشجع على تجربتها
وهي موجوده في هذا الرابط للي تحب تسوي كميه منها تكفيها شهر

طريقتي في ورق العنب لذيذه ومميزه والحشوة في الفريزر.. اضغطي هنا
وهذي الصور للاخت المسافره جزاها الله خير بعد ماسوت طريقتي ومدحتها حيل






شفت بعض الحريم يتعاجزون يسوون كميات كبيره مع العلم انها تريحهم شهر كامل قمت امس وسويت طريقه اسرع ونفس الطعم بالضبط وقلت لازم تذوقونها معاي ولاتغركم طول الطريقه بس انا احب اشرح بالتفصيل الممل

المقادير

- علبة ورق عنب كامله
- 2 كوب رز صنوايت مغسول ومنقوع في ماي بارد لمدة ساعه ومصفى
- تقريبا 3 طماطات كبار مبشورات ناعم سواء بالايد او في خلاطه براون
- بصله كبيره مبشوره ناعم سواء بالايد او في خلاطه براون
- 5 حبات ماجي للحشوه + حبة ماجي وحده للطبخ
- ملعقه صغيره متروسه كمون ناعم
- فلفل اسود حسب الرغبه
- نص كوب زيت زيتون او اكثر بشويه لحمس الحشوه + ثلث كوب زيت زيتون للطبخ
- ماي كافي لتغطيه ورق العنب بمقدار 2 سنتم فوق المستوى
- شدة بقدونس مفروم
- شدة كبيره شبنت مفروم
- نص شدة كزبره خضره مفرومه
- عصير ليمون ( الكميه حسب الرغبه ) الافضل 3 ليمونات ( مع العلم اني ماحب الليمون واجد )ا
- تقريبا ملعقه صغيره دبس رمان ( ممكن تحطين ملعقه كبيره بس انا ماحطيت كبيره لان الدبس خلص )ا
- بطاط حلقات سميكه



الطريقه

- بالقدر نحط نص كوب زيت زيتون وبعدين البصل ونحمسه دقيقتين او اقل لين تطلع ريحته
- نضيف 5 حبات ماجي ونخفف النار ونحرك شويه
- نضيف الطماط + كمون + فلفل اسود + ليمون + دبس الرمان ونحرك لين يذوب الطماط شويه ويتغير طعمه
- نضيف الرز ونحركه بحذر لايتكسر لين يتغير لونه
- نضيف البقدونس + الشبنت + الكزبره ونحركه دقيقه ونطفي النار
- نحط الحشوه في مصفاة عشان ينزل زيت الزيتون الزايد
- نصف بطاط حلقات في قاع القدر ونلف ورق العنب
- نصب ثلث كوب زيت زيتون فوق روق العنب
- في قدر ثاني نحط زيت الزيتون المتصفي من الحشوه + حبة ماجي + ماي بس لاتكثرين ماي .. ونخليه يغلي ونضيفه فوق ورق العنب بعد مانحط عليه غطا اصغر ونصب الماي شوي شوي ونحط شي ثقيل فوق الغطا مثل هاون حديد
- نحطه على نار عاليه 10 دقايق بعدين نقصر عليه واذا خف الماي نشيل الثقل ونغطيه عدل ومانكشفه عشان مايتسود ومدة الطبخ من البداية تقريبا ساعه الى ساعه ونص



ملاحظات

- الليمون ودبس الرمان حامضين وحاولي توازنين بينهم
- ذوقي ملح الماي اللي طبختيه قبل لاتضيفينه واذا احتاج ماي زياده بعد ماتضيفينه فوق ورق العنب ضيفي عليه بس اهم شي لاتكثرين الماي من الاول يعني تقريبا كوبين ماي ..واذا احتاج ملح نضيف نص او ربع حبة ماجي
- ممكن تطبخينه في قالب بايركس او تيفال بالفرن بس بياخذ وقت اكثر
- ذوقي الحشوه وتاكدي ان ملحتها زينه ووازنيها مع ملحة الماي

بالنسبه للي سالو عن نوع الخلاط اللي عندي
نوعيته براون ورقم موديله Combimax 700

بالعافيه :cook: